उत्तरकाण्डम्Uttara Kāṇḍa

sukeśaṁ dhārmikaṁ dṛṣṭvā varalabdhaṁ ca rākṣasam ।
grāmaṇīrnāma gandharvo viśvāvasusamaprabhaḥ ।
7.5.1 ॥ ॥

tasya devavatī nāma dvitīyā śrīrivātmajā ।
triṣu lokeṣu vikhyātā rūpayauvanaśālinī ।
tāṁ sukeśāya dharmeṇa dadau rakṣaḥśriyaṁ yathā ।
7.5.2 ॥ ॥

varadānakṛtaiśvaryaṁ sā taṁ prāpya patiṁ priyam ।
āsīddevavatī tuṣṭā dhanaṁ prāpyeva nirdhanaḥ ।
7.5.3 ॥ ॥

sa tayā saha saṁyukto rarāja rajanīcaraḥ ।
añjanādabhiniṣkrāntaḥ kareṇveva mahāgajaḥ ।
7.5.4 ॥ ॥

devavatyāṁ sukeśastu janayāmāsa rāghava ।
7.5.5 ॥ ॥

trīn putrān janayāmāsa tretāgnisamavigrahān ।
mālyavantaṁ sumāliṁ ca māliṁ ca balināṁ varam ।
trīṁstrinetrasamānputrānrākṣasānrākṣasādhipaḥ ।
7.5.6 ॥ ॥

trayo lokā ivāvyagrāḥ sthitāstraya ivāgnayaḥ ।
trayo mantrā ivātyugrāstrayo ghorā ivāmayāḥ ।
7.5.7 ॥ ॥

trayaḥ sukeśasya sutāstretāgnisamatejasaḥ ।
vivṛddhimagamaṁstatra vyādhayopekṣitā iva ।
7.5.8 ॥ ॥

varaprāptiṁ pituste tu jñātveśvaratapobalāt ।
tapastaptuṁ gatā meruṁ bhrātaraḥ kṛtaniścayāḥ ।
7.5.9 ॥ ॥

pragṛhya niyamānghorānrākṣasā nṛpasattama ।
viceruste tapo ghoraṁ sarvabhūtabhayāvaham ।
7.5.10 ॥ ॥

satyārjavaśamopetaistapobhiratiduṣkaraiḥ ।
santāpayantastrīllom̐kānsadevāsuramānuṣān ।
7.5.11 ॥ ॥

tato vibhuścaturvaktro vimānavaramāsthitaḥ ।
sukeśaputrānāmantrya varado 'smītyabhāṣata ।
7.5.12 ॥ ॥

brahmāṇaṁ varadaṁ jñātvā sendrairdevagaṇairvṛtam ।
ūcuḥ prāñjalayaḥ sarve vepamānā iva drumāḥ ।
7.5.13 ॥ ॥

tapasārādhito deva yadi no diśase varam ।
ajeyāḥ śatruhantārastathaiva cirajīvinaḥ ।
7.5.14 ॥ ॥

prabhaviṣṇvo bhavāmeti parasparamanuvratāḥ ।
7.5.15 ॥ ॥

evaṁ bhaviṣyatītyuktvā sukeśatanayānvibhuḥ ।
sa yayau brahmalokāya brahmā brāhmaṇavatsalaḥ ।
7.5.16 ॥ ॥

varaṁ labdhvā tu te sarve rāma rātriñcarāstadā ।
surāsurānprabādhante varadānasunirbhayāḥ ।
7.5.17 ॥ ॥

tairvadhyamānāstridaśāḥ sarṣisaṅghāḥ sacāraṇāḥ ।
trātāraṁ nādhigacchanti nirayasthā yathā narāḥ ।
7.5.18 ॥ ॥

atha te viśvakarmāṇaṁ śilpināṁ varamavyayam ।
ūcuḥ sametya saṁhṛṣṭā rākṣasā raghusattama ।
7.5.19 ॥ ॥

ojastejobalavatāṁ mahatāmātmatejasā ।
gṛhakartā bhavāneva devānāṁ hṛdayepsitam ।
7.5.20 ॥ ॥

asmākamapi tāvattvaṁ gṛhaṁ kuru mahāmate ।
himavantamapāśritya merumandarameva vā ।
maheśvaragṛhaprakhyaṁ gṛhaṁ naḥ kriyatāṁ mahat ।
7.5.21 ॥ ॥

viśvakarmā tatasteṣāṁ rākṣasānāṁ mahābhujaḥ ।
nivāsaṁ kathayāmāsa śakrasyevāmarāvatīm ।
7.5.22 ॥ ॥

dakṣiṇasyodadhestīre trikūṭo nāma parvataḥ ।
suvela iti cāpyanyo dvitīyastatra sattamāḥ ।
7.5.23 ॥ ॥

śikhare tasya śailasya madhyame 'mbudasannibhe ।
śakunairapi duṣprāpe ṭaṅkacchinnacaturdiśi ।
7.5.24 ॥ ॥

triṁśadyojanakstīrṇā śatayojanamāyatā ।
svarṇaprākārasaṁvītā hematoraṇasaṁvṛtā ।
7.5.25 ॥ ॥

mayā laṅketi nagarī śakrājñaptena nirmitā ।
tasyāṁ vasata durdharṣā yūyaṁ rākṣasapuṅgavāḥ ।
7.5.26 ॥ ॥

amarāvatīṁ samāsādya sendrā iva divaukasaḥ ।
laṅkādurgaṁ samāsādya rākṣasairbahubhirvṛtāḥ ।
7.5.27 ॥ ॥

bhaviṣyatha durādharṣāḥ śatrūṇāṁ śatrusūdanāḥ ।
7.5.28 ॥ ॥

viśvakarmavacaḥ śrutvā tataste rākṣasottamāḥ ।
sahasrānucarā bhūtvā gatvā tāmavasanpurīm ।
7.5.29 ॥ ॥

dṛḍhaprākāraparikhāṁ haimairgṛhaśatairvṛtām ।
laṅkāmavāpya te hṛṣṭā nyavasanrajanīcarāḥ ।
7.5.30 ॥ ॥

etasminneva kāle tu yathākāmaṁ ca rāghava ।
narmadā nāma gandharvī babhūva raghunandana ।
7.5.31 ॥ ॥

tasyāḥ kānyātrayaṁ hyāsīt dhīśrīkirtisamadyuti ।
jyeṣṭhakrameṇa sā teṣāṁ rākṣasānāmarākṣasī ।
7.5.32 ॥ ॥

kanyāstāḥ pradadau hṛṣṭā pūrṇacandranibhānanāḥ ।
trayāṇāṁ rākṣasendrāṇāṁ tisro gandharvakanyakāḥ ।
7.5.33 ॥ ॥

dattā mātrā mahābhāgā nakṣatre bhagadaivate ।
kutadārāstu te rāma sukeśatanayāstadā ।
7.5.34 ॥ ॥

cikrīḍuḥ saha bhāryābhirapsarobhirivāmarāḥ ।
tato mālyavato bhāryā sundarī nāma sundarī ।
7.5.35 ॥ ॥

sa tasyāṁ janayāmāsa yadapatyaṁ nibodha tat ।
vajramuṣṭirvirūpākṣodurmukhaścaiva rākṣasaḥ ।
7.5.36 ॥ ॥

suptaghno yajñakopaśca mattonmattau tathaiva ca ।
analā cābhavatkanyā sundaryāṁ rāma sundarī ।
7.5.37 ॥ ॥

sumālino 'pi bhāryāsītpūrṇacadranibhānanā ।
nāmnā ketumatī rāma prāṇebhyo 'pi garīyasī ।
7.5.38 ॥ ॥

sumālī janayāmāsa yadapatyaṁ niśācaraḥ ।
ketumatyāṁ mahārāja tannibodhānupūrvaśaḥ ।
7.5.39 ॥ ॥

prahasto 'kampanaścaiva vikaṭaḥ kālakārmukhaḥ ।
dhūmrākṣaścaiva daṇḍaśca supārśvaśca mahābalaḥ ।
7.5.40 ॥ ॥

saṁhrādiḥ praghasaścaiva bhāsakarṇaśca rākṣasaḥ ।
rākā puṣpotkaṭā caiva kaikasī ca śucismitā ॥ ॥

kumbhīnasī ca ityete sumāleḥ prasavāḥ smṛtāḥ ।
7.5.41 ॥ ॥

mālestu vasudhā nāma gandharvī rūpaśālinī ।
bhāryāsītpadmapatrākṣī svakṣī yakṣīvaropamā ।
7.5.42 ॥ ॥

sumāleranujastasyāṁ janayāmāsa yat prabho ।
apatyaṁ kathyamānaṁ tu mayā tvaṁ śṛṇu rāghava ।
7.5.43 ॥ ॥

anilaścānalaścaiva haraḥ sampātireva ca ।
ete vibhīṣaṇāmātyā māleyāstu niśācaraḥ ।
7.5.44 ॥ ॥

tatastu te rākṣasapuṅgavāstrayo niśācaraiḥ putraśataiśca saṁvṛtāḥ ।
surānsahendrānṛṣināgayakṣānbabādhire tānbahuvīryadarpitāḥ ।
7.5.45 ॥ ॥

jagadbhramanto 'nilavaddurāsadā raṇeṣu mṛtyupratimānatejasaḥ ।
varapradānādatigarvitā bhṛśaṁ kratukriyāṇāṁ praśamaṅkarāḥ sadā ।
7.5.46 ॥