उत्तरकाण्डम्Uttara Kāṇḍa

sa visṛjya tato rāmaḥ puṣpakaṁ hemabhūṣitam ।
praviveśa mahābāhuraśokavanikāṁ tadā ।
7.42.1 ॥ ॥

candanāgurucūtaiśca tuṅgakāleyakairapi ।
devadāruvanaiścāpi samantādupaśobhitām ।
7.42.2 ॥ ॥

campakāśokapunnāgamadhūkapanasāsanaiḥ ।
śobhitāṁ pārijātaiśca vidhūmajvalanaprabhaiḥ ।
7.42.3 ॥ ॥

lodhranīpārjunairnāgaiḥ saptaparṇātimuktakaiḥ ।
mandārakadalīgulmalatājālasamāvṛtām ।
7.42.4 ॥ ॥

priyaṅgubhiḥ kadambaiśca tathā ca vakulairapi ।
jambūbhirdāḍimaiścaiva kovidāraiśca śobhitām ।
7.42.5 ॥ ॥

sarvadā kusumai ramyaiḥ phalavadbhirmanoramaiḥ ।
divyagandharasopetaistaruṇāṅkurapallavaiḥ ।
7.42.6 ॥ ॥

tathaiva tarubhirdivyaiḥ śilpibhiḥ parikalpitaiḥ ।
cārupallavapuṣpāḍhyairmattabhramarasaṅkulaiḥ ।
7.42.7 ॥ ॥

kokilairbhṛṅgarājaiśca nānāvarṇaiśca pakṣibhiḥ ।
śobhitāṁ śataśaścitrāṁ cūtavṛkṣāvataṁsakaiḥ ।
7.42.8 ॥ ॥

śātakumbhanibhāḥ kecitkecidagniśikhopamāḥ ।
nīlāñjananibhāścānye bhānti tatratyapādapāḥ ।
7.42.9 ॥ ॥

surabhīṇi ca puṣpāṇi mālyāni vividhāni ca ।
dīrghikā vividhākārāḥ pūrṇāḥ paramavāriṇā ।
7.42.10 ॥ ॥

māṇikyakṛtasopānāḥ sphāṭikāntarakuṭṭimāḥ ।
phullapadmotpalavanāścakravākopaśobhitāḥ ।
7.42.11 ॥ ॥

dātyūhaśukasaṅghuṣṭā haṁsasārasanāditāḥ ।
tarubhiḥ puṣpavadbhiśca tīrajairupaśobhitāḥ ।
7.42.12 ॥ ॥

prākārairvividhākāraiḥ śobhitāśca śilātalaiḥ ।
tatraiva ca vanoddeśe vaiḍūryamaṇisannibhaiḥ ।
7.42.13 ॥ ॥

śādvalaiḥ paramopetāṁ puṣpitadrumakānanām ।
tatra saṅgharṣajātānāṁ vṛkṣāṇāṁ puṣpaśālinām ।
7.42.14 ॥ ॥

prastarāḥ puṣpaśabalā nabhastārāgaṇairiva ।
nandanaṁ hi yathendrasya brāhmaṁ caitrarathaṁ yathā ।
tathābhūtaṁ hi rāmasya kānanaṁ sanniveśanam ।
7.42.15 ॥ ॥

bahvāsanagṛhopetāṁ latāgṛhasamāvṛtām ।
aśokavanikāṁ sphītāṁ praviśya raghunandanaḥ ।
7.42.16 ॥ ॥

āsane ca śubhākāre puṣpaprakarabhūṣite ।
kuśāstaraṇasaṁstīrṇe rāmaḥ sanniṣasāda ha ।
7.42.17 ॥ ॥

sītāmādāyaṁ hastena madhumaireyakaṁ śuci ।
pāyayāmāsa kākutsthaḥ śacīmiva purandaraḥ ।
7.42.18 ॥ ॥

māṁsāni ca samṛṣṭāni phalāni vividhāni ca ।
rāmasyābhyavahārārthaṁ kiṅkarāstūrṇamāharan ।
7.42.19 ॥ ॥

upānṛtyaṁśca rājānaṁ nṛtyagītaviśāradāḥ ।
bālāśca rūpavatyaśca striyaḥ pānavaśānugāḥ ।
7.42.20 ॥ ॥

manobhirāmā rāmāstā rāmo ramayatāṁ varaḥ ।
ramayāmāsa dharmātmā nityaṁ paramabhūṣitaḥ ।
7.42.21 ॥ ॥

sa tayā sītayā sārdhamāsīno virarāja ha ।
arundhatyā sahāsīno vasiṣṭha iva tejasā ।
7.42.22 ॥ ॥

evaṁ rāmo mudā yuktaḥ sītāṁ surasutopamām ।
ramayāmāsa vaidehīmahanyahani devavat ।
7.42.23 ॥ ॥

tathā tayorviharatoḥ sītārāghavayościram ।
atyakrāmacchubhaḥ kālaḥ śaiśiro bhogadaḥ sadā ।
7.42.24 ॥ ॥

daśavarṣasahasrāṇi gatāni sumahātmanoḥ ।
prāptayorvividhānbhogānatītaḥ śiśirāgamaḥ ।
7.42.25 ॥ ॥

pūrvāhṇe dharmakāryāṇi kṛtvā dharmeṇa dharmavit ।
śeṣaṁ divasabhāgārdhamantaḥpuragato 'bhavat ।
7.42.26 ॥ ॥

sītāpi devakāryāṇi kṛtvā paurvāhṇikāni vai ।
śvaśrūṇāmakarotpūjāṁ sarvāsāmaviśeṣataḥ ।
7.42.27 ॥ ॥

abhyagacchattato rāmaṁ vicitrābharaṇāmbarā ।
triviṣṭape sahasrākṣamupaviṣṭaṁ yathā śacī ।
7.42.28 ॥ ॥

dṛṣṭvā tu rāghavaḥ patnīṁ kalyāṇena samanvitām ।
praharṣamatulaṁ lebhe sādhu sādhviti cābravīt ।
7.42.29 ॥ ॥

abravīcca varārohāṁ sītāṁ surasutopamām ।
apatyalābho vaidehi tvayi me samupasthitaḥ ।
7.42.30 ॥ ॥

kimicchasi varārohe kāmaḥ kiṁ kriyatāṁ tava ।
7.42.31 ॥ ॥

smitaṁ kṛtvā tu vaidehī rāmaṁ vākyamathābravīt ।
tapovanāni puṇyāni draṣṭumicchāmi rāghava ।
7.42.32 ॥ ॥

gaṅgātīropaviṣṭānāmṛṣīṇāmugratejasām ।
phalamūlāśināṁ deva pādamūleṣu vartitum ।
7.42.33 ॥ ॥

eṣa me paramaḥ kāmo yanmūlaphalabhojinām ।
apyekarātraṁ kākutstha nivaseyaṁ tapovane ।
7.42.34 ॥ ॥

tatheti ca pratijñātaṁ rāmeṇākliṣṭakarmaṇā ।
visrabdhā bhava vaidehi śvo gamiṣyasyasaṁśayam ।
7.42.35 ॥ ॥

evamuktvā tu kākutstho maithilīṁ janakātmajām ।
madhyakakṣāntaraṁ rāmo nirjagāma suhṛdvṛtaḥ ।
7.42.36 ॥