उत्तरकाण्डम्Uttara Kāṇḍa

nivartamānaḥ saṁhṛṣṭo rāvaṇassudurātmavān ।
jahre pathi narendrarṣidevagandharvakanyakāḥ ।
7.24.1 ॥ ॥

darśanīyāṁ hi rakṣaḥ sa kanyāṁ strīṁ vāpi paśyati ।
hatvā bandhujanaṁ tasyā vimāne tāṁ rurodha ha ।
7.24.2 ॥ ॥

evaṁ pannagakanyāśca rākṣasāsuramānuṣīḥ ।
yakṣadānavakanyāśca vimāne so 'dhyaropayat ।
7.24.3 ॥ ॥

tāśca sarvāḥ samaṁ duḥkhānmumucurbāṣpajaṁ jalam ।
tulyamagnyarciṣāṁ tatra śokāgnibhayasambhavam ।
7.24.4 ॥ ॥

tābhiḥ sarvānavadyābhirnadībhiriva sāgaraḥ ।
āpūritaṁ vimānaṁ tadbhayaśokāśivāśrubhiḥ ।
7.24.5 ॥ ॥

nāgagandharvakanyāśca maharṣitanayāśca yāḥ ।
daityadānavakanyāśca vimāne śataśo 'rudan ।
7.24.6 ॥ ॥

dīrghakeśyaḥ sucārvaṅgyaḥ pūrṇacandranibhānanāḥ ।
pīnastanyastathā vajravedimadhyasamaprabhāḥ ।
7.24.7 ॥ ॥

rathakūbarasaṅkāśaiḥ śroṇideśairmanoharāḥ ।
striyaḥ surāṅganāprakhyā niṣṭaptakanakaprabhāḥ ।
7.24.8 ॥ ॥

śokaduḥkhabhayatrastā vihvalāśca sumadhyamāḥ ।
tāsāṁ niśvāsavātena sarvataḥ sampradīpitam ।
7.24.9 ॥ ॥

agnihotramivābhāti sanniruddhāgnipuṣpakam ।
daśagrīvavaśaṁ prāptāstāstu śokākulāḥ striyaḥ ।
7.24.10 ॥ ॥

dīnavakrekṣaṇāḥ śyāmā mṛgyaḥ siṁhavaśā iva ।
kāciccintayatī tatra kiṁ nu māṁ bhakṣayiṣyati ।
7.24.11 ॥ ॥

kāciddadhyau suduḥkhārtā api māṁ mārayedayam ।
iti mātṛpita'nsmṛtvā bharta'nbhrāta'ṁstathaiva ca ।
duḥkhaśokasamāviṣṭā vilepuḥ sahitāḥ striyaḥ ।
7.24.12 ॥ ॥

kathaṁ nu khalu me putro bhaviṣyati mayā vinā ।
kathaṁ mātā kathaṁ bhrātā nimagnāḥ śokasāgare ।
7.24.13 ।
॥ ॥

hā kathaṁ nu kariṣyāmi bhartustasmādahaṁ vinā ।
mṛtyo prasādayāmi tvāṁ naya māṁ duḥkhabhāginīm ।
7.24.14 ॥ ॥

kinnu tadduṣkṛtaṁ karma purā dehāntare kṛtam ।
7.24.15 ॥ ॥

evaṁ sma duḥkhitāḥ sarvāḥ patitāḥ śokasāgare ।
na khalvidānīṁ paśyāmo duḥkhasyāsyāntamātmanaḥ ।
7.24.16 ॥ ॥

aho dhiṅmānuṣaṁ lokaṁ nāsti khalvadhamaḥ paraḥ ।
yaddurbalā balavatā bhartāro rāvaṇena naḥ ।
7.24.17 ॥ ॥

sūryeṇodayatā kāle nakṣatrāṇīva nāśitāḥ ।
aho subalavadrakṣo vadhopāyeṣu yujyate ।
7.24.18 ॥ ॥

aho durvṛttamāsthāya nātmānaṁ vaijugupsate ।
sarvathā sadṛśastāvadvikramo 'sya durātmanaḥ ।
7.24.19 ॥ ॥

idaṁ tvasadṛśaṁ karma paradārābhimarśanam ।
yasmādeṣa parakyāsu ramate rākṣasādhamaḥ ।
7.24.20 ॥ ॥

tasmādvai strīkṛtenaiva prāpsyate durmatirvadham ।
satībhirvaranārībhirevaṁ vākye 'bhyudīrite ।
7.24.21 ॥ ॥

nedurdundubhayaḥ khasthāḥ puṣpavṛṣṭiḥ papāta ca ।
śaptaḥ strībhiḥ sa tu samaṁ hataujā iva niṣprabhaḥ ।
7.24.22 ॥ ॥

pativratābhiḥ sādhvībhirbabhūva vimanā iva ।
evaṁ vilapitaṁ tāsāṁ śṛṇvanrākṣasapuṅgavaḥ ।
praviveśa purīṁ laṅkāṁ pūjyamāno niśācaraiḥ ।
7.24.23 ॥ ॥

etasminnantare ghorā rākṣasī kāmarūpiṇī ।
sahasā patitā bhūmau bhaginī rāvaṇasya sā ।
7.24.24 ॥ ॥

tāṁ svasāraṁ samutthāpya rāvaṇaḥ parisāntvayan ।
abravītkimidaṁ bhadre vaktukāmā 'si me drutam ।
7.24.25 ॥ ॥

sā bāṣpapariruddhākṣī raktākṣī vākyamabravīt ।
kṛtā 'smi vidhavā rājaṁstvayā balavatā balāt ।
7.24.26 ॥ ॥

ete rājaṁstvayā vīrā daityā vinihatā raṇe ।
kālakeyā iti khyātāḥ sahasrāṇi caturdaśa ।
7.24.27 ॥ ॥

prāṇebhyo 'pi garīyānme tatra bhartā mahābalaḥ ।
7.24.28 ॥ ॥

so 'pi tvayā hatastāta ripuṇā bhrātṛgṛdhnunā ।
tvayā 'smi nihatā rājansvayameva hi bandhunā ।
7.24.29 ॥ ॥

rājanvaidhavyaśabdaṁ ca bhokṣyāmi tvatkṛte hyaham ।
nanu nāma tvayā rakṣyo jāmātā samareṣvapi ।
sa tvayā nihato yuddhe svayameva na lajjase ।
7.24.30 ॥ ॥

evamukto daśagrīvo bhaginyā krośamānayā ।
abravītsāntvayitvā tāṁ sāmapūrvamidaṁ vacaḥ ।
7.24.31 ॥ ॥

alaṁ vatse ruditvā te na bhetavyaṁ ca sarvaśaḥ ।
dānamānaprasādaistvāṁ toṣayiṣyāmi yatnataḥ ।
7.24.32 ॥ ॥

yuddhapramatto vyākṣipto jayākāṅkṣī kṣipañcharān ।
nāvagacchāmi yuddheṣu svānparānvāpyahaṁ śubhe ।
7.24.33 ॥ ॥

jāmātaraṁ na jāne sma praharanyuddhadurmadaḥ ।
tenāsau nihataḥ saṅkhye mayā bhartā tava svasaḥ ।
7.24.34 ॥ ॥

asminkāle tu yatprāptaṁ tatkariṣyāmi te hitam ।
bhrāturaiśvaryayuktasya kharasya vasa pārśvataḥ ।
7.24.35 ॥ ॥

caturdaśānāṁ bhrātā te sahasrāṇāṁ bhaviṣyati ।
prabhuḥ prayāṇe dāne ca rākṣasānāṁ mahābalaḥ ।
7.24.36 ॥ ॥

tatra mātṛṣvaseyaste bhrātā 'yaṁ vai kharaḥ prabhuḥ ।
bhaviṣyati tavādeśaṁ sadā kurvanniśācaraḥ ।
7.24.37 ॥ ॥

śīghraṁ gacchatvayaṁ vīro daṇḍakānparirakṣitum ।
dūṣaṇo 'sya balādhyakṣo bhaviṣyati mahābalaḥ ।
7.24.38 ॥ ॥

tatra te vacanaṁ śūraḥ kariṣyati sadā kharaḥ ।
rakṣasāṁ kāmarūpāṇāṁ prabhureṣa bhaviṣyati ।
7.24.39 ॥ ॥

evamuktvā daśagrīvaḥ sainyamasyādideśa ha ।
caturdaśa sahasrāṇi rakṣasāṁ vīryaśālinām ।
7.24.40 ॥ ॥

sa taiḥ parivṛtassarvai rākṣasairghoradarśanaiḥ ।
āgacchata kharaḥ śīghraṁ daṇḍakānakutobhayaḥ ।
7.24.41 ॥ ॥

sa tatra kārayāmāsa rājyaṁ nihatakaṇṭakam ।
sā ca śūrpaṇakhā tatra nyavasaddaṇḍakāvane ।
7.24.42 ॥