उत्तरकाण्डम्Uttara Kāṇḍa

tato jitvā daśagrīvo yamaṁ tridaśapuṅgavam ।
rāvaṇastu raṇaślāghī svasahāyāndadarśa ha ।
7.23.1 ॥ ॥

tato rudhirasiktāṅgaṁ prahārairjarjarīkṛtam ।
rāvaṇaṁ rākṣasā dṛṣṭvā hyaṣṭavat samupāgaman ।
7.23.2 ॥ ॥

jayena vardhayitvā ca mārīcapramukhāstataḥ ।
puṣpakaṁ bhejire sarve sāntvitā rāvaṇena tu ।
7.23.3 ॥ ॥

tato rasātalaṁ gacchan praviṣṭaḥ payasāṁ nidhim ।
daityoragagaṇādhyuṣṭaṁ varuṇena surakṣitam ।
7.23.4 ॥ ॥

sa tu bhogavatīṁ gatvā purīṁ vāsukipālitām ।
kṛtvā nāgānvaśe hṛṣṭo yayau maṇimayīṁ purīm ।
7.23.5 ॥ ॥

nivātakavacāstatra daityā labdhavarā vasan ।
rākṣasāntānsamāgamya yuddhāya samupāhvayat ।
7.23.6 ॥ ॥

te tu sarve suvikrāntā daiteyā balaśālinaḥ ।
nānāpraharaṇāstatra prahṛṣṭā yuddhadurmadāḥ ।
7.23.7 ॥ ॥

śūlaistriśūlaiḥ kuliśaiḥ paṭṭiśāsiparaśvadhaiḥ ।
anyonyaṁ bibhiduḥ kruddhā rākṣasā dānavāstathā ।
7.23.8 ॥ ॥

teṣāṁ tu yudhyamānānāṁ sāgraḥ saṁvatsaro gataḥ ।
na cānyatarayostatra vijayo vā kṣayo 'pi vā ।
7.23.9 ॥ ॥

tataḥ pitāmahastatra trailokyagatiravyayaḥ ।
ājagāma drutaṁ devo vimānavaramāsthitaḥ ।
7.23.10 ॥ ॥

nivātakavacānāṁ tu nivārya raṇakarma tat ।
vṛddhaḥ pitāmaho vākyamuvāca viditārthavat ।
7.23.11 ॥ ॥

nahyayaṁ rāvaṇo yuddhe śakyo jetuṁ surāsuraiḥ ।
na bhavantaḥ kṣayaṁ netumapi sāmaradānavaiḥ ।
7.23.12 ॥ ॥

rākṣasasya sakhitvaṁ ca bhavadbhiḥ saha rocate ।
avibhaktāśca sarvārthāḥ suhṛdāṁ nātra saṁśayaḥ ।
7.23.13 ॥ ॥

tato 'gnisākṣikaṁ sakhyaṁ kṛtavāṁstatra rāvaṇaḥ ।
nivātakavacaiḥ sārdhaṁ prītimānabhavattadā ।
7.23.14 ॥ ॥

arthatastairyathānyāyaṁ saṁvatsaramathoṣitaḥ ।
svapurānnirviśeṣaṁ ca priyaṁ prāpto daśānanaḥ ।
7.23.15 ॥ ॥

tatopadhārya māyānāṁ śatamekaṁ samāptavān ।
salilendrapurānveṣī bhramati sma rasātalam ।
7.23.16 ॥ ॥

tato 'śmanagaraṁ nāma kālakeyairadhiṣṭhitam ।
gatvā tu kālakeyāṁśca hatvā tatra balotkaṭān ।
7.23.17 ॥ ॥

śūrpaṇakhyāśca bhartāramasinā prācchinattadā ।
śyālaṁ ca balavantaṁ ca vidyujjihvaṁ balotkaṭam ।
jihvayā saṁlihantaṁ ca rākṣasaṁ samare tathā ।
7.23.18 ॥ ॥

taṁ vijitya muhūrtena jaghne daityāṁścatuḥśatam ।
7.23.19 ॥ ॥

tataḥ pāṇḍurameghābhaṁ kailāsamiva bhāsvaram ।
varuṇasyālayaṁ divyamapaśyadrākṣasādhipaḥ ।
7.23.20 ॥ ॥

kṣarantīṁ ca payastatra surabhiṁ gāmavasthitām ।
yasyāḥ payobhiniṣyandātkṣīrodo nāma sāgaraḥ ।
7.23.21 ॥

dadarśa rāvaṇastatra govṛṣendravarāraṇim ।
yasmāccandraḥ prabhavati śītaraśmirniśākaraḥ ।
7.23.22 ॥ ॥

yaṁ samāśritya jīvanti phenapāḥ paramarṣayaḥ ।
amṛtaṁ yatra cotpannaṁ svadhā ca svadhabhojinām ।
7.23.23 ॥ ॥

yāṁ bruvanti narā loke surabhiṁ nāma nāmataḥ ।
pradakṣiṇaṁ tu tāṁ kṛtvā rāvaṇaḥ paramādbhutām ।
7.23.24 ॥ ॥

praviveśa mahāghoraṁ guptaṁ bahuvidhairbalaiḥ ।
tato dhārāśatākīrṇaṁ śāradābhranibhaṁ tadā ।
nityaprahṛṣṭaṁ dadṛśe varuṇasya gṛhottamam ।
7.23.25 ॥ ॥

tato hatvā balādhyakṣānsamare taiśca tāḍitaḥ ।
abravīcca tato yodhānrājā śīghraṁ nivedyatām ।
7.23.26 ॥ ॥

yuddhārthī rāvaṇaḥ prāptastasya yuddhaṁ pradīyatām ।
vada vā na bhayaṁ te 'sti nirjito 'smīti sāñjaliḥ ।
7.23.27 ॥ ॥

etasminnantare kruddhā varuṇasya mahātmanaḥ ।
putrāḥ pautrāśca niṣkrāmangauśca puṣkara eva ca ।
7.23.28 ॥ ॥

te tu vīryaguṇopetā balaiḥ parivṛtāḥ svakaiḥ ।
yuṅktvā rathānkāmagamānudyadbhāsvaravarcasaḥ ।
7.23.29 ॥ ॥

tato yuddhaṁ samabhavaddāruṇaṁ romaharṣaṇam ।
salilendrasya putrāṇāṁ rāvaṇasya ca dhīmataḥ ।
7.23.30 ॥ ॥

amātyaiśca mahāvīryairdaśagrīvasya rakṣasaḥ ।
vāruṇaṁ tadbalaṁ kṛtsnaṁ kṣaṇena vinipātitam ।
7.23.31 ॥ ॥

samīkṣya svabalaṁ saṅkhye varuṇasya sutāstadā ।
arditāḥ śarajālena nivṛttā raṇakarmaṇaḥ ।
7.23.32 ॥ ॥

mahītalagatāste tu rāvaṇaṁ dṛśya puṣpake ।
ākāśamāśu viviśuḥ syandanaiḥ śīghragāmibhiḥ ।
7.23.33 ॥ ॥

mahādāsīttatasteṣāṁ tulyaṁ sthānamavāpya tat ।
ākāśayuddhaṁ tumulaṁ devadānavayoriva ।
7.23.34 ॥ ॥

tataste rāvaṇaṁ yuddhe śaraiḥ pāvakasannibhaiḥ ।
vimukhīkṛtya santuṣṭā vinedurvividhānravān ।
7.23.35 ॥ ॥

tato mahodaraḥ kruddho rājānaṁ dṛśya dharṣitam ।
tyaktvā mṛtyubhayaṁ vīro yuddhakāṅkṣī vyalokayat ।
7.23.36 ॥ ॥

tena te dāruṇā yuddhe kāmagāḥ pavanopamāḥ ।
mahodareṇa gadayā hatā vai prayayuḥ kṣitim ।
7.23.37 ॥ ॥

teṣāṁ varuṇaputrāṇāṁ hatvā yodhānhayāñchatān ।
mumocāśu mahānādaṁ virathānprekṣya tānsthitān ।
7.23.38 ॥ ॥

te tu teṣāṁ rathāḥ sāśvāḥ saha sārathibhirhataiḥ ।
mahodareṇa nihatāḥ patitāḥ pṛthivītale ।
7.23.39 ॥ ॥

te tu tyaktvā rathānputrā varuṇasya mahātmanaḥ ।
ākāśe viṣṭhitāḥ śūrāḥ svaprabhāvānna vivyathuḥ ।
7.23.40 ॥ ॥

dhanūṁṣi kṛtvā sajjāni vinirbhidya mahodaram ।
rāvaṇaṁ samare kruddhāḥ sahitāḥ samabhidravan ।
7.23.41 ॥ ॥

sāyakaiścāpavibhraṣṭairvajrakalpaiḥ sudāruṇaiḥ ।
dārayanti sma saṅkruddhā meghā iva mahāgirim ।
7.23.42 ॥ ॥

tataḥ kruddho daśagrīvaḥ kālāgniriva nirgataḥ ।
śaravarṣairmahāghoraisteṣāṁ marmasvatāḍayat ।
7.23.43 ॥ ॥

tatastenaiva sahasā sīdanti sma padātayaḥ ।
musalāni vicitrāṇi tato bhallaśatāni ca ।
7.23.44 ॥ ॥

paṭṭiśāṁścaiva śaktīśca śataghnīstomarāṁstathā ।
pātayāmāsa durdharṣasteṣāmupari viṣṭhitaḥ ।
7.23.45 ॥ ॥

apaviddhāstu te vīrā viniṣpetuḥ padātayaḥ ।
mahāpaṅkamivāsādya kuñjarāṣṣaṣṭihāyanāḥ ।
7.23.46 ॥ ॥

sīdamānānsutāndṛṣṭvā vihvalānsumahaujasaḥ ।
nanāda rāvaṇo harṣānmahānambudharo yathā ।
7.23.47 ॥ ॥

tato rakṣo mahānādānmuktvā hanti sma vāruṇān ।
nānāpraharaṇopetairdhārāpātairivāmbudaḥ ।
7.23.48 ॥ ॥

tataste vimukhāḥ sarve patitā dharaṇītale ।
raṇātsvapuruṣaiḥ śīghraṁ gṛhāṇyeva praveśitāḥ ।
7.23.49 ॥ ॥

tānabravīttato rakṣo varuṇāya nivedyatām ।
7.23.50 ॥ ॥

rāvaṇaṁ tvabravīnmantrī prahasto (prahaso) nāma vāruṇaḥ ।
gataḥ khalu mahārājo brahmalokaṁ jaleśvaraḥ ।
7.23.51 ॥ ॥

gāndharvaṁ varuṇaḥ śrotuṁ yaṁ tvamāhvayase yudhi ।
tatkiṁ tava vṛthā vīra pariśramya gate nṛpe ।
ye tu sannihitā vīrāḥ kumārāste parājitāḥ ।
7.23.52 ॥ ॥

rākṣasendrastu tacchrutvā nāma viśrāvya cātmanaḥ ।
harṣānnādaṁ vimuñcanvai niṣkrānto varuṇālayāt ।
7.23.53 ॥ ॥

āgatastu pathā yena tenaiva vinivṛtya saḥ ।
laṅkāmabhimukho rakṣo nabhastalagato yayau ।
7.23.54 ॥