उत्तरकाण्डम्Uttara Kāṇḍa

kailāsaṁ laṅghayitvātha daśagrīvaḥ sa rāvaṇaḥ ।
āsasāda mahātejā indralokaṁ niśācaraḥ ।
7.27.1 ॥ ॥

tasya rākṣasasainyasya samantādupayāsyataḥ ।
devalokaṁ yayau śabdo mathyamānārṇavopamaḥ ।
7.27.2 ॥ ॥

śrutvā tu rāvaṇaṁ prāptamindraścalita āsanāt ।
abravīttatra tān devān sarvāneva samāgatān ।
7.27.3 ॥ ॥

ādityānsavasūnrudrānviśvānsādhyānmarudgaṇān ।
sajjībhavata yuddhārthaṁ rāvaṇasya durātmanaḥ ।
7.27.4 ॥ ॥

evamuktāstu śakreṇa devāḥ śakrasamā yudhi ।
sannahya sumahāsattvā yuddhaśraddhāsamanvitāḥ ।
7.27.5 ॥ ॥

sa tu dīnaḥ paritrasto mahendro rāvaṇaṁ prati ।
viṣṇoḥ samīpamāgatya vākyametaduvāca ha ।
7.27.6 ॥ ॥

viṣṇo kathaṁ kariṣyāmi mahāvīryaparākramaḥ ।
asau hi balavadrakṣo yuddhārthamabhivartate ।
7.27.7 ॥ ॥

varapradānādbalavānna khalvanyena hetunā ।
tattu satyavacaḥ kāryaṁ yaduktaṁ padmayoninā ।
7.27.8 ॥ ॥

tadyathā namucirvṛtro balirnarakaśambarau ।
tvadbalaṁ samavaṣṭabhya mayā dagdhāstathā kuru ।
7.27.9 ॥ ॥

nahyanyo devadeveśa tvāmṛte madhusūdana ।
gatiḥ parāyaṇaṁ nāsti trailokye sacarācare ।
7.27.10 ॥ ॥

tvaṁ hi nārāyaṇaḥ śrīmānpadmanābhaḥ sanātanaḥ ।
tvayeme sthāpitā lokāḥ śakraścāhaṁ sureśvaraḥ ।
7.27.11 ॥ ॥

tvayā sṛṣṭamidaṁ sarvaṁ trailokyaṁ sacarācaram ।
tvāmeva bhagavansarve praviśanti yugakṣaye ।
7.27.12 ॥ ॥

tadācakṣva yathā tattvaṁ devadeva mama svayam ।
api cakrasahāyastvaṁ yotsyase rāvaṇaṁ prabho ।
7.27.13 ॥ ॥

evamuktaḥ sa śakreṇa devo nārāyaṇaḥ prabhuḥ ।
abravīnna paritrāsaḥ kartavyaḥ śrūyatāṁ ca me ।
7.27.14 ॥ ॥

na tāvadeṣa duṣṭātmā śakyo jetuṁ surāsuraiḥ ।
hantuṁ cāpi samāsādya varadānena durjayaḥ ।
7.27.15 ॥ ॥

sarvathā tu mahatkarma kariṣyati balotkaṭaḥ ।
rākṣasaḥ putrasahito dṛṣṭametannisargataḥ ।
7.27.16 ॥ ॥

yattu māṁ tvamabhāṣiṣṭha yuddhyasveti sureśvara ।
nāhaṁ taṁ pratiyotsyāmi rāvaṇaṁ rākṣasaṁ yudhi ।
7.27.17 ॥ ॥

nāhatvā samare śatruṁ viṣṇuḥ pratinivartate ।
durlabhaścaiva kāmo 'dya varaguptāddhi rāvaṇāt ।
7.27.18 ॥ ॥

pratijāne ca devendra tvatsamīpe śatakrato ।
bhavitā 'smi yathā 'syāhaṁ rakṣaso mṛtyukāraṇam ।
7.27.19 ॥ ॥

ahameva nihantā 'smi rāvaṇaṁ sapuraḥsaram ।
devatā nandayiṣyāmi jñātvā kālamupāgatam ।
etatte kathitaṁ tattvaṁ devarāja śacīpate ।
7.27.20 ॥ ॥

yuddhyasva vigatatrāsaḥ sarvaiḥ sārdhaṁ mahābala ।
7.27.21 ॥ ॥

yāmi jñātvā kālamupāgatam ।
tato rudrāḥ sahādityā vasavo maruto 'śvanau ।
sannaddhā niryayustūrṇaṁ rākṣasānabhitaḥ purāt ।
7.27.22 ॥ ॥

etasminnantare nādaḥ śuśruve rajanīkṣaye ।
tasya rāvaṇasainyasya prayuddhasya samantataḥ ।
7.27.23 ॥ ॥

te prayuddhā mahāvīryā hyanyonyamabhivīkṣya vai ।
saṅgrāmamevābhimukhā hyabhavartanta hṛṣṭavat ।
7.27.24 ॥ ॥

tato daivatasainyanāṁ saṅkṣobhaḥ samajāyata ।
tadakṣayaṁ mahāsainyaṁ dṛṣṭvā samaramūrdhani ।
7.27.25 ॥ ॥

tato yuddhaṁ samabhaveddevadānavarakṣasām ।
ghoraṁ tumulanirhrādaṁ nānāpraharaṇodyatam ।
7.27.26 ॥ ॥

etasminnantare śūrā rākṣasā ghoradarśanāḥ ।
yuddhārthaṁ samavartanta sacivā rāvaṇasya te ।
7.27.27 ॥ ॥

mārīcaśca prahastaśca mahāpārśvamahodarau ।
akampano nikumbhaśca śukaḥ sāraṇa eva ca ।
7.27.28 ॥ ॥

saṁhlādo dhūmaketuśca mahādaṁṣṭro ghaṭodaraḥ ।
jambumālī mahāhrādo virūpākṣaśca rākṣasaḥ ।
7.27.29 ॥ ॥

suptaghno yajñakopaśca durmukho dūṣaṇaḥ kharaḥ ।
triśirāḥ karavīrākṣaḥ sūryaśatruśca rākṣasaḥ ।
7.27.30 ॥ ॥

mahākāyo 'tikāyaśca devāntakanarāntakau ।
etaiḥ sarvaiḥ parivṛto mahāvīryo mahābalaḥ ।
7.27.31 ॥ ॥

rāvaṇasyāryakaḥ sainyaṁ sumālī praviveśa ha ।
sa daivatagaṇānsarvānnānāpraharaṇaiḥ śitaiḥ ।
vyadhvaṁsayatsusaṅkruddho vāyurjaladharāniva ।
7.27.32 ॥ ॥

taddaivatabalaṁ rāma hanyamānaṁ niśācaraiḥ ।
praṇunnaṁ sarvato digbhyaḥ siṁhanunnā mṛgā iva ।
7.27.33 ॥ ॥

etasminnantare śūro vasūnāmaṣṭamo vasuḥ ।
sāvitra iti vikhyātaḥ praviveśa raṇājiram ।
7.27.34 ॥ ॥

tathā ' 'dityau mahāvīryau tvaṣṭā pūṣā ca daṁśitau ।
niṁrbhayau saha sainyena tadā prāviśatāṁ raṇe ।
7.27.35 ॥ ॥

tato yuddhaṁ samabhavatsurāṇāṁ saha rākṣasaiḥ ।
kruddhānāṁ rakṣasāṁ kīrtiṁ samareṣvanivartinām ।
7.27.36 ॥ ॥

tataste rākṣasāḥ sarve vibudhānsamare sthitān ।
nānāpraharaṇairghorairjaghnuḥ śatasahasraśaḥ ।
7.27.37 ॥ ॥

devāśca rākṣasānghorānmahābalaparākramān ।
samare vimalaiḥ śastrairupaninyuryamakṣayam ।
7.27.38 ॥ ॥

etasminnantare rāma sumālī nāma rākṣasaḥ ।
nānāpraharaṇaiḥ kruddhastatsainyaṁ so 'bhyavartata ।
7.27.39 ॥ ॥

sa daivatabalaṁ sarvaṁ nānāprahaṇaiḥ śitaiḥ ।
vyadhvaṁsayata saṅkruddho vāyurjaladharaṁ yathā ।
7.27.40 ॥ ॥

te mahābāṇavarṣaiśca śūlaprāsaiḥ sudāruṇaiḥ ।
hanyamānāḥ surāḥ sarve na vyatiṣṭhanta saṁhatāḥ ।
7.27.41 ॥ ॥

tato vidrāvyamāṇeṣu daivateṣu sumālinā ।
vasūnāmaṣṭamaḥ kruddhaḥ sāvitro vai vyavasthitaḥ ।
7.27.42 ॥ ॥

saṁvṛtaḥ svairathānīkaiḥ praharantaṁ niśācaram ।
vikrameṇa mahātejā vārayāmāsa saṁyuge ।
7.27.43 ॥ ॥

tatastayormahāyuddhamabhavadromaharṣaṇam ।
7.27.44 ॥ ॥

sumālino vasoścaiva samareṣvanivartinoḥ ।
tatastasya mahābāṇairvasunā sumahātmanā ।
nihataḥ pannagarathaḥ kṣaṇena vinipātitaḥ ।
7.27.45 ॥ ॥

hatvā tu saṁyuge tasya rathaṁ bāṇaśataiścitam ।
gadāṁ tasya vadhārthāya vasurjagrāha pāṇinā ।
7.27.46 ॥ ॥

tataḥ pragṛhya dīptāgrāṁ kāladaṇḍopamāṁ gadām ।
tāṁ mūrdhni pātayāmāsa sāvitro vai sumālinaḥ ।
7.27.47 ॥ ॥

sā tasyopari colkābhā patantīva babhau gadā ।
indrapramuktā garjantī girāviva mahāśaniḥ ।
7.27.48 ॥ ॥

tasya naivāsthi na śiro na māṁsaṁ dadṛśe tadā ।
gadayā bhasmatāṁ nītaṁ nihatasya raṇājire ।
7.27.49 ॥ ॥

taṁ dṛṣṭvā nihataṁ saṅkhye rākṣasāste samantataḥ ।
vyadravansahitāḥ sarve krośamānāḥ parasparam ।
vidrāvyamāṇā vasunā rākṣasā nāvatasthire ।
7.27.50 ॥