उत्तरकाण्डम्Uttara Kāṇḍa

śrutvāgastyeritaṁ vākyaṁ rāmo vismayamāgataḥ ।
kathamāsīttu laṅkāyāṁ sambhavo rakṣasāṁ purā ।
7.4.1 ॥ ॥

tataḥ śiraḥ kampayitvā tretāgnisamavigraham ।
tamagastyaṁ muhurdṛṣṭvā smayamāno 'bhyabhāṣata ।
7.4.2 ॥ ॥

bhagavanpūrvamapyeṣā laṅkāsītpiśitāśinām ।
śrutvedaṁ bhagavadvākyaṁ jāto me vismayaḥ paraḥ ।
7.4.3 ॥ ॥

pulastyavaṁśādudbhūtā rākṣasā iti naḥ śrutam ।
idānīmanyataścāpi sambhavaḥ kīrtitastvayā ।
7.4.4 ॥ ॥

rāvaṇātkumbhakarṇācca prahastādvikaṭādapi ।
rāvaṇasya ca putrebhyaḥ kiṁ nu te balavattarāḥ ।
7.4.5 ॥ ॥

ka eṣāṁ pūrvako brahmankinnāmā ca balotkaṭaḥ ।
aparādhaṁ ca kaṁ prāpya viṣṇunā drāvitāḥ katham ।
7.4.6 ॥ ॥

etadvistarataḥ sarvaṁ kathayasva mamānagha ।
kutūhalamidaṁ mahyaṁ nuda bhānuryathā tamaḥ ।
7.4.7 ॥ ॥

rāghavasya vacaḥ śrutvā saṁskārālaṅkṛtaṁ śubham ।
īṣadvismayamānastamagastyaḥ prāha rāghavam ।
7.4.8 ॥ ॥

prajāpatiḥ purā sṛṣṭvā hyapaḥ salilasambhavaḥ ।
tāsāṁ gopāyane sattvānasṛjatpadmasambhavaḥ ।
7.4.9 ॥ ॥

te sattvāḥ sattvakartāraṁ vinītavadupasthitāḥ ।
kiṁ kurma iti bhāṣantaḥ kṣutpipāsābhayārditāḥ ।
7.4.10 ॥ ॥

prajāpatistu tānyāha satvāni prahasanniva ।
ābhāṣya vācā yatnena rakṣadhvamiti mānadaḥ ।
7.4.11 ॥ ॥

rakṣāmeti ca tatrānye jakṣāma iti cāpare ।
bhukṣitābhukṣitairuktastatastānāha bhūtakṛt ।
7.4.12 ॥ ॥

rakṣāmeti ca yairuktaṁ rākṣasāste bhavantu vaḥ ।
jakṣāma iti yairuktaṁ yakṣā eva bhavantu vaḥ ।
7.4.13 ॥ ॥

tatra hetiḥ prahetiśca bhrātarau rākṣasādhipau ।
madhukaiṭabhasaṅkāśau babhūvaturarindamau ।
7.4.14 ॥ ॥

prahetirdhārmikastatra tapovanagatastadā ।
hetirdārakriyārthe tu paraṁ yatnamathākarot ।
7.4.15 ॥ ॥

sa kālabhaginīṁ kanyāṁ bhayāṁ nāma bhayāvahām ।
udāvahadameyātmā svayameva mahāmatiḥ ।
7.4.16 ॥ ॥

sa tasyāṁ janayāmāsa hetī rākṣasapuṅgavaḥ ।
putraṁ putravatāṁ śreṣṭho vidyutkeśa iti śrutam ।
7.4.17 ॥ ॥

vidyutkeśo hetiputraḥ sa dīptārkasamaprabhaḥ ।
vyavardhata mahātejāstoyamadhya ivāmbudaḥ ।
7.4.18 ॥ ॥

sa yadā yauvanaṁ bhadramanuprāpto niśācaraḥ ।
tato dārakriyāṁ tasya kartuṁ vyavasitaḥ pitā ।
7.4.19 ॥ ॥

sandhyāyāstanayāṁ so 'tha sandhyātulyāṁ prabhāvataḥ ।
varayāmāsa putrārthaṁ hetī rākṣasapuṅgavaḥ ।
7.4.20 ॥ ॥

avaśyameva dātavyā parasmai seti sandhyayā ।
cintayitvā sutā dattā vidyutkeśāya rāghava ।
7.4.21 ॥ ॥

sandhyāyāstanayāṁ labdhvā vidyutkeśo niśācaraḥ ।
ramate sma tayā sārdhaṁ paulomyā maghavāniva ।
7.4.22 ॥ ॥

kenacittvatha kālena rāma sālakaṭaṅkaṭā ।
vidyutkeśādgarbhamāpa ghanarājirivārṇavāt ।
7.4.23 ॥ ॥

tataḥ sā rākṣasī garbhaṁ ghanagarbhasamaprabham ।
prasūtā mandaraṁ gatvā gaṅgā garbhamivāgnijam ।
7.4.24 ॥ ॥

samutsṛjya tu sā garbhaṁ vidyutkeśaratārthinī ।
reme tu sārdhaṁ patinā vismṛtya sutamātmajam ।
7.4.25 ॥ ॥

utsṛṣṭastu tadā garbho ghanaśabdasamasvanaḥ ।
tayotsṛṣṭaḥ sa tu śiśuḥ śaradarkasamadyutiḥ ।
nidhāyāsye svayaṁ muṣṭiṁ ruroda śanakaistadā ।
7.4.26 ॥ ॥

tato vṛṣabhamāsthāya pārvatyā sahitaḥ śivaḥ ।
vāyumārgeṇa gacchanvai śuśrāva ruditasvanam ।
7.4.27 ॥ ॥

apaśyadumayā sārdhaṁ rudantaṁ rākṣasātmajam ।
kāruṇyabhāvātpārvatyā bhavastripurasūdanaḥ ।
7.4.28 ॥ ॥

taṁ rākṣasātmajaṁ cakre mātureva vayaḥsamam ।
amaraṁ caiva taṁ kṛtvā mahādevo 'kṣaro 'vyayaḥ ।
7.4.29 ॥ ॥

puramākāśagaṁ prādātpārvatyāḥ priyakāmyayā ।
umayāpi varo datto rākṣasānāṁ nṛpātmaja ।
7.4.30 ॥ ॥

sadyopalabdhirgarbhasya prasūtiḥ sadya eva ca ।
sadya eva vayaḥprāptirmātureva vayassamam ।
7.4.31 ॥ ॥

tataḥ sukeśo varadānagarvitaḥ śriyaṁ prabhoḥ prāpya harasya pārśvataḥ ।
cacāra sarvatra mahānmahāmatiḥ khagaṁ puraṁ prāpya purandaro yathā ।
7.4.32 ॥