उत्तरकाण्डम्Uttara Kāṇḍa

tatropaviṣṭaṁ rājānamupāsante vicakṣaṇāḥ ।
kathānāṁ bahurūpāṇāṁ hāsyakārāḥ samantataḥ ।
7.43.1 ॥ ॥

vijayo madhumattaśca kāśyapo maṅgalaḥ kuṭaḥ ।
surājaḥ kāliyo bhadro dantavakraḥ sumāgadhaḥ ।
7.43.2 ॥ ॥

ete kathā bahuvidhāḥ parihāsasamanvitāḥ ।
kathayanti sma saṁhṛṣṭā rāghavasya mahātmanaḥ ।
7.43.3 ॥ ॥

tataḥ kathāyāṁ kasyāñcidrāghavaḥ samabhāṣata ।
kāḥ kathā nagare bhadra vartante viṣayeṣu ca ।
7.43.4 ॥ ॥

māmāśritāni kānyāhuḥ paurajānapadā janāḥ ।
kiṁ ca sītāṁ samāśritya bharataṁ kiṁ ca lakṣmaṇam ।
7.43.5 ॥ ॥

kiṁ nu śatrughnamuddiśya kaikayīṁ kiṁ nu mātaram ।
vaktavyatāṁ ca rājāno vare rājye vrajanti ca ।
7.43.6 ॥ ॥

evamukte tu rāmeṇa bhadraḥ prāñjalirabravīt ।
sthitāḥ kathā śubhāḥ rājanvartante puravāsinām ।
7.43.7 ॥ ॥

amuṁ tu vijayaṁ saumya daśagrīvavadhārjitam ।
bhūyiṣṭhaṁ svapure pauraiḥ kathyante puruṣarṣabha ।
7.43.8 ॥ ॥

evamuktastu bhadreṇa rāghavo vākyamabravīt ।
kathayasva yathātattvaṁ sarvaṁ niravaśeṣataḥ ।
7.43.9 ॥ ॥

śubhāśubhāni vākyāni yānyāhuḥ puravāsinaḥ ।
śrutvedānīṁ śubhaṁ kuryāṁ nakuryāmaśubhāni ca ।
7.43.10 ॥ ॥

kathayasva ca visrabdho nirbhayaṁ vigatajvaraḥ ।
kathayanti yathā paurāḥ pāpā janapadeṣu ca ।
7.43.11 ॥ ॥

rāghaveṇaivamuktastu bhadraḥ suruciraṁ vacaḥ ।
pratyuvāca mahābāhuṁ prāñjaliḥ susamāhitaḥ ।
7.43.12 ॥ ॥

śṛṇu rājanyathā paurāḥ kathayanti śubhāśubham ।
catvarāpaṇarathyāsu vaneṣūpavaneṣu ca ।
7.43.13 ॥ ॥

duṣkaraṁ kṛtavānrāmaḥ samudre setubandhanam ।
aśrutaṁ pūrvakaiḥ kaiściddevairapi sadānavaiḥ ।
7.43.14 ॥ ॥

rāvaṇaśca durādharṣo hataḥ sabalavāhanaḥ ।
vānarāśca vaśaṁ nītā ṛkṣāśca saha rākṣasaiḥ ।
7.43.15 ॥ ॥

hatvā ca rāvaṇaṁ saṅkhye sītāmāhṛtya rāghavaḥ ।
amarṣaṁ pṛṣṭhataḥ kṛtvā svaveśma punarānayat ।
7.43.16 ॥ ॥

kīdṛśaṁ hṛdaye tasya sītāsambhogajaṁ sukham ।
aṅkamāropya tu purā rāvaṇena balāddhṛtām ।
7.43.17 ॥ ॥

laṅkāmapi purā nītāmaśokavanikāṁ gatām ।
rakṣasāṁ vaśamāpannāṁ kathaṁ rāmo na kutsate ।
7.43.18 ॥ ॥

asmākamapi dāreṣu sahanīyaṁ bhaviṣyati ।
yathā hi kurute rājā prajā tamanuvartate ।
7.43.19 ॥ ॥

evaṁ bahuvidhā vāco vadanti puravāsinaḥ ।
nagareṣu ca sarveṣu rājañjanapadeṣu ca ।
7.43.20 ॥ ॥

tasyaivaṁ bhāṣitaṁ śrutvā rāghavaḥ paramārtavat ।
uvāca suhṛdaḥ sarvānkathametadbravītha mām ।
7.43.21 ॥ ॥

sarve tu śirasā bhūmāvabhivādya praṇamya ca ।
pratyūcū rāghavaṁ dīnamevametanna saṁśayaḥ ।
7.43.22 ॥ ॥

śrutvā tu vākyaṁ kākutsthaḥ sarveṣāṁ samudīritam ।
visarjayāmāsa tadā vayasyāñchatrusūdanaḥ ।
7.43.23 ॥