उत्तरकाण्डम्Uttara Kāṇḍa

evamāste mahābāhurahanyahani rāghavaḥ ।
praśāsatsarvakāryāṇi paurajānapadeṣu ca ।
7.38.1 ॥ ॥

tataḥ katipayāhaḥsu vaidehaṁ mithilādhipam ।
rāghavaḥ prāñjalirbhūtvā vākyametaduvāca ha ।
7.38.2 ॥ ॥

bhavānhi gatiravyagrā bhavatā pālitā vayam ।
bhavatastejasogreṇa rāvaṇo nihato mayā ।
7.38.3 ॥ ॥

ikṣvākūṇāṁ ca sarveṣāṁ maithilānāṁ ca sarvaśaḥ ।
atulāḥ prītayo rājansambandhakapurogamāḥ ।
7.38.4 ॥ ॥

tadbhavānsvapuraṁ yātu ratnānyādāya pārthiva ।
bharataśca sahāyārthaṁ pṛṣṭhataste 'nuyāsyati ।
7.38.5 ॥ ॥

sa tatheti nṛpaḥ kṛtvā rāghavaṁ vākyamabravīt ।
prīto 'smi bhavato rājandarśanena nayena ca ।
7.38.6 ॥ ॥

yānyetāni tu ratnāni madarthaṁ sañcitāni vai ।
duhitre tāni vai rājansarvāṇyeva dadāmi ca ।
7.38.7 ॥ ॥

evamuktvā tu kākutsthaṁ janako hṛṣṭamānasaḥ ।
prayayau mithilāṁ śrīmāṁstamanujñāya rāghavam ।
7.38.8 ॥ ॥

tataḥ prayāte janake kekayaṁ mātulaṁ prabhuḥ ।
rāghavaḥ prāñjalirbhūtvā vākyametaduvāca ha ।
7.38.9 ॥ ॥

idaṁ rājyamahaṁ caiva bharataśca salakṣmaṇaḥ ।
āyattāstvaṁ hi no rājangatiśca puruṣarṣabha ।
7.38.10 ॥ ॥

rājā hi vṛddhaḥ santāpaṁ tvadarthamupayāsyati ।
tasmādgamanamadyaiva rocate tava pārthiva ।
7.38.11 ॥ ॥

lakṣmaṇenānuyātreṇa pṛṣṭhato 'nugamiṣyate ।
dhanamādāya vipulaṁ ratnāni vividhāni ca ।
7.38.12 ॥ ॥

yudhājittu tathetyāha gamanaṁ prati rāghavam ।
ratnāni ca dhanaṁ caiva tvayyevākṣayyamastviti ।
7.38.13 ॥ ॥

pradakṣiṇaṁ sa rājānaṁ kṛtvā kekayavardhanaḥ ।
rāmeṇa hi kṛtaḥ pūrvamabhivādya pradakṣiṇam ।
7.38.14 ॥ ॥

lakṣmaṇena sahāyena prayātaḥ kekayeśvaraḥ ।
hate 'sure yathā vṛtre viṣṇunā saha vāsavaḥ ।
7.38.15 ॥ ॥

taṁ visṛjya tato rāmo vayasyamakutobhayam ।
pratardanaṁ kāśipatiṁ pariṣvajyedamabravīt ।
7.38.16 ॥ ॥

darśitā bhavatā prītirdarśitaṁ sauhṛdaṁ param ।
udyogaśca kṛto rājanbharatena tvayā saha ।
7.38.17 ॥ ॥

tadbhavānadya kāśeya purīṁ vārāṇasīṁ vraja ।
ramaṇīyāṁ tvayā guptāṁ suprakāśāṁ sutoraṇām ।
7.38.18 ॥ ॥

etāvaduktvā cotthāya kākutsthaḥ paramāsanāt ।
paryaṣvajata dharmātmā nirantaramurogatam ।
7.38.19 ॥ ॥

visarjayāmāsa tadā kausalyānandavardhanaḥ ।
rāghaveṇābhyanujñātaḥ kāśīśo 'pyakutobhayaḥ ।
vārāṇasīṁ yayau tūrṇaṁ rāghaveṇa visarjitaḥ ।
7.38.20 ॥ ॥

visṛjya taṁ kāśipatiṁ triśataṁ pṛthivīpatīn ।
prahasanrāghavo vākyamuvāca madhurākṣaram ।
7.38.21 ॥ ॥

bhavatāṁ prītiravyagrā tejasā parirakṣitā ।
dharmaśca niyato nityaṁ satyaṁ ca bhavatāṁ sadā ।
7.38.22 ॥ ॥

yuṣmākaṁ cānubhāvena tejasā ca mahātmanām ।
hato durātmā durbuddhī rāvaṇo rākṣasādhamaḥ ।
7.38.23 ॥ ॥

hetumātramahaṁ tatra bhavatāṁ tejasā hataḥ ।
rāvaṇaḥ sagaṇo yuddhe saputrāmātyabāndhavaḥ ।
7.38.24 ॥ ॥

bhavantaśca samānītā bharatena mahātmanā ।
śrutvā janakarājasya kānanāttanayāṁ hṛtām ।
7.38.25 ॥ ॥

udyuktānāṁ ca sarveṣāṁ pārthivānāṁ mahātmanām ।
kālo vyatītaḥ sumahāngamanaṁ rocayāmyataḥ ।
7.38.26 ॥ ॥

pratyūcustaṁ ca rājāno harṣeṇa mahatā vṛtāḥ ।
diṣṭyāṁ tvaṁ vijayī rāma svarājye 'pi pratiṣṭhitaḥ ।
7.38.27 ॥ ॥

diṣṭyā pratyāhṛtā sītā diṣṭyā śatruḥ parājitaḥ ।
eṣa naḥ paramaḥ kāma eṣā naḥ pītiruttamā ।
7.38.28 ॥ ॥

yattvāṁ vijayinaṁ rāma paśyāmo hataśātravam ।
7.38.29 ॥ ॥

etattvayyupapannaṁ ca yadasmāṁstvaṁ praśaṁsase ।
praśaṁsārha na jānīmaḥ praśaṁsāṁ vaktumīdṛśīm ।
7.38.30 ॥ ॥

āpṛcchāmo gamiṣyāmo hṛdistho naḥ sadā bhavān ।
vartāmahe mahābāho prītyātra mahatā vṛtāḥ ।
bhavecca te mahārāja prītirasmāsu nityadā ।
7.38.31 ॥ ॥

bāḍhamityeva rājāno harṣeṇa paramānvitāḥ ।
ucuḥ prāñjalayaḥ sarve rāghavaṁ gamanotsukāḥ ।
7.38.32 ॥ ॥

pūjitāścaiva rāmeṇa jagmurdeśānsvakānsvakān ।
7.38.33 ॥