उत्तरकाण्डम्Uttara Kāṇḍa

tato rāmo mahātejā vismayātpunareva hi ।
uvāca praṇato vākyamagastyamṛṣisattamam ।
7.31.1 ॥ ॥

bhagavanrākṣasaḥ krūro yadāprabhṛti medinīm ।
paryaṭatkiṁ tadā lokāḥ śūnyā āsandvijottama ।
7.31.2 ॥ ॥

rājā vā rājamātro vā kiṁ tadā nātra kaścana ।
dharṣaṇaṁ yatra na prāpto rāvaṇo rākṣaseśvaraḥ ।
7.31.3 ॥ ॥

utāho hatavīryāste babhūvuḥ pṛthivīkṣitaḥ ।
bahiṣkṛtā varāstraiśca bahavo nirjitā nṛpāḥ ।
7.31.4 ॥ ॥

rāghavasya vacaḥ śrutvā hyagastyo bhagavānṛṣiḥ ।
uvāca rāmaṁ prahasanpitāmaha iveśvaram ।
7.31.5 ॥ ॥

ityevaṁ bādhamānastu pārthivānpārthivarṣabha ।
cacāra rāvaṇo rāma pṛthivīṁ pṛthivīpate ।
7.31.6 ॥ ॥

tato māhiṣmatīṁ nāma purīṁ svargapurīprabhām ।
samprāpto yatra sānnidhyaṁ sadāsīdvasuretasaḥ ।
7.31.7 ॥ ॥

tulya āsīnnṛpastasya prabhāvādvasuretasaḥ ।
arjuno nāma yatrāgniḥ śarakuṇḍeśayaḥ sadā ।
7.31.8 ॥ ॥

tameva divasaṁ so 'tha haihayādhipatirbalī ।
arjuno narmadāṁ rantuṁ gataḥ strībhiḥ saheśvaraḥ ।
7.31.9 ॥ ॥

tameva divasaṁ so 'tha rāvaṇastatra āgataḥ ।
rāvaṇo rākṣasendrastu tasyāmātyānapṛcchata ।
7.31.10 ॥ ॥

kvārjuno nṛpatiḥ śīghraṁ samyagākhyātumarhatha ।
rāvaṇo 'hamanuprāpto yuddhepsurnṛvareṇa ha ।
mamāgamanamapyagre yuṣmābhiḥ sannivedyatām ।
7.31.11 ॥ ॥

ityevaṁ rāvaṇenoktāste 'mātyāḥ suvipaścitaḥ ।
abruvanrākṣasapatimasānnidhyaṁ mahīpateḥ ।
7.31.12 ॥ ॥

śrutvā viśravasaḥ putraḥ paurāṇāmarjunaṁ gatam ।
apasṛtyāgato vindhyaṁ himavatsannibhaṁ girim ।
7.31.13 ॥ ॥

sa tamabhramivāviṣṭamudbhrantamiva medinīm ।
apaśyadrāvaṇo vindhyamālikhantamivāmbaram ।
7.31.14 ॥ ॥

sahasraśikharopetaṁ siṁhādhyuṣitakandaram ।
prapātapatitaistoyaiḥ sāṭṭahāsamivāmbudhim ।
7.31.15 ॥ ॥

devadānavagandharvaiḥ sāpsarogaṇakinnaraiḥ ।
svastrībhiḥ krīḍamānaiśca svargabhūtaṁ mahocchrayam ।
7.31.16 ॥ ॥

nadībhiḥ syandamānābhiḥ sphaṭikapratimaṁ jalam ।
phaṇābhiścalajihvābhiranantamiva viṣṭhitam ।
7.31.17 ॥ ॥

utkrāmantaṁ darīvantaṁ himavatsannibhaṁ girim ।
paśyamānastato vindhyaṁ rāvaṇo narmadāṁ yayau ।
7.31.18 ॥ ॥

calopalajalāṁ puṇyāṁ paścimodadhigāminīm ।
7.31.19 ॥ ॥

mahiṣaiḥ sṛmaraiḥ siṁhaiḥ śārdūlarkṣagajottamaiḥ ।
uṣṇābhitaptaistṛṣitaiḥ saṅkṣobhitajalāśayām ।
7.31.20 ॥ ॥

cakravākaiḥ sakāraṇḍaiḥ sahaṁsajalakukkuṭaiḥ ।
sārasaiśca sadā mattaiḥ sukūjadbhiḥ samāvṛtām ।
7.31.21 ॥ ॥

phulladrumakṛtottaṁsāṁ cakravākayugastanīm ।
vistīrṇapulinaśroṇīṁ haṁsāvalisumekhalām ।
7.31.22 ॥ ॥

puṣpareṇvanuliptāṅgīṁ jalaphenāmalāṁśukām ।
jalāvagāhasaṁsparśāṁ phullotpalaśubhekṣaṇām ।
puṣpakādavaruhyāśu narmadāṁ saritāṁ varām ।
7.31.23 ॥ ॥

iṣṭāmiva varāṁ nārīmavagāhya daśānanaḥ ।
sa tasyāḥ puline ramye nānāmuniniṣevite ।
7.31.24 ॥ ॥

upopaviṣṭaiḥ sacivaiḥ sārdhaṁ rākṣasapuṅgavaḥ ।
prakhyāya narmadāṁ so 'tha gaṅgeyamiti rāvaṇaḥ ।
7.31.25 ॥ ॥

narmadādarśajaṁ harṣamāptavān rākṣasādhipaḥ ।
uvāca sacivāṁstatra salīlaṁ śukasāraṇau ।
7.31.26 ॥ ॥

eṣa raśmisahasreṇa jagatkṛtvaiva kāñcanam ।
tīkṣṇatāpakaraḥ sūryo nabhaso 'rdhaṁ samāśritaḥ ।
7.31.27 ॥ ॥

māmāsīnaṁ viditvaiva candrāyati divākaraḥ ।
7.31.28 ॥ ॥

narmadājalaśītaśca sugandhiḥ śramanāśanaḥ ।
madbhayādanilo 'pyatra vātyeṣa susamāhitaḥ ।
7.31.29 ॥ ॥

iyaṁ vāpi saricchreṣṭhā narmadā narmavardhinī ।
nakramīnavihaṅgormiḥ sabhayevāṅganā sthitā ।
7.31.30 ॥ ॥

tadbhavantaḥ kṣatāḥ śastrairnṛpairindrasamairyudhi ।
candanasya raseneva rudhireṇa samukṣitāḥ ।
7.31.31 ॥ ॥

te yūyamavagāhadhvaṁ narmadāṁ śarmadāṁ śubhām ।
mahāpadmamukhā mattā gaṅgāmiva gahāgajāḥ ।
asyāṁ snātvā mahānadyāṁ pāpmānaṁ vipramokṣyatha ।
7.31.32 ॥ ॥

ahamapyadya puline śaradindusamaprabhe ।
puṣpopahāraṁ śanakaiḥ kariṣyāmi kapardinaḥ ।
7.31.33 ॥ ॥

rāvaṇenaivamuktāstu prahastaśukasāraṇāḥ ।
samahodaradhūmrākṣā narmadāṁ vijagāhire ।
7.31.34 ॥ ॥

rākṣasendragajaistaistu kṣobhitā narmadā nadī ।
vāmanāñjanapadmādyairgaṅgā iva mahāgajaiḥ ।
7.31.35 ॥ ॥

tataste rākṣasāḥ snātvā narmadāyāṁ mahābalāḥ ।
uttīrya puṣpāṇyājahrurbalyarthaṁ rāvaṇasya tu ।
7.31.36 ॥ ॥

narmadāpuline hṛdye śubhrābhrasadṛśaprabhe ।
rākṣasaistu muhūrtena kṛtaḥ puṣpamayo giriḥ ।
7.31.37 ॥ ॥

puṣpeṣūpahṛteṣvevaṁ rāvaṇo rākṣaseśvaraḥ ।
avatīrṇo nadīṁ snātuṁ gaṅgāmiva mahāgajaḥ ।
7.31.38 ॥ ॥

tatra snātvā ca vidhivajjaptvā japyamanuttamam ।
narmadāsalilāttasmāduttatāra sa rāvaṇaḥ ।
7.31.39 ॥ ॥

tataḥ klinnāmbaraṁ tyaktvā śuklavastrasamāvṛtam ।
rāvaṇaṁ prāñjaliṁ yāntamanvayuḥ sarvarākṣasāḥ ।
7.31.40 ॥ ॥

tadgatīvaśamāpannā mūrtimanta ivācalāḥ ।
yatra yatra ca yāti sma rāvaṇo rākṣaseśvaraḥ ।
jāmbūnadamayaṁ liṅgaṁ tatra tatra sma nīyate ।
7.31.41 ॥ ॥

vālukāvedimadhye tu talliṅgaṁ sthāpya rāvaṇaḥ ।
arcayāmāsa gandhaiśca puṣpaiścāmṛtagandhibhiḥ ।
7.31.42 ॥ ॥

tataḥ satāmārtiharaṁ paraṁ varaṁ varapradaṁ candramayūkhabhūṣaṇam ।
samarcayitvā sa niśācaro jagau prasārya hastānpraṇanarta cāgrataḥ ।
7.31.43 ॥