उत्तरकाण्डम्Uttara Kāṇḍa

evaṁ sañcintya viprendo jagāma laghuvikramaḥ ।
ākhyātuṁ tadyathāvṛttaṁ yamasya sadanaṁ prati ।
7.21.1 ॥ ॥

apaśyatsa yamaṁ tatra devamagnipuraskṛtam ।
vidhānamupatiṣṭhantaṁ prāṇino yasya yādṛśam ।
7.21.2 ॥ ॥

sa tu dṛṣṭvā yamaḥ prāptaṁ maharṣiṁ tatra nāradam ।
abravītsukhamāsīnamarghyamāvedya dharmataḥ ।
7.21.3 ॥ ॥

kaccitkṣemaṁ tu devarṣe kacciddharmo na naśyati ।
kimāgamanakṛtyaṁ te devagandharvasevita ।
7.21.4 ॥ ॥

abravīttu tadā vākyaṁ nārado bhagavānṛṣiḥ ।
śrūyatāmabhidhāsyāmi vidhānaṁ ca vidhīyatām ।
7.21.5 ॥ ॥

eṣa nāmno daśagrīvaḥ pitṛrāja niśācaraḥ ।
upayāti vaśaṁ netuṁ vikramaistvāṁ sudurjayam ।
7.21.6 ॥ ॥

etena kāraṇenāhaṁ tvarito hyāgataḥ prabho ।
daṇḍapraharaṇasyādya tava kiṁ nu bhaviṣyati ।
7.21.7 ॥ ॥

etasminnantare durādaṁśumantamivoditam ।
dadṛśurdīptamāyāntaṁ vimānaṁ tasya rakṣasaḥ ।
7.21.8 ॥ ॥

taṁ deśaṁ prabhayā tasya puṣpakasya mahābalaḥ ।
kṛtvā vitimiraṁ sarvaṁ samīpaṁ so 'bhyavartata ।
7.21.9 ॥ ॥

so 'paśyatsa mahābāhurdaśagrīvastatastataḥ ।
prāṇinaḥ sukṛtaṁ karma bhuñjānāṁścaiva duṣkṛtam ।
7.21.10 ॥ ॥

apaśyatsainikāṁścāsya yamasyānucaraiḥ saha ।
yamasya puruṣairugrairghorarūpairbhayānakaiḥ ।
7.21.11 ॥ ॥

dadarśa vadhyamānāṁśca kliśyamānāṁśca dehinaḥ ।
krośataśca mahānādaṁ tīvraniṣṭanatatparān ।
7.21.12 ॥ ॥

kṛmibhirbhakṣyamāṇāṁśca sārameyaiśca dāruṇaiḥ ।
7.21.13 ॥ ॥

kṣotrāyāsakarā vāco vadataśca bhayāvahāḥ ।
santāryamāṇānvaitaraṇīṁ bahuśaḥ śoṇitodakām ।
7.21.14 ॥ ॥

vālukāsu ca taptāsu tapyamānānmuhūrmuhuḥ ।
asipatravane caiva bhidyamānānadhārmikān ।
7.21.15 ॥ ॥

raurave kṣāranadyāṁ ca kṣuradhārāsu caiva hi ।
pānīyaṁ yācamānāṁśca tṛṣitānkṣudhitānapi ।
7.21.16 ॥ ॥

śavabhūtānkṛśāndīnānvivarṇānmuktamūrdhajān ।
malapaṅkadharāndīnānrūkṣāṁśca paridhāvataḥ ।
7.21.17 ॥ ॥

dadarśa rāvaṇo mārge śataśo 'tha sahasraśaḥ ।
kāṁścicca gṛhamukhyeṣu gītavāditraniḥsvanaiḥ ।
pramodamānānadrākṣīdrāvaṇaḥ sukṛtaiḥ svakaiḥ ।
7.21.18 ॥ ॥

gaurasaṁ gopradātāro hyannaṁ caivānnadāyinaḥ ।
gṛhāṁśca gṛhadātāraḥ svakarmaphalamaśnataḥ ।
7.21.19 ॥ ॥

suvarṇamaṇimuktābhiḥ pramadābhiralaṅkṛtān ।
7.21.20 ॥ ॥

dhārmikānaparāṁstatra dīpyamānānsvatejasā ।
dadarśa sumahābāhū rāvaṇo rākṣasādhipaḥ ।
7.21.21 ॥ ॥

tatastānbhidyamānāṁśca karmabhirduṣkṛtaiḥ svakaiḥ ।
rāvaṇo mocayāmāsa vikrameṇa balādbalī ।
7.21.22 ॥ ॥

prāṇino mocitāstena daśagrīveṇa rakṣasā ।
sukhamāpurmuhūrtaṁ te hyatarkitamacintitam ।
7.21.23 ॥ ॥

preteṣu mucyamāneṣu rākṣasena mahīyasā ।
pretagopāḥ susaṅkruddhā rākṣasendramabhidravan ।
7.21.24 ॥ ॥

tato halahalāśabdaḥ sarvadigbhyaḥ samutthitaḥ ।
dharmarājasya yodhānāṁ śūrāṇāṁ sampradhāvatām ।
7.21.25 ॥ ॥

te prāsaiḥ parighaiḥ śūlairmusalaiḥ śaktitomaraiḥ ।
puṣpakaṁ samavarṣanta śūrāḥ śatasahasraśaḥ ।
7.21.26 ॥ ॥

tasyāsanāni prāsādānvedikāstoraṇāni ca ।
puṣpakasya babhañjuste śīghraṁ madhukarā iva ।
7.21.27 ॥ ॥

devaniṣṭhānabhūtaṁ tadvimānaṁ puṣpakaṁ mṛdhe ।
bhajyamānaṁ tathaivāsīdakṣayaṁ brahmatejasā ।
7.21.28 ॥ ॥

asaṅkhyā sumahatyāsīttasya senā mahātmanaḥ ।
śūrāṇāmagrayāta'ṇāṁ sahasrāṇi śatāni ca ।
7.21.29 ॥ ॥

tato vṛkṣaiśca śailaiśca prāsādānāṁ śataistathā ।
tataste sacivāstasya yathākāmaṁ yathābalam ।
ayudhyanta mahāvīrāḥ sa ca rājā daśānanaḥ ।
7.21.30 ॥ ॥

te tu śoṇitadigdhāṅgāḥ sarvaśastrasamāhatāḥ ।
amātyā rākṣasendrasya cakrurāyodhanaṁ mahat ।
7.21.31 ॥ ॥

anyonyaṁ te mahābhāgā jaghnuḥ praharaṇairbhṛśam ।
yamasya ca mahābāho rāvaṇasya ca mantriṇaḥ ।
7.21.32 ॥ ॥

amātyāṁstāṁstu santyajya yamayodhā mahābalāḥ ।
tameva cābhyadhāvanta śūlavarṣairdaśānanam ।
7.21.33 ॥ ॥

tataḥ śoṇitadigdhāṅgaḥ prahārairjarjarīkṛtaḥ ।
phullāśoka ivābhāti puṣpake rākṣasādhipaḥ ।
7.21.34 ॥ ॥

sa tu śūlagadāpāsāñchaktitomarasāyakān ।
musalāni śilāvṛkṣānmumocāstrabalādbalī ।
7.21.35 ॥ ॥

tarūṇāṁ ca śilānāṁ ca śastrāṇāṁ cātidāruṇam ।
yamasainyeṣu tadvarṣaṁ papāta dharaṇītale ।
7.21.36 ॥ ॥

tāṁstu sarvānvinirbhidya tadastramapahatya ca ।
jaghnuste rākṣasaṁ ghoramekaṁ śatasahasraśaḥ ।
7.21.37 ॥ ॥

parivārya ca taṁ sarve śailaṁ moghotkarā iva ।
bhindipālaiśca śūlaiśca nirucchvāsamapothayan ।
7.21.38 ॥ ॥

vimuktakavacaḥ kruddhaḥ siktaḥ śoṇitavisravaiḥ ।
tataḥ sa puṣpakaṁ tyaktvā pṛthivyāmavatiṣṭhata ।
7.21.39 ॥ ॥

tataḥ sa kārmukī vāṇī samare cābhivartata ।
labdhasañjño muhūrtena kruddhastasthau yathāntakaḥ ।
7.21.40 ॥ ॥

tataḥ pāśupataṁ divyamastraṁ sandhāya kārmuke ।
tiṣṭha tiṣṭheti tānuktvā taccāpaṁ vicakarṣa sa ।
7.21.41 ॥ ॥

ākarṇātsa vikṛṣyātha cāpamindrārirāhave ।
mumoca taṁ śaraṁ kruddhastripure śaṅkaro yathā ।
7.21.42 ॥ ॥

tasya rūpaṁ śarasyāsītvidhūmajvālamaṇḍalam ।
vanaṁ dahiṣyato gharme dāvāgneriva mūrcchataḥ ।
7.21.43 ॥ ॥

jvālāmālī sa tu śaraḥ kravyādānugato raṇe ।
mukto gulmāndrumāṁścāpi bhasma kṛtvā pradhāvati ।
7.21.44 ॥ ॥

te tasya tejasā dagdhāḥ sainyā vaivasvatasya tu ।
raṇe tasminnipatitā dāvadagdhā nagā iva ।
7.21.45 ॥ ॥

tatastu sicavaiḥ sārdhaṁ rākṣaso bhīmavikramaḥ ।
nanāda sumahānādaṁ kampayanniva medinīm ।
7.21.46 ॥