उत्तरकाण्डम्Uttara Kāṇḍa

tatastamasi sañjāte sarve te devarākṣasāḥ ।
ayuddhyanta balonmattāḥ sūdayantaḥ parasparam ।
7.29.1 ॥ ॥

tatastu devasainyena rākṣasānāṁ bṛhadbalam ।
daśāṁśaṁ sthāpitaṁ yuddhe śeṣaṁ nītaṁ yamakṣayam ।
7.29.2 ॥ ॥

tasmiṁstu tāmase yuddhe sarve te devarākṣasāḥ ।
anyonyaṁ nābhyajānanta yudhyamānāḥ parasparam ।
7.29.3 ॥ ॥

indraśca rāvaṇaścaiva rāvaṇiśca mahābalaḥ ।
tasmiṁstamojālavṛte mohamīyurna te trayaḥ ।
7.29.4 ॥ ॥

sa tu dṛṣṭvā balaṁ sarvaṁ rāvaṇo nihataṁ kṣaṇāt ।
krodhamabhyagamattīvraṁ mahānādaṁ ca muktavān ।
7.29.5 ॥ ॥

krodhātsūtaṁ ca durdharṣaḥ syandanasthamuvāca ha ।
parasainyasya madhyena yāvadanto nayasva mām ।
7.29.6 ॥ ॥

adyaitān tridaśānsarvānvikramaiḥ samare svayam ।
nānāśastrairmahāghorairnayāmi yamasādanam ।
7.29.7 ॥ ॥

ahamindraṁ vadhiṣyāmi dhanadaṁ varuṇaṁ yamam ।
tridaśānvinihatyātha svayaṁ sthāsyāmyathopari ।
viṣādo na ca kartavyaḥ śīghraṁ vāhaya me ratham ।
7.29.8 ॥ ॥

dviḥ khalu tvāṁ bravīmyadya yāvadanto nayasva mām ।
7.29.9 ॥ ॥

ayaṁ sa nandanoddeśo yatra vartāmahe vayam ।
naya māmadya tatra tvamudayo yatra parvataḥ ।
7.29.10 ॥ ॥

tasya tadvacanaṁ śrutvā turagānsa manojavān ।
ādideśātha śatraṇāṁ madhyenaiva ca sārathiḥ ।
7.29.11 ॥ ॥

tasya taṁ niścayaṁ jñātvā śakro deveśvarastadā ।
rathasthaḥ samarasthastāndevānvākyamathābravīt ।
7.29.12 ॥ ॥

surāḥ śṛṇuta madvākyaṁ yattāvanmama rocate ।
jīvanneva daśagrīvaḥ sādhu rakṣo nigṛhyatām ।
7.29.13 ॥ ॥

eṣa hyatibalaḥ sainyai rathena pavanaujasā ।
gamiṣyati pravṛddhormiḥ samudra iva parvaṇi ।
7.29.14 ॥ ॥

nahyeṣa hantuṁ śakyo 'dya varadānātsunirbhayaḥ ।
tadgrahīṣyāmahe rakṣo yattā bhavata saṁyuge ।
7.29.15 ॥ ॥

yathā balau niruddhe ca trailokyaṁ bhujyate mayā ।
evametasya pāpasya nirodho mama rocate ।
7.29.16 ॥ ॥

tato 'nyaṁ deśamāsthāya śakraḥ santyajya rāvaṇam ।
ayudhyata mahārāja rākṣasāṁstrāsayanraṇe ।
7.29.17 ॥ ॥

uttareṇa daśagrīvaḥ praviveśānivartakaḥ ।
dakṣiṇena tu pārśvena praviveśa śatakratuḥ ।
7.29.18 ॥ ॥

tataḥ sa yojanaśataṁ praviṣṭo rākṣasādhipaḥ ।
devatānāṁ balaṁ sarvaṁ śaravarṣairavākirat ।
7.29.19 ॥ ॥

tataḥ śakro nirīkṣyātha pranaṣṭaṁ tu svakaṁ balam ।
nyavartayadasambhrāntaḥ samāvṛtya daśānanam ।
7.29.20 ॥ ॥

etasminnantare nādo mukto dānavarākṣasaiḥ ।
hā hatāḥ sma iti grastaṁ dṛṣṭvā śakreṇa rāvaṇam ।
7.29.21 ॥ ॥

tato rathaṁ samāsthāya rāvaṇiḥ krodhamūrcchitaḥ ।
tatsainyamatisaṅkruddhaḥ praviveśa sudāruṇam ।
7.29.22 ॥ ॥

tāṁ praviśya mahāmāyāṁ prāptāṁ gopatinā purā ।
praviveśa susaṁrabdhastatsainyaṁ samabhidravat ।
7.29.23 ॥ ॥

sa sarvā devatāstyaktvā śakramevābhyadhāvata ।
mahendraśca mahātejā nāpaśyacca sutaṁ ripoḥ ।
7.29.24 ॥ ॥

vimuktakavacastatra vadhyamāno 'pi rāvaṇiḥ ।
tridaśaiḥ sumahāvīryairna cakāra ca kiñcana ।
7.29.25 ॥ ॥

sa mātaliṁ samāyāntaṁ tāḍayitvā śarottamaiḥ ।
mahendraṁ bāṇavarṣeṇa bhūya evābhyavākirat ।
7.29.26 ॥ ॥

tatastyaktvā rathaṁ śakro visasarja ca sārathim ।
airāvataṁ samāruhya mṛgayāmāsa rāvaṇim ।
7.29.27 ॥ ॥

sa tatra māyābalavānadṛśyo 'thāntarikṣagaḥ ।
indraṁ māyāparikṣiptaṁ kṛtvā sa prādravaccharaiḥ ।
7.29.28 ॥ ॥

sa taṁ yadā pariśrāntamindraṁ jajñe 'tha rāvaṇiḥ ।
tadainaṁ māyayā baddhvā svasainyamabhito 'nayat ।
7.29.29 ॥ ॥

taṁ tu dṛṣṭvā balāttena nīyamānaṁ mahāraṇāt ।
mahendramamarāḥ sarve kiṁ nu syādityacintayan ।
7.29.30 ॥ ॥

dṛśyate na sa māyāvī śakrajitsamitiñjayaḥ ।
vidyāvānapi yenendro māyayā nīyate balāt ।
7.29.31 ॥ ॥

etasminnantare kruddhāḥ sarve suragaṇāstadā ।
rāvaṇaṁ vimukhīkṛtya śaravarṣairavākiran ।
7.29.32 ॥ ॥

rāvaṇastu samāsādya ādityāṁśca vasūṁstadā ।
na śaśāka sa saṅgrāme yoddhuṁ śatrubhirarditaḥ ।
7.29.33 ॥ ॥

sa taṁ dṛṣṭvā parimlānaṁ prahārairjarjarīkṛtam ।
rāvaṇiḥ pitaraṁ yuddhe darśanastho 'bravīdidam ।
7.29.34 ॥ ॥

āgaccha tāta gacchāmo raṇakarma nivartatām ।
jitaṁ no viditaṁ te 'stu svastho bhava gatajvaraḥ ।
7.29.35 ॥ ॥

ayaṁ hi surasainyasya trailokyasya ca yaḥ prabhuḥ ।
sa gṛhīto daivabalādbhagnadarpāḥ surāḥ kṛtāḥ ।
7.29.36 ॥ ॥

yatheṣṭaṁ bhuṅkṣva lokāṁstrīnnigṛhyārātimojasā ।
vṛthā kiṁ te śrameṇeha yuddhamadya tu niṣphalam ।
7.29.37 ॥ ॥

tataste daivatagaṇā nivṛttā raṇakarmaṇaḥ ।
tacchrutvā rāvaṇervākyaṁ svasthacetāḥ babhūva ha ।
7.29.38 ॥ ॥

atha sa raṇavigatajvaraḥ prabhurvijayamavāpya niśācarādhipaḥ ।
svabhavanamabhito jagāma hṛṣṭaḥ svasutamavāpya ca vākyamabravīt ।
7.29.39 ॥ ॥

atibalasadṛśaiḥ parākramaistairmama kulamānavivardhanaṁ kṛtam ।
yadayamatulyabalastvayādya vai tridaśapatistridaśāśca nirjitāḥ ।
7.29.40 ॥ ॥

naya rathamadhiropya vāsavaṁ nagaramito vraja senayā vṛtastvam ।
ahamapi tava gacchato drutaṁ saha sacivairanuyāmi pṛṣṭhataḥ ।
7.29.41 ॥ ॥

atha sa balavṛtaḥ savāhanastridaśapatiṁ parigṛhya rāvaṇiḥ ।
svabhavanamabhigamya vīryavānkṛtasamarānvisasarja rākṣasān ।
7.29.42 ॥