उत्तरकाण्डम्Uttara Kāṇḍa

sumālinaṁ hataṁ dṛṣṭvā vasunā bhasmasātkṛtam ।
svasainyaṁ vidrutaṁ cāpi lakṣayitvā 'rditaṁ suraiḥ ।
7.28.1 ॥ ॥

tataḥ sa balavānkruddho rāvaṇasya sutastadā ।
nivartya rākṣasānsarvānmeghanādo vyavasthitaḥ ।
7.28.2 ॥ ॥

surathenāgnivarṇena kāmagena mahārathaḥ ।
abhidudrāva senāṁ tāṁ vanānyagniriva jvalan ।
7.28.3 ॥ ॥

tataḥ praviśatastasya vividhāyudhadhāriṇaḥ ।
vidudruvurdiśaḥ sarvā darśanādeva devatāḥ ।
7.28.4 ॥ ॥

na babhūva tadā kaścidyuyutsorasya sammukhe ।
sarvānāviddhya vitrastāṁstataḥ śakro 'bravītsurān ।
7.28.5 ॥ ॥

na bhetavyaṁ na gantavyaṁ nivartadhvaṁ raṇe surāḥ ।
eṣa gacchati putro me yuddhārthamaparājitaḥ ।
7.28.6 ॥ ॥

tataḥ śakrasuto devo jayanta iti viśrutaḥ ।
rathenādbhutakalpena saṅgrāme so 'bhyavartata ।
7.28.7 ॥ ॥

tataste tridaśāḥ sarve parivārya śacīsutam ।
rāvaṇasya sutaṁ yuddhe samāsādya prajaghnire ।
7.28.8 ॥ ॥

teṣāṁ yuddhaṁ samabhavatsadṛśaṁ devarakṣasām ।
mahendrasya ca putrasya rākṣasendrasutasya ca ।
7.28.9 ॥ ॥

tato mātaliputre tu gomukhe rākṣasātmajaḥ ।
sārathau pātayāmāsa śarānkanakabhūṣaṇān ।
7.28.10 ॥ ॥

śacīsutaścāpi tathā jayantastasya sārathim ।
taṁ cāpi rāvaṇiḥ kruddhaḥ samantātpratyavidhyata ।
7.28.11 ॥ ॥

sa hi krodhasamāviṣṭo balī visphāritekṣaṇaḥ ।
rāvaṇiḥ śakratanayaṁ śaravarṣairavākirat ।
7.28.12 ॥ ॥

tato nānāpraharaṇāñchitadhārānsahasraśaḥ ।
pātayāmāsa saṅkruddhaḥ surasainyeṣu rāvaṇiḥ ।
7.28.13 ॥ ॥

śataghnīmusalaprāsagadākhaḍgaparaśvadhān ।
mahānti giriśṛṅgāṇi pātayāmāsa rāvaṇiḥ ।
7.28.14 ॥ ॥

tataḥ pravyathitā lokāḥ sañjajñe ca tamo 'bhavat ।
tasya rāvaṇaputrasya śatrusainyāni nighnataḥ ।
7.28.15 ॥ ॥

tatastaddaivatabalaṁ samantāttaṁ śacīsutam ।
bahuprakāramasvasthamabhavaccharapīḍitam ।
7.28.16 ॥ ॥

nābhyajānanta cānyonyaṁ rakṣo vā devatā 'thavā ।
tatra tatra viparyastaṁ samantātparidhāvati ।
7.28.17 ॥ ॥

devā devānnijaghnuste rākṣasānrākṣasāstathā ।
sammūḍhāstamasācchannā vyadravannapare tathā ।
7.28.18 ॥ ॥

etasminnantare vīraḥ pulomā nāma vīryavān ।
daityendrastena saṅgṛhya śacīputro 'pavāhitaḥ ।
7.28.19 ॥ ॥

saṅgṛhya taṁ tu dauhitraṁ praviṣṭaḥ sāgaraṁ tadā ।
āryakaḥ sa hi tasyāsītpulomā yena sā śacī ।
7.28.20 ॥ ॥

jñātvā praṇāśaṁ tu tadā jayantasyātha devatāḥ ।
aprahṛṣṭāstataḥ sarvā vyathitāḥ sampradudruvuḥ ।
7.28.21 ॥ ॥

rāvaṇistvatha saṅkruddho balaiḥ parivṛtaḥ svakaiḥ ।
abhyadhāvata devāṁstānmumoca ca mahāsvanam ।
7.28.22 ॥ ॥

dṛṣṭvā praṇāśaṁ putrasya daivateṣu ca vidrutam ।
mātaliṁ cāha deveśo rathaḥ samupanīyatām ।
7.28.23 ॥ ॥

sa tu divyo mahābhīmaḥ sajja eva mahārathaḥ ।
upasthito mātalinā vāhyamāno mahājavaḥ ।
7.28.24 ॥ ॥

tato meghā rathe tasmiṁstaḍittvanto mahābalāḥ ।
agrato vāyucapalā neduḥ paramaniḥsvanāḥ ।
7.28.25 ॥ ॥

nānāvādyāni vādyanta gandharvāśca samāhitāḥ ।
nanṛtuścāpsaraḥsaṅghā niryāte tridaśeśvare ।
7.28.26 ॥ ॥

rudrairvasubhirādityaissādhyaiśca samarudgaṇaiḥ ।
vṛto nānāpraharaṇairniryayau tridaśādhipaḥ ।
7.28.27 ॥ ॥

nirgacchatastu śakrasya paruṣaṁ pavano vavau ।
bhāskaro niṣprabhaścāsīnmaholkāśca prapedire ।
7.28.28 ॥ ॥

etasminnantare śūro daśagrīvaḥ pratāpavān ।
āruroha rathaṁ divyaṁ nirmitaṁ viśvakarmaṇā ।
7.28.29 ॥ ॥

pannagaiḥ sumahākāryairveṣṭitaṁ romaharṣaṇaiḥ ।
teṣāṁ niḥśvāsavātena pradīptamiva saṁyuge ।
7.28.30 ॥ ॥

daityairniśācaraiścaiva sa rathaḥ parivāritaḥ ।
samarābhimukho daityo mahendraṁ so 'bhyavartata ।
7.28.31 ॥ ॥

putraṁ taṁ vārayitvā tu svayameva vyavasthitaḥ ।
so 'pi yuddhādviniṣkramya rāvaṇiḥ samupāviśat ।
7.28.32 ॥ ॥

tato yuddhaṁ pravṛttaṁ tu surāṇāṁ rākṣasaiḥ saha ।
śastrāṇi varṣatāṁ ghoraṁ meghānāmiva saṁyuge ।
7.28.33 ॥ ॥

kumbhakarṇastu duṣṭātmā nānāpraharaṇodyataḥ ।
nājñāyata tadā yuddhe saha kenāpyayudhyata ।
7.28.34 ॥ ॥

dantaiḥ bhujābhyāṁ padmāṁ ca śaktitomarasāyakaiḥ ।
yena kenaiva saṁrabdhastāḍayāmāsa vai surān ।
7.28.35 ॥ ॥

tato rudrairmahāghoraiḥ saṅgamyātha niśācaraḥ ।
prayuddhastaiśca saṅgrāme kṣataḥ śastrairnirantaram ।
7.28.36 ॥ ॥

babhau śastrācitatanuḥ kumbhakarṇaḥ kṣarannasṛk ।
vidyutstanitanirghoṣo dhāravāniva toyadaḥ ।
7.28.37 ॥ ॥

tatastadrākṣasaṁ sainyaṁ prayuddhaṁ samarudgaṇaiḥ ।
raṇe vidrāvitaṁ sarvaṁ nānāpraharaṇaiḥ śitaiḥ ।
7.28.38 ॥ ॥

kecidvinihatāḥ kṛttāśceṣṭanti sma mahītale ।
vāhaneṣvavasaktāśca sthitā evāpare raṇe ।
7.28.39 ॥ ॥

rathānnāgānkharānuṣṭrānpannagāṁsturagān raṇe ।
śiṁśumārānvarāhāṁśca piśācavadanāntathā ।
7.28.40 ॥ ॥

tānsamāliṅgya bāhubhyāṁ viṣṭabdhāḥ keciducchrutāḥ ।
devaistu śastrasambhinnā mamrire ca niśācarāḥ ।
7.28.41 ॥ ॥

citrakarma ivābhāti sa teṣāṁ raṇasamplavaḥ ।
nihatānāṁ pramattānāṁ rākṣasānāṁ mahītale ।
7.28.42 ॥ ॥

śoṇitodakaniṣpandakaṅkagṛdhrasamākulā ।
pravṛttā saṁyugamukhe śastragrāhavatī nadī ।
7.28.43 ॥ ॥

etasminnantare kruddho daśagrīvaḥ pratāpavān ।
nirīkṣya tadbalaṁ kṛtsnaṁ daivatairvinipātitam ।
7.28.44 ॥ ॥

sa taṁ prati vigāhyāśu pravṛddhaṁ sainyasāgaram ।
tridaśānsamare nighnañchakramevābhyavartata ।
7.28.45 ॥ ॥

āgācchakro mahaccāpaṁ visphārya sumahāsvanam ।
yasya visphāraghoṣeṇa stananti sma diśo daśa ।
7.28.46 ॥ ॥

tadvikṛṣya mahaccāpamindro rāvaṇamūrdhani ।
nipātayāmāsa śarānpāvakādityavarcasaḥ ।
7.28.47 ॥ ॥

tathaiva ca mahābāhurdaśagrīvo vyavasthitaḥ ।
śakraṁ kārmukavibhraṣṭaiḥ śaravarṣairavākirat ।
7.28.48 ॥ ॥

prayudhyatoratha tayorbāṇavarṣaiḥ samantataḥ ।
na jñāyate tadā kiñcitsarvaṁ hi tamasā vṛtam ।
7.28.49 ॥