उत्तरकाण्डम्Uttara Kāṇḍa

tairvadhyamānā devāśca ṛṣayaśca tapodhanāḥ ।
bhayārtāḥ śaraṇaṁ jagmurdevadevaṁ maheśvaram ।
7.6.1 ॥ ॥

jagatsṛṣṭyantakartāramajamavyaktarūpiṇam ।
ādhāraṁ sarvalokānāmārādhyaṁ paramaṁ gurum ।
7.6.2 ॥ ॥

te sametya tu kāmāriṁ tripurāriṁ trilocanam ।
ūcuḥ prāñjalayo devā bhayagadgadabhāṣiṇaḥ ।
7.6.3 ॥ ॥

sukeśaputrairbhagavanpitāmahavaroddhataiḥ ।
prajādhyakṣa prajāḥ sarvā bādhyante ripubādhanaiḥ ।
7.6.4 ॥ ॥

śaraṇyānyaśaraṇyāni hyāśramāṇi kṛtāni naḥ ।
svargācca devānpracyāvya svarge krīḍanti devavat ।
7.6.5 ॥ ॥

ahaṁ viṣṇurahaṁ rudro brahmāhaṁ devarāḍaham ।
ahaṁ yamaśca varuṇaścandro 'haṁ ravirapyaham ।
7.6.6 ॥ ॥

iti mālī sumālī ca mālyavāṁścaiva rākṣasāḥ ।
bādhante samaroddharṣā ye ca teṣāṁ puraḥsarāḥ ।
tanno deva bhayārtānāmabhayaṁ dātumarhasi ।
7.6.7 ॥ ॥

aśivaṁ vapurāsthāya jahi vai devakaṇṭakān ।
7.6.8 ।
dhante samaroddharṣā ye ca teṣāṁ puraḥsarāḥ ।
ityuktastu suraiḥ sarvaiḥ kapardī nīlalohitaḥ ।
sukeśaṁ prati sāpekṣaḥ prāha devagaṇānprabhuḥ ।
7.6.9 ॥ ॥

ahaṁ tānna haniṣyāmi mayāvadhyā hi te surāḥ ।
kiṁ tu mantraṁ pradāsyāmi yo vai tānnihaniṣyati ।
7.6.10 ॥ ॥

etameva samudyogaṁ puraskṛtya maharṣayaḥ ।
gacchadhvaṁ śaraṇaṁ viṣṇuṁ haniṣyati sa tānprabhuḥ ।
7.6.11 ॥ ॥

tatastu jayaśabdena pratinandya maheśvaram ।
viṣṇoḥ samīpamājagmurniśācarabhayārditāḥ ।
7.6.12 ॥ ॥

śaṅkhacakradharaṁ devaṁ praṇamya bahumānya ca ।
ūcuḥ sambhrāntavadvākyaṁ sukeśatanayānprati ।
7.6.13 ॥ ॥

sukeśatanayairdeva tribhistretāgnisannibhaiḥ ।
ākramya varadānena sthānānyapahṛtāni naḥ ।
7.6.14 ॥ ॥

laṅkā nāma purī durgā trikūṭaśikhare sthitā ।
tatra sthitāḥ prabādhante sarvānnaḥ kṣaṇadācarāḥ ।
7.6.15 ॥ ॥

sa tvamasmaddhitārthāya jahi tānmadhusūdana ।
śaraṇaṁ tvāṁ vayaṁ prāptā gatirbhava sureśvara ।
7.6.16 ॥ ॥

cakrakṛttāsyakamalānnivedaya yamāya vai ।
bhayeṣvabhayado 'smākaṁ nānyo 'sti bhavatā vinā ।
7.6.17 ॥ ॥

rākṣasānsamare duṣṭānsānubandhānmadoddhatān ।
nudaṁ tvaṁ no bhayaṁ deva nīhāramiva bhāskaraḥ ।
7.6.18 ॥ ॥

ityevaṁ daivatairukto devadevo janārdanaḥ ।
abhayaṁ bhayado 'rīṇāṁ dattvā devānuvāca ha ।
7.6.19 ॥ ॥

sukeśaṁ rākṣasaṁ jāne īśānavaradarpitam ।
tāṁścāsya tanayāñjāne yeṣāṁ jyeṣṭhaḥ sa mālyavān ।
7.6.20 ॥ ॥

tānahaṁ samatikrāntamaryādānrākṣasādhamān ।
nihaniṣyāmi saṅkruddhaḥ surā bhavata vijvarāḥ ।
7.6.21 ॥ ॥

ityuktāste surāḥ sarve viṣṇunā prabhaviṣṇunā ।
yathāvāsaṁ yayurhṛṣṭāḥ praśaṁsanto janārdanam ।
7.6.22 ॥ ॥

vibudhānāṁ samudyogaṁ mālyavāṁstu niśācaraḥ ।
śrutvā tau bhrātarau vīrāvidaṁ vacanamabravīt ।
7.6.23 ॥ ॥

amarā ṛṣayaścaiva saṅgamya kila śakaram ।
asmadvadhaṁ parīpsanta idaṁ vacanamabruvan ।
7.6.24 ॥ ॥

sukeśatanayā deva varadānabaloddhatāḥ ।
bādhante 'smānsamuddṛptā ghorarūpāḥ pade pade ।
7.6.25 ॥ ॥

rākṣasairabhibhūtāḥ sma na śaktāḥ sma prajāpate ।
sveṣu sadmasu saṁsthātuṁ bhayātteṣāṁ durātmanām ।
7.6.26 ॥ ॥

tadasmākaṁ hitārthāya jahi tāṁśca trilocana ।
rākṣasānhuṅkṛtenaiva daha pradahatāṁ vara ।
7.6.27 ॥ ॥

ityevaṁ tridaśairukto niśamyāndhakasūdanaḥ ।
śiraḥ karaṁ ca dhunvāna idaṁ vacanamabravīt ।
7.6.28 ॥ ॥

avadhyā mama te devāḥ sukeśatanayā raṇe ।
mantraṁ tu vaḥ pradāsyāmi yastānvai nihaniṣyati ।
7.6.29 ॥ ॥

yo 'sau cakragadāpāṇiḥ pītavāsā janārdanaḥ ।
harirnārāyaṇaḥ śrīmān śaraṇaṁ taṁ prapadyatha ।
7.6.30 ॥ ॥

harādavāpya te mantraṁ kāmārimabhivādya ca ।
nārāyaṇālayaṁ prāpya tasmai sarvaṁ nyavedayan ।
7.6.31 ॥ ॥

tato nārāyaṇenoktā devā indrapurogamāḥ ।
surārīṁstānhaniṣyāmi surā bhavata vijvarāḥ ।
7.6.32 ॥ ॥

devānāṁ bhayabhītānāṁ hariṇā rākṣasarṣabhau ।
pratijñāto vadho 'smākaṁ cintyatāṁ yadiha kṣamam ।
7.6.33 ॥ ॥

hiraṇyakaśipormṛtyuranyeṣāṁ ca suradviṣām ।
namuciḥ kālanemiśca saṁhrādo vīrasattamaḥ ।
7.6.34 ॥ ॥

rādheyo bahumāyī ca lokapālo 'tha dhārmikaḥ ।
yamalārjunau ca hārdikyaḥ śumbhaścaiva niśumbhakaḥ ।
7.6.35 ॥ ॥

asurā dānavāścaiva sattvavanto mahābalāḥ ।
sarve samaramāsādya na śrūyante 'parājitāḥ ।
7.6.36 ॥ ॥

sarvaiḥ kratuśatairiṣṭaṁ sarve māyāvidastathā ।
sarve sarvāstrakuśalāḥ sarve śatrubhayaṅkarāḥ ।
7.6.37 ॥ ॥

nārāyaṇena nihatāḥ śataśo 'tha sahasraśaḥ ।
etajjñātvā tu sarveṣāṁ kṣamaṁ kartumihārhatha ।
7.6.38 ॥ ॥

tataḥ sumālī mālī ca śrutvā mālyavato vacaḥ ।
ūcaturbhrātaraṁ jyeṣṭhaṁ bhagāṁśāviva vāsavam ।
7.6.39 ॥ ॥

svadhītaṁ dattamiṣṭaṁ cāpyaiśvaryaṁ paripālitam ।
āyurnirāmayaṁ prāptaṁ sudharmaḥ prāpitaḥ pathi ।
7.6.40 ॥ ॥

devasāgaramakṣobhyaṁ śastraiḥ samavagāhya ca ।
jitā dviṣo hyapratimāstanno mṛtyukṛtaṁ bhayam ।
7.6.41 ॥ ॥

nārāyaṇaśca rudraśca śakraścāpi yamastathā ।
asmākaṁ pramukhe sthātuṁ sarve bibhyati sarvadā ।
7.6.42 ॥ ॥

viṣṇordevasya nāstyeva kāraṇaṁ rākṣaseśvara ।
devānāmeva doṣeṇa viṣṇoḥ pracalitaṁ manaḥ ।
7.6.43 ॥ ॥

tasmādadya samudyuktāḥ sarvasainyasamāvṛtāḥ ।
devāneva jighāṁsāma ebhyo doṣaḥ samutthitaḥ ।
7.6.44 ॥ ॥

evaṁ sammantrya balinaḥ sarve sainyasamāvṛtāḥ ।
udyogaṁ ghoṣayitvā tu sarve nairṛtapuṅgavāḥ ॥ ॥

yuddhāya niryayuḥ kruddhā jambhavṛtrabalā iva ।
7.6.45 ॥ ॥

iti te rāma sammantrya sarvodyogena rākṣasāḥ ।
yuddhāya niryayuḥ sarve mahākāyā mahābalāḥ ।
7.6.46 ॥ ॥

syandanairvāraṇaiścaiva hayaiśca girisannibhaiḥ ।
kharairgobhī rathoṣṭraiśca śiṁśumārairbhujaṅgamaiḥ ।
7.6.47 ॥ ॥

makaraiḥ kacchapairmīnairvihaṅgairgaruḍopamaiḥ ।
siṁhairvyāghrairvarāhaiśca sṛmaraiścamarairapi ।
7.6.48 ॥ ॥

tyaktvā laṅkāṁ gatāḥ sarve rākṣasā balagarvitāḥ ।
prayātā devalokāya yoddhuṁ daivataśatravaḥ ।
7.6.49 ॥ ॥

laṅkāviparyayaṁ dṛṣṭvā yāni laṅkālayānyatha ।
bhūtāni bhayadarśīni vimanaskāni sarvaśaḥ ।
7.6.50 ॥ ॥

rathottamairuhyamānāḥ śataśo 'tha sahasraśaḥ ।
7.6.51 ॥ ॥

prayātā rākṣasāstūrṇaṁ devalokaṁ prayatnataḥ ।
rakṣasāmeva mārgeṇa daivatānyapacakramuḥ ।
7.6.52 ॥ ॥

bhaumāścaivāntarikṣāśca kālājñaptā bhayāvahāḥ ।
utpātā rākṣasendrāṇāmabhāvāya samutthitāḥ ।
7.6.53 ॥ ॥

asthīni meghā vavṛṣuruṣṇaṁ śoṇitameva ca ।
velāṁ samudrāścotkrāntāśceluścāpyatha bhūdharāḥ ।
7.6.54 ॥ ॥

aṭṭahāsānvimuñcanto ghananādasamasvanāḥ ।
vāśyantyaśca śivāstatra dāruṇaṁ ghoradarśanāḥ ।
7.6.55 ॥ ॥

sampatantyatha bhūtāni dṛśyante ca yathākramam ।
gṛdhracakraṁ mahaccātra jvalanodgāribhirmukhaiḥ ।
7.6.56 ॥ ॥

rākṣasānāmupari khe bhramate 'lātacakravat ।
kapotā raktapādāśca śārikā vidrutā yayuḥ ॥ ॥

kākā vāśyanti tatraiva biḍālā vai dvipādayaḥ ।
7.6.57 ॥ ॥

utpātāṁstānanādṛtya rākṣasā balagarvitāḥ ।
yāntyeva na nivarttante mṛtyupāśāvapāśitāḥ ।
7.6.58 ॥ ॥

mālyavāṁśca sumālī ca mālī ca sumahābalāḥ ।
āsanpuraḥsarāsteṣāṁ kratūnāmiva pāvakāḥ ।
7.6.59 ॥ ॥

mālyavantaṁ ca te sarve mālyavantamivācalam ।
niśācarā hyāśrayanti dhātāramiva devatāḥ ।
7.6.60 ॥ ॥

tadbalaṁ rākṣasendrāṇāṁ mahābhraghananāditam ।
jayepsayā devalokaṁ yayau mālivaśe sthitam ।
7.6.61 ॥ ॥

rākṣasānāṁ samudyogaṁ taṁ tu nārāyaṇaḥ prabhuḥ ।
devadūtādupaśrutya cakre yuddhe tadā manaḥ ।
7.6.62 ॥ ॥

sa sajjāyudhatūṇīro vainateyopari sthitaḥ ।
āsajjya kavacaṁ divyaṁ sahasrārkasamadyuti ।
7.6.63 ॥ ॥

ābadhya śarasampūrṇe iṣudhī vimale tadā ।
śroṇisūtraṁ ca khaḍgaṁ ca vimalaṁ kamalekṣaṇaḥ ॥ ॥

śaṅkhacakragadāśārṅgakhaḍgākhyapravarāyudhān ।
7.6.64 ॥ ॥

suparṇaṁ girisaṅkāśaṁ vainateyamathāsthitaḥ ।
rākṣasānāmabhāvāya yayau tūrṇataraṁ prabhuḥ ।
7.6.65 ॥ ॥

suparṇapṛṣṭhe sa babhau śyāmaḥ pītāmbaro hariḥ ।
kāñcanasya gireḥ śṛṅge sataḍittoyado yathā ।
7.6.66 ॥ ॥

sa siddhadevarṣimahoragaiśca gandharvayakṣairupagīyamānaḥ ।
samāsasādāsurasainyaśatrūṁścakrāsiśārṅgāyudhaśaṅkhapāṇiḥ ।
7.6.67 ॥ ॥

suparṇapakṣānilanunnapakṣaṁ bhramatpatākaṁ pravikīrṇaśastram ।
cacāla tadrākṣasarājasainyaṁ calopalaṁ nīla ivācalendraḥ ।
7.6.68 ॥ ॥

tataḥ śaraiḥ śoṇitamāṁsarūṣitairyugāntavaiśvānaratulyavigrahaiḥ ।
niśācarāḥ samparivārya mādhavaṁ varāyudhairnirbibhiduḥ sahasraśaḥ ।
7.6.69 ॥