उत्तरकाण्डम्Uttara Kāṇḍa

apṛcchata tadā rāmo dakṣiṇāśāśramaṁ munim ।
prāñjalirvinayopeta idamāha vaco 'rthavat ।
7.35.1 ॥ ॥

atulaṁ balametadvai vālino rāvaṇasya ca ।
na tvetābhyāṁ hanumatā samaṁ tviti matirmama ।
7.35.2 ॥ ॥

śauryaṁ dākṣyaṁ balaṁ dhairyaṁ prājñatā nayasādhanam ।
vikramaśca prabhāvaśca hanūmati kṛtālayāḥ ।
7.35.3 ॥ ॥

dṛṣṭvaiva sāgaraṁ vīkṣya sīdantīṁ kapivāhinīm ।
samāśvāsya mahābāhuryojanānāṁ śataṁ plutaḥ ।
7.35.4 ॥ ॥

dharṣayitvā purīṁ laṅkāṁ rāvaṇāntaḥpuraṁ tadā ।
dṛṣṭvā sambhāṣitā cāpi sītā hyāśvāsitā tathā ।
7.35.5 ॥ ॥

senāgragā mantrisutāḥ kiṅkarā rāvaṇātmajaḥ ।
ete hanumatā tatra hyekena vitipātitāḥ ।
7.35.6 ॥ ॥

bhūyo bandhādvimuktena bhāṣayitvā daśānanam ।
laṅkā bhasmīkṛtā yena pāvakeneva medinī ।
7.35.7 ॥ ॥

na kālasya na śakrasya na viṣṇorvittapasya ca ।
karmāṇi tāni śrūyante yāni yuddhe hanūmataḥ ।
7.35.8 ॥ ॥

etasya bāhuvīryeṇa laṅkā sītā ca lakṣmaṇaḥ ।
prāptā mayā jayaścaiva rājyaṁ mitrāṇi bāndhavāḥ ।
7.35.9 ॥ ॥

hanūmānyadi me naḥ syādvānarādhipateḥ sakhā ।
pravṛttimapi ko vettuṁ jānakyāḥ śaktimānbhavet ।
7.35.10 ॥ ॥

kimarthaṁ vālyanenaiva sugrīvapriyakāmyayā ।
tadā vaire samutpanne na dagdho vīrudho yathā ।
7.35.11 ॥ ॥

nahi veditavānmanye hanūmānātmano balam ।
yaddṛṣṭavāñjīviteṣṭaṁ kliśyantaṁ vānarādhipam ।
7.35.12 ॥ ॥

etanme bhagavansarvaṁ hanūmati mahāmatau ।
vistareṇa yathātattvaṁ kathayāmarapūjita ।
7.35.13 ॥ ॥

rāghavasya vacaḥ śrutvā hetuyuktamṛṣistadā ।
hanūmataḥ samakṣaṁ tamidaṁ vacanamabravīt ।
7.35.14 ॥ ॥

satyametadraghuśreṣṭha yadbravīṣi hanūmataḥ ।
na bale vidyate tulyo na gatau na matau paraḥ ।
7.35.15 ॥ ॥

amoghaśāpaiḥ śaptastu datto 'sya munibhiḥ purā ।
na vettā hi balaṁ yena balī sannirimardanaḥ ।
7.35.16 ॥ ॥

bālye 'pyetena yatkarma kṛtaṁ rāma mahābala ।
tanna varṇayituṁ śakyamiti bālatayā ' 'syate ।
7.35.17 ॥ ॥

yadi vā 'sti tvabhiprāyastacchrotuṁ tava rāghava ।
samādhāya matiṁ rāma niśāmaya vadāmyaham ।
7.35.18 ॥ ॥

sūryadattavarasvarṇaḥ sumerurnāma parvataḥ ।
yatra rājyaṁ praśāstyasya kesarī nāma vai pitā ।
7.35.19 ॥ ॥

tasya bhāryā babhūvaiṣā hyañjaneti pariśrutā ।
janayāmāsa tasyāṁ vai vāyurātmajamuttamam ।
7.35.20 ॥ ॥

śāliśūkanibhābhāsaṁ prāsūtāmuṁ tadā 'ñjanā ।
phalānyāhartukāmā vai niṣkrāntā gahanecarā ।
7.35.21 ॥ ॥

eṣa māturviyogācca kṣudhayā ca bhṛśārditaḥ ।
ruroda śiśuratyarthaṁ śiśuḥ śaravaṇe yathā ।
7.35.22 ॥ ॥

tadodyantaṁ vivasvantaṁ japāpuṣpotkaropamam ।
dadarśa phalalobhācca hyutpapāta raviṁ prati ।
7.35.23 ॥ ॥

bālārkābhimukho bālo bālārka iva mūrtimān ।
grahītukāmo bālārkaṁ plavate 'mbaramadhyagaḥ ।
7.35.24 ॥ ॥

etasminplavamāne tu śiśubhāve hanūmati ।
devadānavayakṣāṇāṁ vismayaḥ sumahānabhūt ।
7.35.25 ॥ ॥

nāpyevaṁ vegavānvāyurgaruḍo vā manastathā ।
yathā 'yaṁ vāyuputrastu kramate 'mbaramuttamam ।
7.35.26 ॥ ॥

yadi tāvacchiśorasya tvīdṛśo gativikramaḥ ।
yauvanaṁ balamāsādya kathaṁ vego bhaviṣyati ।
7.35.27 ॥ ॥

tamanuplavate vāyuḥ plavantaṁ putramātmanaḥ ।
sūryadāhabhayādrakṣaṁstuṣāracayaśītalaḥ ।
7.35.28 ॥ ॥

bahuyojanasāhasraṁ kramatyeṣa gatombaram ।
piturbalācca bālyācca bhāskarābhyāśamāgataḥ ।
7.35.29 ॥ ॥

śiśureṣa tvadoṣajña iti matvā divākaraḥ ।
kāryaṁ cātra samāyattamityevaṁ na dadāha saḥ ।
7.35.30 ॥ ॥

yameva divasaṁ hyeṣa grahītuṁ bhāskaraṁ plutaḥ ।
tameva divasaṁ rāhurjighṛkṣati divākaram ।
7.35.31 ॥ ॥

anena sa parāmṛṣṭo rāma sūryarathopari ।
apakrāntastatastrasto rāhuścandrārkamardanaḥ ।
7.35.32 ॥ ॥

sa indrabhavanaṁ gatvā saroṣaḥ siṁhikāsutaḥ ।
abravīdbhrukuṭiṁ kṛtvā devaṁ devagaṇairvṛtam ।
7.35.33 ॥ ॥

bubhukṣāpanayaṁ dattvā candrārkau mama vāsava ।
kimidaṁ tattvayā dattamanyasya balavṛtrahan ।
7.35.34 ॥ ॥

adyāhaṁ parvakāle tu jighṛkṣuḥ sūryamāgataḥ ।
athānyo rāhurāsādya jagrāha sahasā ravim ।
7.35.35 ॥ ॥

sa rāhorvacanaṁ śrutvā vāsavaḥ sambhramānvitaḥ ।
utpapātāsanaṁ hitvā codvahankāñcanīṁ srajam ।
7.35.36 ॥ ॥

tataḥ kailāsakūṭābhaṁ caturdantaṁ madasravam ।
śṛṅgāradhāriṇaṁ prāṁśuṁ svarṇaghaṇṭāṭṭahāsinam ।
7.35.37 ॥ ॥

indraḥ karīndramāruhya rāhuṁ kṛtvā puraḥsaram ।
prāyādyatrābhavatsūryaḥ sahānena hanūmatā ।
7.35.38 ॥ ॥

athātirabhasenāgādrāhurutsṛjya vāsavam ।
anena ca sa vai dṛṣṭaḥ pradhāvañchailakūṭavat ।
7.35.39 ॥ ॥

tataḥ sūryaṁ samutsṛjya rāhuṁ phalamavekṣya ca ।
utpapāta punarvyoma grahītuṁ siṁhikāsutam ।
7.35.40 ॥ ॥

utsṛjyārkamimaṁ rāma pradhāvantaṁ plavaṅgamam ।
avekṣyaivaṁ parāvṛttya mukhaśeṣaḥ parāṅmukhaḥ ।
7.35.41 ॥ ॥

indramāśaṁsamānastu trātāraṁ siṁhikāsutaḥ ।
indra indreti saṁtrāsānmuhurmahurabhāṣata ।
7.35.42 ॥ ॥

rāhorvikrośamānasya prāgevālakṣitaṁ svaram ।
śrutvendrovāca mā bhaiṣīrahamenaṁ niṣūdaye ।
7.35.43 ॥ ॥

airāvataṁ tato dṛṣṭvā mahattadidamityapi ।
phalaṁ matvā hastirājamabhidudrāva mārutiḥ ।
7.35.44 ॥ ॥

tathāsya dhāvato rūpamairāvatajighṛkṣayā ।
muhūrtamabhavadghoramindrāgnyoriva bhāsvaram ।
7.35.45 ॥ ॥

evamādhāvamānaṁ tu nātikruddhaḥ śacīpatiḥ ।
hastāntādatimuktena kuliśenābhyatāḍayat ।
7.35.46 ॥ ॥

tato girau papātaiṣa indravajrābhitāḍitaḥ ।
patamānasya caitasya vāmo hanurabhajyata ।
7.35.47 ॥ ॥

tasmiṁstu patite bāle vajratāḍanavihvale ।
cukrodhendrāya pavanaḥ prajānāmahitāya saḥ ।
7.35.48 ॥ ॥

pracāraṁ sa tu saṅgṛhya prajāsvantargataḥ prabhuḥ ।
guhāṁ praviṣṭaḥ svasutaṁ śiśumādāya mārutaḥ ।
7.35.49 ॥ ॥

viṇmūtrāśayamāvṛtya prajānāṁ paramārtikṛt ।
rurodha sarvabhūtāni yathā varṣāṇi vāsavaḥ ।
7.35.50 ॥ ॥

vāyuprakopādbhūtāni nirucchvāsāni sarvataḥ ।
sandhibhirbhidyamānaiśca kāṣṭhabhūtāni jajñire ।
7.35.51 ॥ ॥

niḥsvādhyāyavaṣaṭkāraṁ niṣkriyaṁ dharmavarjitam ।
vāyuprakopātऺtrailokyaṁ nirayasthamivābhavat ।
7.35.52 ॥ ॥

tataḥ prajāḥ sagandharvāḥ sadevāsuramānuṣāḥ ।
prajāpatiṁ samādhāvanduḥkhitāśca sukhecchayā ।
7.35.53 ॥ ॥

ūcuḥ prāñjalayo devā mahodaranibhodarāḥ ।
tvayā nu bhagavansṛṣṭāḥ prajānātha caturvidhāḥ ।
7.35.54 ॥ ॥

tvayā datto 'yamasmākamāyuṣaḥ pavanaḥ patiḥ ।
so 'smānprāṇeśvaro bhūtvā kasmādeṣo 'dya sattama ।
7.35.55 ॥ ॥

rurodha duḥkhaṁ janayannantaḥpura iva striyaḥ ।
tasmāttvāṁ śaraṇaṁ prāptā vāyunohatā vayam ।
7.35.56 ॥ ॥

etatprajānāṁ śrutvā tu prajānāthaḥ prajāpatiḥ ।
kāraṇāditi coktvāsau prajāḥ punarabhāṣata ।
7.35.57 ॥ ॥

yasmiṁśca kāraṇe vāyuścukrodha ca rurodha ca ।
prajāḥ śṛṇudhvaṁ tatsarvaṁ śrotavyaṁ cātmanaḥ kṣamam ।
7.35.58 ॥ ॥

putrastasyāmareśena indreṇādya nipātitaḥ ।
rāhorvacanamāsthāya tataḥ sa kupito 'nilaḥ ।
7.35.59 ॥ ॥

aśarīraḥ śarīreṣu vāyuścarati pālayan ।
śarīraṁ hi vinā vāyuṁ samatāṁ yāti dārubhiḥ ।
7.35.60 ॥ ॥

vāyuḥ prāṇaḥ sukhaṁ vāyurvāyuḥ sarvamidaṁ jagat ।
vāyunā samparityaktaṁ na sukhaṁ vindate jagat ।
7.35.61 ॥ ॥

adyaiva ca parityaktaṁ vāyunā jagadāyuṣā ।
adyaiva te nirucchvāsāḥ kāṣṭhakuḍyopamāḥ sthitāḥ ।
7.35.62 ॥ ॥

tadyāmastatra yatrāste māruto rukprado hi naḥ ।
mā vināśaṁ gamiṣyāma aprasādyāditeḥ sutāḥ ।
7.35.63 ॥ ॥

tataḥ prajābhiḥ sahitaḥ prajāpatiḥ sadevagandharvabhujaṅgaguhyakaiḥ ।
jagāma tatrāsyati yatra mārutaḥ sutaṁ surendrābhihataṁ pragṛhya saḥ ।
7.35.64 ॥ ॥

tato 'rkavaiśvānarakāñcanaprabhaṁ sutaṁ tadotsaṅgagataṁ sadāgateḥ ।
caturmukho vīkṣya kṛpāmathākarotsadevagandharvarṣiyakṣarākṣasaiḥ ।
7.35.65 ॥