उत्तरकाण्डम्Uttara Kāṇḍa

narmadāpuline yatra rākṣasendraḥ sudāruṇaḥ ।
puṣpopahāraṁ kurute tasmāddeśādadūrataḥ ।
7.32.1 ॥ ॥

arjuno jayatāṁ śreṣṭho māhiṣmatyāḥ patiḥ prabhuḥ ।
krīḍate saha nārībhirnarmadātoyamāśritaḥ ।
7.32.2 ॥ ॥

tāsāṁ madhyagato rājā rarāja ca tadārjunaḥ ।
kareṇūnāṁ sahasrasya madhyastha iva kuñjaraḥ ।
7.32.3 ॥ ॥

jijñāsuḥ sa tu bāhūnāṁ sahasrasyottamaṁ balam ।
rurodha narmadāvegaṁ bāhubhirbahubhirvṛtaḥ ।
7.32.4 ॥ ॥

kārtavīryabhujāsaktaṁ tajjalaṁ prāpya nirmalam ।
kūlopahāraṁ kurvāṇaṁ pratisrotaḥ pradhāvati ।
7.32.5 ॥ ॥

samīnanakramakaraḥ sapuṣpakuśasaṁstaraḥ ।
sa narmadāmbhaso vegaḥ prāvṛṭkāla ivābabhau ।
7.32.6 ॥ ॥

sa vegaḥ kārtavīryeṇa sampreṣita ivāmbhasaḥ ।
puṣpopahāraṁ sakalaṁ rāvaṇasya jahāra ha ।
7.32.7 ॥ ॥

rāvaṇo 'rdhasamāptaṁ tamutsṛjya niyamaṁ tadā ।
narmadāṁ paśyate kāntāṁ pratikūlāṁ yathā priyām ।
7.32.8 ॥ ॥

paścimena tu taṁ dṛṣṭvā sāgarodgārasannibham ।
vardhantamambhaso vegaṁ pūrvāmāśāṁ praviśya tu ।
7.32.9 ॥ ॥

tato 'nubhrāntaśakunāṁ svabhāvoparame sthitām ।
nirvikārāṅganābhāsāmapaśyadrāvaṇo nadīm ।
7.32.10 ॥ ॥

savyetarakarāṅgulyā saśabdaṁ ca daśānanaḥ ।
vegaprabhāvamanveṣṭuṁ so 'diśacchukasāraṇau ।
7.32.11 ॥ ॥

tau tu rāvaṇasandiṣṭau bhrātarau śukasāraṇau ।
vyomāntaragatau vīrau prasthitau paścimāmukhau ।
7.32.12 ॥ ॥

ardhayojanamātraṁ tu gatvā tau rajanīcarau ।
paśyetāṁ puruṣaṁ toye krīḍantaṁ sahayoṣitam ।
7.32.13 ॥ ॥

bṛhatsālapratīkāśaṁ toyavyākulamūrdhajam ।
madaraktāntanayanaṁ madavyākulatejasam ।
7.32.14 ॥ ॥

nadīṁ bāhusahasreṇa rundhantamarimardanam ।
giriṁ pādasahasreṇa rundhantamiva medinīm ।
7.32.15 ॥ ॥

bālānāṁ varanārīṇāṁ sahasreṇa samāvṛtam ।
samadānāṁ kareṇūnāṁ sahasreṇeva kuñjaram ।
7.32.16 ॥ ॥

tamadbhutatamaṁ dṛṣṭvā rākṣasau śukasāraṇau ।
sannivṛttāvupāgamya rāvaṇaṁ tamathocatuḥ ।
7.32.17 ॥ ॥

bṛhatsālapratīkāśaḥ ko 'pyasau rākṣaseśvara ।
narmadāṁ rodhavadruddhvā krīḍāpayati yoṣitaḥ ।
7.32.18 ॥ ॥

tena bāhusahasreṇa sanniruddhajalā nadī ।
sāgarodgārasaṅkāśānudgārānsṛjate muhuḥ ।
7.32.19 ॥ ॥

ityevaṁ bhāṣamāṇau tau niśāmya śukasāraṇau ।
rāvaṇo 'rjuna ityuktvā prayayau yuddhalālasaḥ ।
7.32.20 ॥ ॥

arjunābhimukhe tasminrāvaṇe rākṣasādhipe ।
caṇḍaḥ pravāti pavanaḥ sanādaḥ surajāstathā ।
7.32.21 ॥ ॥

sakṛdeva kṛto rāvaḥ saraktaḥ preṣito ghanaiḥ ।
mahodaramahāpārśvadhūmrākṣaśukasāraṇaiḥ ।
7.32.22 ॥ ॥

saṁvṛto rākṣasendrastu tatrāgādyatra cārjunaḥ ।
adīrgheṇaiva kālena sa tadā rākṣaso balī ।
taṁ narmadāhradaṁ bhīmamājagāmāñjanaprabhaḥ ।
7.32.23 ॥ ॥

sa tatra strīparivṛtaṁ vāśitābhiriva dvipam ।
narendraṁ paśyate rājā rākṣasānāṁ tadārjunam ।
7.32.24 ॥ ॥

sa roṣādraktanayano rākṣasendro baloddhataḥ ।
7.32.25 ॥ ॥

ityevamarjunāmātyanāha gambhīrayā girā ।
amātyāḥ kṣipramākhyāta haihayasya nṛpasya vai ।
7.32.26 ॥ ॥

yuddhārthī samanuprāpto rāvaṇo nāma rākṣasaḥ ।
rāvaṇasya vacaḥ śrutvā mantriṇo 'thārjunasya te ।
uttasthuḥ sāyudhāstrāśca rāvaṇaṁ vākyamabruvan ।
7.32.27 ॥ ॥

yuddhasya kālo vijñeyaḥ sādhu bhoḥ sādhu rāvaṇa ।
7.32.28 ॥

caḥ śrutvā mantriṇo 'thārjunasya te ।
yaḥ kṣībaṁ strīvṛtaṁ caiva yoddhumutsahate nṛpam ।
strīsamakṣaṁ kathaṁ yattadyoddhumutsahase 'rjunam ।
vāśitāmadhyagaṁ mattaṁ śārdūla iva kuñjaram ।
7.32.29 ॥ ॥

kṣamasvādya daśagrīva coṣyatāṁ rajanī tvayā ।
yuddhe śraddhā ca yadyasti śvastāta samare 'rjunam ।
7.32.30 ॥ ॥

yadyadyāsti matiryoddhuṁ yuddhatṛṣṇāsamāvṛtā ।
nihatyāsmāṁstato yuddhamarjunenopayāsyasi ।
7.32.31 ॥ ॥

tataste rāvaṇāmātyairamātyāḥ pārthivasya tu ।
sūditāścāpi te yuddhe bhakṣitāśca bubhukṣitaiḥ ।
7.32.32 ॥ ॥

tato halahalāśabdo narmadātīra ābabhau ।
arjunasyānuyāta'ṇāṁ rāvaṇasya ca mantriṇām ।
7.32.33 ॥ ॥

iṣubhistomaraiḥ śūlaistriśūlairvajrakarṣaṇaiḥ ।
sarāvaṇānardayantaḥ samantātsamabhidrutāḥ ।
7.32.34 ॥ ॥

haihayādhipayodhānāṁ vega āsītsudāruṇaḥ ।
sanakramīnamakarasamudrasyeva niḥsvanaḥ ।
7.32.35 ॥ ॥

rāvaṇasya tu te 'mātyāḥ prahastaśukasāraṇāḥ ।
kārtavīryabalaṁ kruddhā nirdahanti sma tejasā ।
7.32.36 ॥ ॥

arjunāya tu tatkarma rāvaṇasya samantriṇaḥ ।
krīḍamānāya kathitaṁ puruṣairdvārarakṣibhiḥ ।
7.32.37 ॥ ॥

śrutvā na bhetavyamiti strījanaṁ taṁ tato 'rjunaḥ ।
uttatāra jalāttasmādgaṅgātoyādivāñjanaḥ ।
7.32.38 ॥ ॥

krodhadūṣitanetrastu sa tato 'rjunapāvakaḥ ।
prajajvāla mahāghoro yugānta iva pāvakaḥ ।
7.32.39 ॥ ॥

sa tūrṇataramādāya varahemāṅgado gadām ।
abhidudrāva rakṣāṁsi tamāṁsīva divākaraḥ ।
7.32.40 ॥ ॥

bāhuvikṣepakaraṇāṁ samudyamya mahāgadām ।
gāruḍaṁ vegamāsthāya cāpapātaiva so 'rjunaḥ ।
7.32.41 ॥ ॥

tasya mārgaṁ samāruddhya vindhyo 'rkasyeva parvataḥ ।
sthito vindhya ivākampyaḥ prahasto musalāyudhaḥ ।
7.32.42 ॥ ॥

tato 'sya musalaṁ ghoraṁ lohabaddhaṁ mahoddhataḥ ।
prahastaḥ preṣayankruddho rarāsa ca yathāmbudaḥ ।
7.32.43 ॥ ॥

tasyāgre musalasyāgniraśokāpīḍasannibhaḥ ।
prahastakaramuktasya babhūva pradahanniva ।
7.32.44 ॥ ॥

athāyāntaṁ tu musalaṁ kārtavīryastadārjunaḥ ।
nipuṇaṁ vañcayāmāsa sagado 'gadavikramaḥ ।
7.32.45 ॥ ॥

tatastamabhidudrāva prahastaṁ haihayādhipaḥ ।
bhrāmayāno gadāṁ gurvīṁ pañcabāhuśatocchrayām ।
7.32.46 ॥ ॥

tathā hato 'tivegena prahasto gadayā tadā ।
nipapāta sthitaḥ śailo vajrivajrahato yathā ।
7.32.47 ॥ ॥

prahastaṁ patitaṁ dṛṣṭvā mārīcaśukasāraṇāḥ ।
samahodaradhūmrākṣā hyapasṛṣṭā raṇājirāt ।
7.32.48 ॥ ॥

apakrānteṣvamātyeṣu prahaste vai nipātite ।
rāvaṇo 'bhyadravattūrṇamarjunaṁ nṛpasattamam ।
7.32.49 ॥ ॥

sahasrabāhostadyuddhaṁ viṁśadbāhośca dāruṇam ।
nṛparākṣasayostatra cārabdhaṁ romaharṣaṇam ।
7.32.50 ॥ ॥

sāgarāviva saṁrabdhau calanmūlāvivācalau ।
tejoyuktāvivādityau pradahantāvivānalau ।
7.32.51 ॥ ॥

baloddhatau yathā nāgau vāśitārthe yathā vṛṣau ।
meghāviva vinardantau siṁhāviva balotkaṭau ।
7.32.52 ॥ ॥

rudrakālāviva kruddhau tadā tau rākṣasārjunau ।
parasparaṁ gadābhyāṁ tau tāḍayāmāsaturbhṛśam ।
7.32.53 ॥ ॥

vajraprahārānacalā yathā ghorānviṣehire ।
gadāprahārāṁstau tatra sehāte nararākṣasau ।
7.32.54 ॥ ॥

yathā ' śaniravebhyastu jāyate 'tha pratiśrutiḥ ।
tathā tayorgadāpothairdiśaḥ sarvāḥ pratiśrutāḥ ।
7.32.55 ॥ ॥

arjunasya gadā sā tu pātyamānā 'hitorasi ।
kāñcanābhaṁ nabhaścakre vidyutsaudāminī yathā ।
7.32.56 ॥ ॥

tathaiva rāvaṇenāpi pātyamānā muhurmuhuḥ ।
arjunorasi nirbhāti gadolkeva mahāgirau ।
7.32.57 ॥ ॥

nārjunaḥ khedamāyāti na rākṣasagaṇeśvaraḥ ।
idamāsīttayoryuddhaṁ yathā pūrvaṁ balīndrayoḥ ।
7.32.58 ॥ ॥

śṛṅgairiva vṛṣāyudhyandantāgrairiva kuñjarau ।
parasparaṁ tau nighnantau nararākṣasasattamau ।
7.32.59 ॥ ॥

tato 'rjunena kruddhena sarvaprāṇena sā gadā ।
stanayorantare muktā rāvaṇasya mahorasi ।
7.32.60 ॥ ॥

varadānakṛtatrāṇe sā gadā rāvaṇorasi ।
durbaleva yathāvegaṁ dvidhābhūtvā 'patatkṣitau ।
7.32.61 ॥ ॥

sa tvarjunapramuktena gadāpātena rāvaṇaḥ ।
apāsarpaddhanurmātraṁ niṣasāda ca niṣṭanan ।
7.32.62 ॥ ॥

sa vihvalaṁ tadālakṣya daśagrīvaṁ tato 'rjunaḥ ।
sahasotpatya jagrāha garutmāniva pannagam ।
7.32.63 ॥ ॥

sa tu bāhusahasreṇa balādgṛhya daśānanam ।
babandha balavānrājā baliṁ nārāyaṇo yathā ।
7.32.64 ॥ ॥

badhyamāne daśagrīve siddhacāraṇadevatāḥ ।
sādhvītivādinaḥ puṣpaiḥ kirantyarjunamūrdhani ।
7.32.65 ॥ ॥

vyāghro mṛgamivādāya mṛgarāḍiva dantinam ।
nanāda haihayo rājā harṣādambudavanmuhuḥ ।
7.32.66 ॥ ॥

prahastastu samāśvasto dṛṣṭvā baddhaṁ daśānanam ।
saha tai rākṣasaiḥ kruddhaścābhidudrāva pārthivam ।
7.32.67 ॥ ॥

naktañcarāṇāṁ vegastu teṣāmāpatatāṁ babhau ।
udbhūta ātapāpāye payodānāmivāmbudhau ।
7.32.68 ॥ ॥

muñca muñceti bhāṣantastiṣṭhatiṣṭheti cāsakṛt ।
musalāni saśūlāni sotsasarja tadārjune ।
7.32.69 ॥ ॥

aprāptānyeva tānyāśu asambhrāntastadārjunaḥ ।
āyudhānyamarārīṇāṁ jagrāhāriniṣūdanaḥ ।
7.32.70 ॥ ॥

tatastaireva rakṣāṁsi durdharaiḥ pravarāyudhaiḥ ।
bhittvā vidrāvayāmāsa vāyurambudharāniva ।
7.32.71 ॥ ॥

rākṣasāṁstrāsayitvā tu kārtavīryo 'rjunastadā ।
rāvaṇaṁ gṛhya nagaraṁ praviveśa suhṛdvṛtaḥ ।
7.32.72 ॥ ॥

sa kīryamāṇaḥ kusumākṣatotkarairdvijaiḥ sapauraiḥ puruhūtasannibhaḥ ।
tadā 'rjunaḥ sampraviveśa tāṁ purīṁ baliṁ nigṛhyeva sahasralocanaḥ ।
7.32.73 ॥