उत्तरकाण्डम्Uttara Kāṇḍa

tatra tāṁ rajanīmuṣya keśinyāṁ raghunandanaḥ ।
prabhāte punarutthāya lakṣmaṇaḥ prayayau tadā ।
7.52.1 ॥ ॥

tato 'rdhadivase prāpte praviveśa mahārathaḥ ।
ayodhyāṁ ratnasampūrṇāṁ hṛṣṭapuṣṭajanāvṛtām ।
7.52.2 ॥ ॥

saumitristu paraṁ dainyaṁ jagāma sumahāmatiḥ ।
rāmapādau samāsādya vakṣyāmi kimahaṁ gataḥ ।
7.52.3 ॥ ॥

tasyaivaṁ cintayānasya bhavanaṁ śaśisannibham ।
rāmasya paramodāraṁ purastānsamadṛśyata ।
7.52.4 ॥ ॥

rājñastu bhavanadvāri so 'vatīrya rathottamāt ।
avāṅmukho dīnamanāḥ praviveśānivāritaḥ ।
7.52.5 ॥ ॥

sa dṛṣṭvā rāghavaṁ dīnamāsīnaṁ paramāsane ।
netrābhyāmaśrupūrṇābhyāṁ dadarśāgrajamagrataḥ ।
7.52.6 ॥ ॥

jagrāha caraṇau tasya lakṣmaṇo dīnacetanaḥ ।
uvāca dīnayā vācā prāñjaliḥ susamāhitaḥ ।
7.52.7 ॥ ॥

āryasyājñāṁ puraskṛtya visṛjya janakātmajām ।
gaṅgātīre yathoddiṣṭe vālmīkerāśrame śucau ।
7.52.8 ॥ ॥

tatra tāṁ ca śubhācārāmāśramānte yaśasvinīm ।
punarapyāgato vīra pādamūlamupāsitum ।
7.52.9 ॥ ॥

mā śucaḥ puruṣavyāghra kālasya gatirīdṛśī ।
tvadvidhā na hi śocanti buddhimanto manasvinaḥ ।
7.52.10 ॥ ॥

sarve kṣayāntā nicayāḥ patanāntāḥ samucchrayāḥ ।
saṁyogā viprayogāntā maraṇāntaṁ ca jīvitam ।
7.52.11 ॥ ॥

tasmātputreṣu dāreṣu mitreṣu ca dhaneṣu ca ।
nātiprasaṅgaḥ kartavyo viprayogo hi tairdhruvam ।
7.52.12 ॥ ॥

śaktastvamātmanā ' 'tmānaṁ vinetuṁ manasaiva hi ।
lokānsarvāṁśca kākutstha kiṁ punaḥ śokamātmanaḥ ।
7.52.13 ॥ ॥

nedṛśeṣu vimuhyanti tvadvidhāḥ puruṣarṣabhāḥ ।
apavādaḥ sa kila te punareṣyati rāghava ।
7.52.14 ॥ ॥

yadarthaṁ maithilī tyaktā apavādabhayānnṛpa ।
so 'pavādaḥ pure rājanbhaviṣyati na saṁśayaḥ ।
7.52.15 ॥ ॥

sa tvaṁ puruṣaśārdūla dhairyeṇa susamāhitaḥ ।
tyajaināṁ durbalāṁ buddhiṁ santāpaṁ mā kuruṣva ha ।
7.52.16 ॥ ॥

evamuktaḥ sa kākutstho lakṣmaṇena mahātmanā ।
uvāca parayā prītyā saumitriṁ mitravatsalaḥ ।
7.52.17 ॥ ॥

evametannaraśreṣṭha yathā vadasi lakṣmaṇa ।
paritoṣaśca me vīra mama kāryānuśāsane ।
7.52.18 ॥ ॥

nivṛttiścāgatā saumya santāpaśca nirākṛtaḥ ।
bhavadvākyaiḥ surucirairanunīto 'smi lakṣmaṇa ।
7.52.19 ॥