उत्तरकाण्डम्Uttara Kāṇḍa

śrutvā tūśanasaṁ kruddhaṁ tadā ' 'rto nahuṣātmajaḥ ।
jarāṁ paramikāṁ prāpya yaduṁ vacanamabravīt ।
7.59.1 ॥ ॥

yado tvamasi dharmajño madarthaṁ pratigṛhyatām ।
jarāṁ paramikāṁ putra bhogai raṁsye mahāyaśaḥ ।
7.59.2 ॥ ॥

na tāvatkṛtakṛtyo 'smi viṣayeṣu nararṣabha ।
anubhūya tadā kāmaṁ tataḥ prāpsyāmyahaṁ jarām ।
7.59.3 ॥ ॥

yadustadvacanaṁ śrutvā pratyuvāca nararṣabham ।
putraste dayitaḥ pūruḥ pratigṛhṇātu vai jarām ।
7.59.4 ॥ ॥

bahiṣkṛto 'hamartheṣu sannikarṣācca pārthiva ।
pratigṛhṇātu vai rājanka sahāśnāti bhojanam ।
7.59.5 ॥

tasya tadvacanaṁ śrutvā rājā pūrumathābravīt ।
iyaṁ jarā mahābāho madarthaṁ pratigṛhyatām ।
7.59.6 ॥ ॥

nāhuṣeṇaivamuktastu pūruḥ prāñjalirabravīt ।
dhanyo 'smyanugṛhīto 'smi śāsane 'smi tava sthitaḥ ।
7.59.7 ॥ ॥

pūrorvacanamājñāya nāhuṣaḥ parayā mudā ।
praharṣamatulaṁ lebhe jarāṁ saṅkrāmayacca tām ।
7.59.8 ॥

tataḥ sa rājā taruṇaḥ prāpya yajñānsahasraśaḥ ।
bahuvarṣasahasrāṇi pālayāmāsa medinīm ।
7.59.9 ॥ ॥

atha dīrghasya kālasya rājā pūrumathābravīt ।
ānayasva jarāṁ putra nyāsaṁ niryātayasva me ।
7.59.10 ॥ ॥

nyāsabhūtā mayā putra tvayi saṅkrāmitā jarā ।
tasmātpratigrahīṣyāmi tāṁ jarāṁ mā vyathāṁ kṛthāḥ ।
7.59.11 ॥ ॥

prītaścāsmi mahābāho śāsanasya pratigrahāt ।
tvāṁ cāhamabhiṣekṣyāmi prītiyukto narādhipam ।
7.59.12 ॥ ॥

evamuktvā sutaṁ pūruṁ yayātirnahuṣātmajaḥ ।
devayānīsutaṁ kruddho rājā vākyamuvāca ha ।
7.59.13 ॥ ॥

rākṣasastvaṁ mayā jātaḥ putrarūpo durāsadaḥ ।
pratihaṁsi mamājñāṁ yat prajārthe viphalo bhava ।
7.59.14 ॥ ॥

pitaraṁ gurubhūtaṁ māṁ yasmāttvamavamanyase ।
rākṣasānyātudhānāṁstvaṁ janayiṣyasi dāruṇān ।
7.59.15 ॥ ॥

na tu somakulotpanne vaṁśe sthāsyati durmateḥ ।
vaṁśo 'pi bhavatastulyo durvinīto bhaviṣyati ।
7.59.16 ॥ ॥

tamevamuktvā rājarṣiḥ pūruṁ rājyavivardhanam ।
abhiṣekeṇa sampūjya āśramaṁ praviveśa ha ।
7.59.17 ॥ ॥

tataḥ kālena mahatā diṣṭāntamupajagmivān ।
tridivaṁ saṅgato rājā yayātirnahuṣātmajaḥ ।
7.59.18 ॥ ॥

pūruścakāra tadrājyaṁ dharmeṇa mahatā vṛtaḥ ।
pratiṣṭhāne puravare kāśirājye mahāyaśāḥ ।
7.59.19 ॥ ॥

yadustu janayāmāsa yātudhānānsahasraśaḥ ।
pure krauñcavane durge rājavaṁśabahiṣkṛtaḥ ।
7.59.20 ॥ ॥

eṣa tūśanasā muktaḥ śāpotsargo yayātinā ।
dhāritaḥ kṣatradharmeṇa yannimiśca na cakṣame ।
7.59.21 ॥ ॥

etatte sarvamākhyātaṁ darśanaṁ sarvakāriṇām ।
anuvartāmahe saumya doṣo na syādyathā nṛge ।
7.59.22 ॥ ॥

iti kathayati rāme candratulyānane ca praviralataratāraṁ vyoma jajñe tadānīm ।
aruṇakiraṇaraktā digbabhau caiva pūrvā kusumarasavimuktaṁ vastramākuṇṭhiteva ।
7.59.23 ॥