उत्तरकाण्डम्Uttara Kāṇḍa

praviṣṭāyāṁ hutāśaṁ tu vedavatyāṁ sa rāvaṇaḥ ।
puṣpakaṁ tu samāruhya paricakrāma medinīm ।
7.18.1 ॥ ॥

tato maruttaṁ nṛpatiṁ yajantaṁ saha daivataiḥ ।
uśīrabījamāsādya dadarśa sa tu rāvaṇaḥ ।
7.18.2 ॥ ॥

saṁvarto nāma brahmarṣiḥ sākṣādbhrātā bṛhaspateḥ ।
yājayāmāsa dharmajñaḥ sarvairdevagaṇairvṛtaḥ ।
7.18.3 ॥ ॥

dṛṣṭvā devāstu tadrakṣo varadānena durjayam ।
tiryagyoniṁ samāviṣṭāstasya darśanabhīravaḥ ।
7.18.4 ॥ ॥

indro mayūraḥ saṁvṛtto dharmarājastu vāyasaḥ ।
kṛkalāso dhanādhyakṣo haṁsaśca varuṇo 'bhavat ।
7.18.5 ॥ ॥

anyeṣvapi gateṣvevaṁ deveṣvariniṣūdana ।
rāvaṇaḥ prāviśadyajñaṁ sārameya ivāśuciḥ ।
7.18.6 ॥ ॥

taṁ ca rājānamāsādya rāvaṇo rākṣasādhipaḥ ।
prāha yuddhaṁ prayaccheti nirjito 'smīti vā vada ।
7.18.7 ॥ ॥

tato marutto nṛpatiḥ ko bhavānityuvāca tam ।
apahāsaṁ tato muktvā rāvaṇo vākyamabravīt ।
7.18.8 ॥ ॥

akutūhalabhāvena prīto 'smi tava pārthiva ।
dhanadasyānujaṁ yo māṁ nāvagacchasi rāvaṇam ।
7.18.9 ॥ ॥

triṣu lokeṣu ko 'nyo 'sti yo na jānāti me balam ।
bhrātaraṁ yena nirjitya vimānamidamāhṛtam ।
tato maruttaḥ sa nṛpastaṁ rāvaṇamathābravīt ।
7.18.10 ॥ ॥

dhanyaḥ khalu bhavānyena jyeṣṭho bhrātā raṇe jitaḥ ।
na tvayā sadṛśaḥ ślādhyastriṣu lokeṣu vidyate ।
7.18.11 ॥ ॥

nādharmasahitaṁ ślādhyaṁ tallokaṁ pratisaṁhitam ।
karma daurātmyakaṁ kṛtvā ślāghyase bhrātṛnirjayāt ।
7.18.12 ॥ ॥

ka tvaṁ prākkevalaṁ dharmaṁ caritvā labdhavānvaram ।
śrūtapūrvaṁ hi na mayā bhāṣase yādṛśaṁ svayam ।
7.18.13 ॥ ॥

tiṣṭhedānīṁ na me jīvanpratiyāsyasi durmate ।
adya tvāṁ niśitairbāṇaiḥ preṣayāmi yamakṣayam ।
7.18.14 ॥ ॥

tataḥ śarāsanaṁ gṛhya sāyakāṁśca narādhipaḥ ।
raṇāya niryayau kruddhaḥ saṁvarto mārgamāvṛṇot ।
7.18.15 ॥ ॥

so 'bravītsnehasaṁyuktaṁ maruttaṁ taṁ mahānṛṣiḥ ।
śrotavyaṁ yadi madvākyaṁ samprahāro na te kṣamaḥ ।
7.18.16 ॥ ॥

māheśvaramidaṁ satramasamāptaṁ kulaṁ dahet ।
7.18.17 ॥ ॥

dīkṣitasya kuto yuddhaṁ krodhitvaṁ dīkṣite kutaḥ ।
saṁśayaśca jaye nityaṁ rākṣasaśca sudurjayaḥ ।
7.18.18 ॥ ॥

sa nivṛtto gurorvākyānmaruttaḥ pṛthivīpatiḥ ।
visṛjya saśaraṁ cāpaṁ svastho makhamukho 'bhavat ।
7.18.19 ॥ ॥

tatastaṁ nirjitaṁ matvā ghoṣayāmāsa vai śukaḥ ।
rāvaṇo jayatītyuccairharṣānnādaṁ vimuktavān ।
7.18.20 ॥ ॥

tānbhakṣayitvā tatrasthānmaharṣīnyajñamāgatān ।
vitṛpto rudhiraisteṣāṁ punaḥ samprayayau mahīm ।
7.18.21 ॥ ॥

rāvaṇe tu gate devāḥ sendrāścaiva divaukasaḥ ।
tataḥ svāṁ yonimāsādya tāni sattvāni cābruvan ।
7.18.22 ॥ ॥

harṣāttadābravīdindro mayūraṁ nīlabarhiṇam ।
prīto 'smi tava dharmajña bhujaṅgāddhi na te bhayam ।
7.18.23 ॥ ॥

idaṁ netrasahasraṁ tu yattvadbarhe bhaviṣyati ।
varṣamāṇe mayi mudaṁ prāpsyase prītilakṣaṇām ।
evamindro varaṁ prādānmayūrasya sureśvaraḥ ।
7.18.24 ॥ ॥

nīlāḥ kila purā barhā mayūrāṇāṁ narādhipa ।
surādhipādvaraṁ prāpya gatāḥ sarve 'pi barhiṇaḥ ।
7.18.25 ॥ ॥

dharmarājo 'bravīdrāma prāgvaṁśe vāyasaṁ sthitam ।
pakṣiṁstavāsmi suprītaḥ prītasya vacanaṁ śṛṇu ।
7.18.26 ॥ ॥

yathānye vividhai rogai; pīḍyante prāṇino mayā ।
te na te prabhaviṣyanti mayi prīte na saṁśayaḥ ।
7.18.27 ॥ ॥

mṛtyutaste bhayaṁ nāsti varānmama vihaṅgama ।
yāvattvāṁ na vadhiṣyanti narāstāvadbhaviṣyasi ।
7.18.28 ॥ ॥

ete madviṣayasthā vai mānavāḥ kṣudbhayārditāḥ ।
tvayi bhukte tu tṛptāste bhaviṣyanti sabāndhavāḥ ।
7.18.29 ॥ ॥

varuṇastvabravīddhaṁsaṁ gaṅgātoyavihāriṇam ।
śrūyatāṁ prītisaṁyuktaṁ vacaḥ patraratheśvara ।
7.18.30 ॥ ॥

varṇo manoharaḥ saumyaścandramaṇḍalasannibhaḥ ।
bhaviṣyati tavodagraḥ śuddhaphenasamaprabhaḥ ।
7.18.31 ॥ ॥

maccharīraṁ samāsādya kānto nityaṁ bhaviṣyasi ।
prāpsyase cātulāṁ prītimetanme prītilakṣaṇam ।
7.18.32 ॥ ॥

haṁsānāṁ hi purā rāma nīlavarṇaḥ sapāṇḍuraḥ ।
pakṣā nīlāgrasaṁvītāḥ kroḍāḥ śaṣpāgranirmalāḥ ।
7.18.33 ॥ ॥

athābravīdvaiśravaṇaḥ kṛkalāsaṁ girau sthitam ।
hairaṇyaṁ samprayacchāmi varṇaṁ prītastavāpyaham ।
7.18.34 ॥ ॥

sadravyaṁ ca śiro nityaṁ bhaviṣyati tavākṣayam ।
eṣa kāñcanako varṇo matprītyā te bhaviṣyati ।
7.18.35 ॥ ॥

evaṁ dattvā varāṁstebhyastasminyajñotsave surāḥ ।
nivṛttāḥ saha rājñā te punaḥ svabhavanaṁ gatāḥ ।
7.18.36 ॥