उत्तरकाण्डम्Uttara Kāṇḍa

jite mahendre 'tibale rāvaṇasya sutena vai ।
prajāpatiṁ puraskṛtya yayurlaṅkāṁ surāstadā ।
7.30.1 ॥ ॥

tatra rāvaṇamāsādya putrabhrātṛbhirāvṛtam ।
abravīdgagane tiṣṭhansāmapūrvaṁ prajāpatiḥ ।
7.30.2 ॥ ॥

vatsa rāvaṇa tuṣṭo 'smi putrasya tava saṁyuge ।
aho 'sya vikramaudāryaṁ tava tulyo 'dhiko 'pi vā ।
7.30.3 ॥ ॥

jitaṁ hi bhavatā sarvaṁ trailokyaṁ svena tejasā ।
kṛtā pratijñā saphalā prīto 'smi svasutena vai ।
7.30.4 ॥ ॥

ayaṁ ca putro 'tibalastava rāvaṇa vīryavān ।
jagatīndrajidityeva parikhyāto bhaviṣyati ।
7.30.5 ॥ ॥

balavāndurjayaścaiva bhaviṣyatyeva rākṣasaḥ ।
yaṁ samāśritya te rājansthāpitāstridaśā vaśe ।
7.30.6 ॥ ॥

tanmucyatāṁ mahābāho mahendraḥ pākaśāsanaḥ ।
kiñcāsya mokṣaṇārthāya prayacchantu divaukasaḥ ।
7.30.7 ॥ ॥

athābravīnmahātejā indrajitsamitiñjayaḥ ।
amaratvamahaṁ deva vṛṇe yadyeṣa mucyate ।
7.30.8 ॥ ॥

catuṣpadāṁ khecarāṇāmanyeṣāṁ vā mahaujasām ।
vṛkṣagulmakṣupalatātṛṇopalamahībhṛtām ।
7.30.9 ॥ ॥

sarve 'pi jantavo 'nyonyaṁ bhetavye sati bibhyati ।
ato 'tra loke sarveṣāṁ sarvasmācca bhavedbhayam ।
7.30.10 ॥ ॥

tato 'bravīnmahātejā meghanādaṁ prajāpatiḥ ।
nāsti sarvāmaratvaṁ hi kasyacitprāṇino bhuvi ।
catuṣpadaḥ pakṣiṇaśca bhūtānāṁ vā mahaujasām ।
7.30.11 ॥ ॥

śrutvā pitāmahenoktamindrajitprabhuṇāvyayam ।
7.30.12 ॥ ॥

vaṁ hi kasyacitprāṇino bhuvi ।
athābravītsa tatrasthaṁ meghanādo mahābalaḥ ।
śrūyatāṁ vā bhavetsiddhiḥ śatakratuvimokṣaṇe ।
7.30.13 ॥ ॥

mameṣṭaṁ nityaśo harvyairmantraiḥ sampūjya pāvakam ।
saṅgrāmamavatarttuṁ ca śatrunirjayakāṅkṣiṇaḥ ।
7.30.14 ॥ ॥

aśvayukto ratho mahyamuttiṣṭhettu vibhāvasoḥ ।
tatsthasyāmaratā syānme eṣa me niścayo varaḥ ।
7.30.15 ॥ ॥

tasminyadyasamāpte ca japyahome vibhāvasau ।
yudhyeyaṁ deva saṅgrāme tadā me syādvināśanam ।
7.30.16 ॥ ॥

sarvo hi tapasā deva vṛṇotyamaratāṁ pumān ।
vikrameṇa mayā tvetadamaratvaṁ pravartitam ।
7.30.17 ॥ ॥

evamastviti taṁ cāha vākyaṁ devaḥ pitāmahaḥ ।
muktaścendrajitā śakro gatāśca tridivaṁ surāḥ ।
7.30.18 ॥ ॥

etasminnantare rāma dīno bhraṣṭāmbaradyutiḥ ।
indraścintāparītātmā dhyānatatparatāṁ gataḥ ।
7.30.19 ॥ ॥

taṁ tu dṛṣṭvā tathābhūtaṁ prāha devaḥ prajāpatiḥ ।
śatakrato kimu purā karoti sma suduṣkṛtam ।
7.30.20 ॥ ॥

amarendra mayā bahvyaḥ prajāḥ sṛṣṭāstathā prabho ।
ekavarṇāḥ samābhāṣā ekarūpāśca sarvaśaḥ ।
7.30.21 ॥ ॥

tāsāṁ nāsti viśeṣo hi darśane lakṣaṇe 'pi vā ।
tato 'hamekāgramanāstāḥ prajāḥ paricintayam ।
7.30.22 ॥ ॥

so 'haṁ tāsāṁ viśeṣārthaṁ striyamekāṁ vinirmame ।
yadyatprajānāṁ pratyaṅgaṁ viśiṣṭaṁ tattaduddhṛtam ।
7.30.23 ॥ ॥

tato mayā rūpaguṇairahalyā strī vinirmitā ।
halaṁ nāmeha vairūpaṁ halyaṁ tatprabhavaṁ bhavet ।
7.30.24 ॥ ॥

yasmānna vidyate halyaṁ tenāhalyeti viśrutā ।
ahalyeti mayā śakra tasyā nāma pravartitam ।
7.30.25 ॥ ॥

nirmitāyāṁ ca devendra tasyāṁ nāryāṁ surarṣabha ।
bhaviṣyatīti kasyaiṣā mama cintā tato 'bhavat ।
7.30.26 ॥ ॥

tvaṁ tu śakra tadā nārīṁ jānīṣe manasā prabho ।
sthānādhikatayā patnī mamaiṣeti purandara ।
7.30.27 ॥ ॥

sā mayā nyāsabhūtā tu gautamasya mahātmanaḥ ।
nyastā bahūni varṣāṇi tena niryātitā ca ha ।
7.30.28 ॥ ॥

tatastasya parijñāya mahāsthairyaṁ mahāmuneḥ ।
jñātvā tapasi siddhiṁ ca patnyarthaṁ sparśitā tadā ।
7.30.29 ॥ ॥

saṅkruddhastvaṁ hi dharmātman gatvā tasyāśramaṁ muneḥ ।
dṛṣṭavāṁśca tadā tāṁ strīṁ dīptāmagniśikhāmiva ।
7.30.30 ॥ ॥

sā tvayā dharṣitā śakra kāmārtena samanyunā ।
dṛṣṭastvaṁ ca tadā tena hyāśrame paramarṣiṇā ।
7.30.31 ॥ ॥

tataḥ kruddhena tenā 'si śaptaḥ paramatejasā ।
gato 'si yena devendra daśābhāgaviparyayam ।
7.30.32 ॥ ॥

yasmānme dharṣitā patnī tvayā vāsava nirbhayam ।
tasmāttvaṁ samare rājañchatruhastaṁ gamiṣyasi ।
7.30.33 ॥ ॥

ayaṁ tu bhāvo durbuddhe yastvayeha pravartitaḥ ।
mānuṣeṣvapi lokeṣu bhaviṣyati na saṁśayaḥ ।
7.30.34 ॥ ॥

tatrārdhaṁ tasya yaḥ kartā tvayyardhaṁ nipatiṣyati ।
na ca te sthāvaraṁ sthānaṁ bhaviṣyati na saṁśayaḥ ।
7.30.35 ॥ ॥

yaśca yaśca surendraḥ syāddhruvaḥ sa na bhaviṣyati ।
eṣa śāpo mayā mukta ityasau tvāṁ tadā 'bravīt ।
7.30.36 ॥ ॥

tāṁ tu bhāryāṁ sa nirbhartsya so 'bravītsumahātapāḥ ।
durvinīte vinidhvaṁsa mamāśramasamīpataḥ ।
7.30.37 ॥ ॥

rūpayauvanasampannā yasmāttvamanavasthitā ।
tasmādrūpavatī loke na tvamekā bhaviṣyati ।
7.30.38 ॥ ॥

rūpaṁ ca te prajāḥ sarvā gamiṣyanti na saṁśayaḥ ।
yattadekaṁ samāśritya vibhramo 'yamupasthitaḥ ।
7.30.39 ॥ ॥

tadāprabhṛti bhūyiṣṭhaṁ prajā rūpasamanvitāḥ ।
sā taṁ prasādayāmāsa maharṣiṁ gautamaṁ tadā ।
7.30.40 ॥ ॥

ajñānāddharṣitā vipra tvadrūpeṇa divaukasā ।
na kāmakārādviprarṣe prasādaṁ kartumarhasi ।
7.30.41 ॥ ॥

ahalyayā tvevamuktaḥ pratyuvāca sa gautamaḥ ।
utpatsyati mahātejā ikṣvākūṇāṁ mahārathaḥ ।
7.30.42 ॥ ॥

rāmo nāma śruto loke vanaṁ cāpyupayāsyati ।
brāhmaṇārthe mahābāhurviṣṇurmānuṣavigrahaḥ ।
taṁ drakṣyasi yadā bhadre tataḥ pūtā bhaviṣyasi ।
7.30.43 ॥ ॥

sa hi pāvayituṁ śaktastvayā yadduṣkṛtaṁ kṛtam ।
tasyātithyaṁ ca kṛtvā vai matsamīpaṁ gamiṣyasi ।
7.30.44 ॥ ॥

vatsyasi tvaṁ mayā sārdhaṁ tadā hi varavarṇini ।
evamuktvā sa viprarṣirājagāma svamāśramam ।
7.30.45 ॥ ॥

tapaścācāra sumahatsā patnī brahmavādinaḥ ।
śāpotsargāddhi tasyedaṁ muneḥ sarvamupasthitam ।
7.30.46 ॥ ॥

tatsmara tvaṁ mahābāho duṣkṛtaṁ yattvayā kṛtam ।
tena tvaṁ grahaṇaṁ śatroryāto nānyena vāsava ।
7.30.47 ॥ ॥

śīghraṁ vai yaja yajñaṁ tvaṁ vaiṣṇavaṁ susamāhitaḥ ।
pāvitastena yajñena yāsyase tridivaṁ tataḥ ।
7.30.48 ॥ ॥

putraśca tava devendra na vinaṣṭo mahāraṇe ।
nītaḥ sannihitaścaiva āryakeṇa mahodadhau ।
7.30.49 ॥ ॥

etacchrutvā mahendrastu yajñamiṣṭvā ca vaiṣṇavam ।
punastridivamākrāmadanvaśāsacca devarāṭ ।
7.30.50 ॥ ॥

etadindrajito nāma balaṁ yatkīrtitaṁ mayā ।
nirjitastena devendraḥ prāṇino 'nye tu kiṁ punaḥ ।
7.30.51 ॥ ॥

āścaryamiti rāmaśca lakṣmaṇaścābravīttadā ।
agastyavacanaṁ śrutvā vānarā rākṣasāstadā ।
7.30.52 ॥ ॥

vibhīṣaṇastu rāmasya pārśvastho vākyamabravīt ।
āścaryaṁ smārito 'smyadya yattaddṛṣṭaṁ purātanam ।
7.30.53 ॥ ॥

agastyaṁ tvabravīdrāmaḥ satyametacchrutaṁ ca me ।
7.30.54 ॥ ॥

evaṁ rāma samudbhūto rāvaṇo lokakaṇṭakaḥ ।
saputro yena saṅgrāme jitaḥ śakraḥ sureśvaraḥ ।
7.30.55 ॥