उत्तरकाण्डम्Uttara Kāṇḍa

sa tu dattvā daśagrīvo vanaṁ ghoraṁ svarasya tat ।
bhaginīṁ ca samāśvāsya hṛṣṭaḥ svasthataro 'bhavat ।
7.25.1 ॥ ॥

tato nikumbhilā nāma laṅkopavanamuttamam ।
tadrākṣasendro balavānpraviveśa sahānugaḥ ।
7.25.2 ॥ ॥

tato yūpaśatākīrṇaṁ saumyacaityopaśobhitam ।
dadarśa viṣṭhitaṁ yajñaṁ śriyā samprajvalanniva ।
7.25.3 ॥ ॥

tataḥ kṛṣṇājinadharaṁ kamaṇḍaluśikhādhvajam ।
dadarśa svasutaṁ tatra meghanādaṁ bhayāvaham ।
7.25.4 ॥ ॥

taṁ samāsādya laṅkeśaḥ pariṣvajvātha bāhubhiḥ ।
abravītkimidaṁ vatsa vartase brūhi tattvataḥ ।
7.25.5 ॥ ॥

uśanā tvabravīttatra yajñasampatsamṛddhaye ।
rāvaṇaṁ rākṣasaśreṣṭhaṁ dvijaśreṣṭho mahātapāḥ ।
7.25.6 ॥ ॥

ahamākhyāmi te rājañchrūyatāṁ sarvameva tat ।
yajñāste sapta putreṇa prāptāssubahuvistarāḥ ।
7.25.7 ॥ ॥

agniṣṭomo 'śvamedhaśca yajño bahusuvarṇakaḥ ।
rājasūyastathā yajño gomedho vaiṣvavastathā ।
7.25.8 ॥ ॥

māheśvare pravṛtte tu yajñe pumbhiḥ sudurlabhe ।
varāṁste labdhavānputraḥ sākṣātpaśupateriha ।
7.25.9 ॥ ॥

kāmagaṁ syandanaṁ divyamantarikṣacaraṁ dhruvam ।
māyāṁ ca tāmasīṁ nāma yayā sampadyate tamaḥ ।
7.25.10 ॥ ॥

etayā kila saṅgrāme māyayā rākṣaseśvara ।
prayuktayā gatiḥ śakyā nahi jñātuṁ surāsuraiḥ ।
7.25.11 ॥ ॥

akṣayāviṣudhī bāṇaiścāpaṁ cāpi sudurjayam ।
astraṁ ca balavadrājañchatruvidhvaṁsanaṁ raṇe ।
7.25.12 ॥ ॥

etānsarvānvarāṁllabdhvā putraste 'yaṁ daśānana ।
adya yajñasamāptau ca tvāṁ didṛkṣussthito hyaham ।
7.25.13 ॥ ॥

tato 'bravīdṛśagrīvo na śobhanamidaṁ kṛtam ।
pūjitāḥ śatravo yasmāddravyairindrapurogamāḥ ।
7.25.14 ॥ ॥

ehīdānīṁ kṛtaṁ viddhi sukṛtaṁ tanna saṁśayaḥ ।
āgaccha saumya gacchāmaḥ svameva bhavanaṁ prati ।
7.25.15 ॥ ॥

tato gatvā daśagrīvaḥ saputraḥ savibhīṣaṇaḥ ।
striyo 'vatārayāmāsa sarvāstā bāṣpagadgadāḥ ।
7.25.16 ॥ ॥

lakṣiṇyo ratnabhūtāśca devadānavarakṣasām ।
tasya tāsu matiṁ jñātvā dharmatmā vākyamabravīt ।
7.25.17 ॥ ॥

īdṛśaistvaṁ samācārairyaśorthakulanāśanaiḥ ।
dharṣaṇaṁ jñātināṁ jñātvā svamatena viceṣṭase ।
7.25.18 ॥ ॥

jñātīṁstāndharṣayitvemāstvayā ' 'nītā varāṅganāḥ ।
tvāmatikramya madhunā rājankumbhīnasī hṛtā ।
7.25.19 ॥ ॥

rāvaṇastvabravīdvākyaṁ nāvagacchāmi kiṁ tvidam ।
ko 'yaṁ yastu tvayā ' 'khyāto madhurityeva nāmataḥ ।
7.25.20 ॥ ॥

vibhīṣaṇastu saṅkruddho bhrātaraṁ vākyamabravīt ।
śrūyatāmasya pāpasya karmaṇaḥ phalamāgatam ।
7.25.21 ॥ ॥

mātāmahasya yo bhrātā jyeṣṭho bhrātā sumālinaḥ ।
mālyavāniti vikhyāto vṛddhaḥ prājño niśācaraḥ ।
7.25.22 ॥ ॥

pitā jyeṣṭho jananyā no hyasmākaṁ cāryako 'bhavat ।
tasya kumbhīnasī nāma duhiturduhitā 'bhavat ।
7.25.23 ॥ ॥

mātṛṣvasurathāsmākaṁ sā ca kanyā 'nalodbhavā ।
bhavatyasmākamevaiṣā bhrātṛṇāṁ dharmataḥ svasā ।
7.25.24 ॥ ॥

sā hṛtā, madhunā rājanrākṣasena balīyasā ।
yajñapravṛtte putre tu mayi cāntarjaloṣite ।
7.25.25 ॥ ॥

kumbhakarṇe mahārāja nidrāmanubhavatyatha ।
nihatya rākṣasaśreṣṭhānamātyāniha sammatān ।
7.25.26 ॥ ॥

dharṣayitvā hṛtā sā tu suptāpyantaḥpure tava ।
śrutvā 'pi tanmahārāja kṣāntameva hato na saḥ ।
7.25.27 ॥ ॥

yasmādavaśyaṁ dātavyā kanyā bhartre hi bhrātṛbhiḥ ।
tadetatkarmaṇo hyasya phalaṁ pāpasya durmate ।
7.25.28 ॥ ॥

asminnevābhisamprāptaṁ loke viditamastu te ।
vibhīṣaṇavacaḥ śrutvā rākṣasendraḥ sa rāvaṇaḥ ।
daurātmyenātmanoddhūtastaptāmbha iva sāgaraḥ ।
7.25.29 ॥ ॥

tato 'bravīdṛśagrīvaḥ kruddhaḥ saṁraktalocanaḥ ।
kalpyatāṁ me rathaḥ śīghraṁ śūrāḥ sajjībhavantu naḥ ।
7.25.30 ॥ ॥

bhrātā me kumbhakarṇaśca ye ca mukhyā niśācarāḥ ।
vāhanānyadhirohantu nānāpraharaṇāyudhāḥ ।
7.25.31 ॥ ॥

adya taṁ samare hatvā madhuṁ rāvaṇanirbhayam ।
suralokaṁ gamiṣyāmi yuddhakāṅkṣī suhṛdvṛtaḥ ।
7.25.32 ॥ ॥

akṣauhiṇīsahasrāṇi catvāryagryāṇi rakṣasām ।
nānāpraharaṇānyāśu niryayuryuddhakāṅkṣiṇām ।
7.25.33 ॥ ॥

indrajittvagrataḥ (agrataḥ) sainyātsainikānparigṛhya ca ।
jagāma rāvaṇo madhye kumbhakarṇaśca pṛṣṭhataḥ ।
7.25.34 ॥ ॥

vibhīṣaṇaśca dharmātmā laṅkāyāṁ dharmāmācarat ।
śoṣāḥ sarve mahābhāgā yayurmadhupuraṁ prati ।
7.25.35 ॥ ॥

kharairuṣṭrairhayairdīptaiḥ śiṁśumārairmahoragaiḥ ।
rākṣasāḥ prayayuḥ sarve kṛtvā ' 'kāśaṁ nirantaram ।
7.25.36 ॥ ॥

daityāśca śataśastatra kṛtavairāśca daivataiḥ ।
rāvaṇaṁ prekṣya gacchantamanvagacchanhi pṛṣṭhataḥ ।
7.25.37 ॥ ॥

sa tu gatvā madhupuraṁ praviśya ca daśānanaḥ ।
na dadarśa madhuṁ tatra bhaginīṁ tatra dṛṣṭavān ।
7.25.38 ॥ ॥

sā ca prahvāñjalirbhūtvā śirasā caraṇau gatā ।
7.25.39 ॥ ॥

tasya rākṣasarājasya trastā kumbhīnasī tadā ।
tāṁ samutthāpayāmāsa na bhetavyamiti bruvan ।
7.25.40 ॥ ॥

rāvaṇo rākṣasaśreṣṭhaḥ kiṁ cāpi karavāṇi te ।
sābravīdyadi me rājanprasannastvaṁ mahābhuja ।
bhartāraṁ na mamehādya hanturmahasi mānada ।
7.25.41 ॥ ॥

na hīdṛśaṁ bhayaṁ kiñcitkulastrīṇāmihocyate ।
bhayānāmapi sarveṣāṁ vaidhavyaṁ vyasanaṁ mahat ।
7.25.42 ॥ ॥

satyavāgbhava rājendra māmavekṣasva yācatīm ।
tvayāpyuktaṁ mahārāja na bhetavyamiti svayam ।
7.25.43 ॥ ॥

rāvaṇastvabravīddhṛṣṭaḥ svasāraṁ tatra saṁsthitām ।
kva cāsau tava bhartā vai mama śīghraṁ nivedyatām ।
7.25.44 ॥ ॥

saha tena gamiṣyāmi suralokaṁ jayāvahe ।
tava kāruṇyasauhārdānnivṛtto 'smi madhorvadhāt ।
7.25.45 ॥ ॥

ityuktā sā samutthāpya prasuptaṁ taṁ niśācaram ।
abravītsamprahṛṣṭeva rākṣasī sā patiṁ vacaḥ ।
7.25.46 ॥ ॥

eṣa prāpto daśagrīvo mama bhrātā mahābalaḥ ।
suralokajayākāṅkṣī sāhāyye tvāṁ vṛṇoti ca ।
7.25.47 ॥ ॥

tadasya tvaṁ sahāyārthaṁ sabandhurgaccha rākṣasa ।
snigdhasya bhajamānasya yuktamarthāya kalpitum ।
7.25.48 ॥ ॥

tasyāstadvacanaṁ śrutvā tathetyāha madhurvacaḥ ।
7.25.49 ॥ ॥

dadarśa rākṣasaśreṣṭhaṁ yathānyāyamupetya saḥ ।
pūjayamāsa dharmeṇa rāvaṇaṁ rākṣasādhipam ।
7.25.50 ॥ ॥

prāpya pūjāṁ daśagrīvo madhuveśmāni vīryavān ।
tatra caikāṁ niśāmuṣya gamanāyopacakrame ।
7.25.51 ॥ ॥

tataḥ kailāsamāsādya śailaṁ vaiśravaṇālayam ।
rākṣasendro mahendrābhaḥ senāmupaniveśayat ।
7.25.52 ॥