उत्तरकाण्डम्Uttara Kāṇḍa

arjunena vimuktastu rāvaṇo rākṣasādhipaḥ ।
cacāra pṛthivīṁ sarvāmanirviṇṇastathā kṛtaḥ ।
7.34.1 ॥ ॥

rākṣasaṁ vā manuṣyaṁ vā śṛṇute 'yaṁ balādhikam ।
rāvaṇastaṁ samāsādya yuddhe hvayati darpitaḥ ।
7.34.2 ॥ ॥

tataḥ kadācitkiṣkindhāṁ nagarīṁ vālipālitām ।
gatvā hvayati yuddhāya vālinaṁ hemamālinam ।
7.34.3 ॥ ॥

tatastu vānarāmātyastārastārāpitā prabhuḥ ।
uvāca vānaro vākyaṁ yuddhaprepsumupāgatam ।
7.34.4 ॥ ॥

rākṣasenda gato vālī yaste pratibalo bhavet ।
ko 'nyaḥ pramukhataḥ sthātuṁ tava śaktaḥ plavaṅgamaḥ ।
7.34.5 ॥ ॥

caturbhyo 'pi samudrebhyaḥ sandhyāmanvāsya rāvaṇa ।
imaṁ muhūrtamāyāti vālī tiṣṭha muhūrtakam ।
7.34.6 ॥ ॥

etānasthicayānpaśya ya ete śaṅkhapāṇḍurāḥ ।
yuddhārthināmime rājanvānarādhipatejasā ।
7.34.7 ॥ ॥

yadvā 'mṛtarasaḥ pītastvayā rāvaṇa rākṣasa ।
tadā vālinamāsādya tadantaṁ tava jīvitam ।
7.34.8 ॥ ॥

paśyedānīṁ jagaccitramimaṁ viśravasaḥ suta ।
idaṁ muhūrtaṁ tiṣṭhasva durlabhaṁ te bhaviṣyati ।
7.34.9 ॥ ॥

athavā tvarase martuṁ gaccha dakṣiṇasāgaram ।
vālinaṁ drakṣyase tatra bhūmisthamiva pāvakam ।
7.34.10 ॥ ॥

sa tu tāraṁ vinirbhartsya rāvaṇo lokarāvaṇaḥ ।
puṣpakaṁ tatsamāruhya prayayau dakṣiṇārṇavam ।
7.34.11 ॥ ॥

tatra hemagiriprakhyaṁ taruṇārkanibhānanam ।
rāvaṇo vālinaṁ dṛṣṭvā sandhyopāsanatatparam ।
7.34.12 ॥ ॥

puṣpakādavaruhyātha rāvaṇo 'ñjanasannibhaḥ ।
grahītuṁ vālinaṁ tūrṇaṁ niḥśabdapadamāvrajat ।
7.34.13 ॥ ॥

yadṛcchayā tadā dṛṣṭo vālināpi sa rāvaṇaḥ ।
pāpābhiprāyavān dṛṣṭvā cakāra na tu sambhramam ।
7.34.14 ॥ ॥

śaśamālakṣya siṁho vā pannagaṁ garuḍo yathā ।
na cintayati taṁ vālī rāvaṇaṁ pāpaniścayam ।
7.34.15 ॥ ॥

jighṛkṣamāṇamāyāntaṁ rāvaṇaṁ pāpacetasam ।
kakṣāvalambinaṁ kṛtvā gamiṣye trīnmahārṇavān ।
7.34.16 ॥ ॥

drakṣyantyariṁ mamāṅkasthaṁ sraṁsadūrukarāmbaram ।
lambamānaṁ daśagrīvaṁ garuḍasyeva pannagam ।
7.34.17 ॥ ॥

ityevaṁ matimāsthāya vālī karṇamupāśritaḥ ।
japanvai naigamānmantrāṁstasthau parvatarāḍiva ।
7.34.18 ॥ ॥

tāvanyonyaṁ jighṛkṣantau harirākṣasapārthivau ।
prayatnavantau tatkarma īhaturbaladarpitau ।
7.34.19 ॥ ॥

hastagrāhaṁ tu taṁ matvā pādaśabdena rāvaṇam ।
parāṅmukho 'pi jagrāha vālī sarpamivāṇḍajaḥ ।
7.34.20 ॥ ॥

grahītukāmaṁ taṁ gṛhya rakṣasāmīśvaraṁ hariḥ ।
khamutpapāta vegena kṛtvā kakṣāvalambinam ।
7.34.21 ॥ ॥

taṁ cāpīḍayamānaṁ tu vitudantaṁ nakhairmuhuḥ ।
jahāra rāvaṇaṁ vālī pavanastoyadaṁ yathā ।
7.34.22 ॥ ॥

atha te rākṣasāmātyā hriyamāṇaṁ daśānanam ।
mumokṣayiṣavo vāliṁ ravamāṇā abhidrutāḥ ।
7.34.23 ॥ ॥

anvīyamānastairvālī bhrājate 'mbaramadhyagaḥ ।
anvīyamāno meghaughairambarastha ivāṁśumān ।
7.34.24 ॥ ॥

te 'śaknuvantaḥ samprāptuṁ vālinaṁ rākṣasottamāḥ ।
tasya bāhūruvegena pariśrāntā vyavasthitāḥ ।
7.34.25 ॥ ॥

vālimārgādapākrāmanparvatendro hi gacchataḥ ।
kiṁ punarjīvitaprepsurbibhradvai māṁsaśoṇitam ।
7.34.26 ॥ ॥

apakṣigaṇasampātānvānarendro mahājavaḥ ।
kramaśaḥ sāgarānsarvānsandhyākālamavandata ।
7.34.27 ॥ ॥

sabhājyamāno bhūtaistu khaicaraiḥ khaicarottamaḥ ।
paścimaṁ sāgaraṁ vālī hyājagāma sarāvaṇaḥ ।
7.34.28 ॥ ॥

tasminsandhyāmupāsitvā snātvā japtvā ca vānaraḥ ।
uttaraṁ sāgaraṁ prāyādvahamāno daśānanam ।
7.34.29 ॥ ॥

bahuyojanasāhasraṁ vahamāno mahāhariḥ ।
vāyuvacca manovacca jagāma saha śatruṇā ।
7.34.30 ॥ ॥

uttare sāgare sandhyāmupāsitvā daśānanam ।
vahamāno 'gamadvālī pūrvaṁ vai sa mahodadhim ।
7.34.31 ॥ ॥

tatrāpi sandhyāmanvāsya vāsaviḥ saharīśvaraḥ ।
kiṣkindhāmabhito gṛhya rāvaṇaṁ punarāgamat ।
7.34.32 ॥ ॥

caturṣvapi samudreṣu sandhyāmanvāsya vānaraḥ ।
rāvaṇodvahanaśrāntaḥ kiṣkindhopavane 'patat ।
7.34.33 ॥ ॥

rāvaṇaṁ tu mumocātha svakakṣātkapisattamaḥ ।
kutastvamiti covāca prahasanrāvaṇaṁ muhuḥ ।
7.34.34 ॥ ॥

vismayaṁ tu mahadgatvā śramalolanirīkṣaṇaḥ ।
rākṣasendro harīndraṁ tamidaṁ vacanamabravīt ।
7.34.35 ॥ ॥

vānarendra mahendrābha rākṣasendro 'smi rāvaṇaḥ ।
yuddhepsuriha samprāptaḥ sa cādyāsāditastvayā ।
7.34.36 ॥ ॥

aho balamaho vīryamaho gāmbhīryameva ca ।
yenāhaṁ paśuvadgṛhya bhrāmitaścaturo 'rṇavān ।
7.34.37 ॥ ॥

evamaśrāntavadvīra śīghrameva mahārṇavān ।
māṁ caivodvahamānastu ko 'nyo vīraḥ kramiṣyati ।
7.34.38 ॥ ॥

trayāṇāmeva bhūtānāṁ gatireṣā plavaṅgama ।
manonilasuparṇānāṁ tava cātra na saṁśayaḥ ।
7.34.39 ॥ ॥

so 'haṁ dṛṣṭabalastubhyamicchāmi haripuṅgava ।
tvayā saha ciraṁ sakhyaṁ susnigdhaṁ pāvakāgrataḥ ।
7.34.40 ॥ ॥

dārāḥ putrāḥ puraṁ rāṣṭraṁ bhogācchādanabhojanam ।
sarvamevāvibhaktaṁ nau bhaviṣyati harīśvara ।
7.34.41 ॥ ॥

tataḥ prajvālayitvāgniṁ tāvubhau harīrākṣasau ।
bhrātṛtvamupasampannau pariṣvajya parasparam ।
7.34.42 ॥ ॥

anyonyaṁ lambitakarau tatastau harirākṣasau ।
kiṣkindhāṁ viśaturhṛṣṭau siṁhau giriguhāmiva ।
7.34.43 ॥ ॥

sa tatra māsamuṣitaḥ sugrīva iva rāvaṇaḥ ।
amātyairāgatairnītastrailokyotsādanārthibhiḥ ।
7.34.44 ॥ ॥

evametatpurāvṛttaṁ vālinā rāvaṇaḥ prabho ।
dharṣitaśca kṛtaścāpi bhrātā pāvakasannidhau ।
7.34.45 ॥ ॥

balamapratimaṁ rāma vālino 'bhavaduttamam ।
so 'pi tvayā vinirdagdhaḥ śalabho vahninā yathā ।
7.34.46 ॥