उत्तरकाण्डम्Uttara Kāṇḍa

tatastām̐llakṣya vitrastānyakṣendrāṁśca sahasraśaḥ ।
dhanādhyakṣo mahāyakṣaṁ māṇicāramathābravīt ।
7.15.1 ॥ ॥

rāvaṇaṁ jahi yakṣendra durvṛttaṁ pāpacetasam ।
śaraṇaṁ bhava vīrāṇāṁ yakṣāṇāṁ yuddhaśālinām ।
7.15.2 ॥ ॥

evamukto mahābāhurmāṇibhadraḥ sudurjayaḥ ।
vṛto yakṣasahasraistu caturbhiḥ samayodhayat ।
7.15.3 ॥ ॥

te gadāmusalaprāsaiḥ śaktitomaramudgaraiḥ ।
abhighnantastadā yakṣā rākṣasānsamupādravan ।
7.15.4 ॥ ॥

kurvantastumulaṁ yuddhaṁ carantaḥ śyenavallaghu ।
bāḍhaṁ prayacchannecchāmi dīyatāmiti bhāṣiṇaḥ ।
7.15.5 ॥ ॥

tato devāḥ sagandharvā ṛṣayo brahmavādinaḥ ।
dṛṣṭvā tattumulaṁ yuddhaṁ paraṁ vismayamāgaman ।
7.15.6 ॥ ॥

yakṣāṇāṁ tu prahastena sahasraṁ nihataṁ raṇe ।
mahodareṇa cānindyaṁ sahasramaparaṁ hatam ।
7.15.7 ॥ ॥

kruddhena ca tadā rājanmārīcena yuyutsunā ।
nimeṣāntaramātreṇa dve sahasre nipātite ।
7.15.8 ॥ ॥

kva ca yakṣārjavaṁ yuddhaṁ kva ca māyābalāśrayam ।
rakṣasāṁ puruṣavyāghra tena te 'bhyadhikā yudhi ।
7.15.9 ॥ ॥

dhūmrākṣeṇa samāgamya māṇibhadro mahāraṇe ।
musalenorasi krodhāttaḍito na ca kampitaḥ ।
7.15.10 ॥ ॥

tato gadāṁ samāvidhya māṇibhadreṇa rākṣasaḥ ।
dhūmrākṣastāḍito mūrdhni vihvalaḥ sa papāta ha ।
7.15.11 ॥ ॥

dhūmrākṣaṁ tāḍitaṁ dṛṣṭvā patitaṁ śoṇitokṣitam ।
abhyadhāvata saṅgrāme māṇibhadraṁ daśānanaḥ ।
7.15.12 ॥ ॥

taṁ kruddhamabhidhāvantaṁ māṇibhadro daśānanam ।
śaktibhistāḍayāmāsa tisṛbhiryakṣapuṅgavaḥ ।
7.15.13 ॥ ॥

tāḍito māṇibhadrasya mukuṭe prāharadraṇe ।
tasya tena prahārema mukuṭaṁ pārśvamāgatam ।
7.15.14 ॥ ॥

tataḥ saṁyudhyamānena viṣṭabdho na vyakampata ।
tadāprabhṛti yakṣo 'sau pārśvamauliriti smṛtaḥ ।
sannādaḥ sumahānrājaṁstasminśaile 'bhyavartata ।
7.15.15 ॥ ॥

tato dūrātpradadṛśe dhanādhyakṣo gadādharaḥ ।
śukraprauṣṭhapadābhyāṁ ca padmaśaṅkhasamāvṛtaḥ ।
7.15.16 ॥ ॥

sa dṛṣṭvā bhrātaraṁ saṅkhye śāpādvibhraṣṭagauravam ।
uvāca vacanaṁ dhīmānyuktaṁ paitāmahe kule ।
7.15.17 ॥ ॥

yanmayā vāryamāṇastvaṁ nāvagacchasi durmate ।
paścādasya phalaṁ prāpya jñāsyase nirayaṁ gataḥ ।
7.15.18 ॥ ॥

yo hi mohādviṣaṁ pītvā nāvagacchati durmatiḥ ।
sa tasya pariṇāmānte jānīte karmaṇaḥ phalam ।
7.15.19 ॥ ॥

devatā nābhinandanti dharmayuktena kenacit ।
yena tvamīdṛśaṁ bhāvaṁ nītassannāvabuddhyase ।
7.15.20 ॥ ॥

mātaraṁ pitaraṁ yo hi ācāryaṁ cāvamanyate ।
sa paśyati phalaṁ tasya pretarājavaśaṁ gataḥ ।
7.15.21 ॥ ॥

adhruve hi śarīre yo na karoti taporjanam ।
sa paścāttapyate mūḍho mṛto dṛṣṭvā ' 'tmano gatim ।
7.15.22 ॥ ॥

dharmādrājyaṁ dhanaṁ saukhyamadharmādduḥkhameva ca ।
tasmāddharmaṁ sukhārthāya kuryātpāpaṁ visarjayet ।
7.15.23 ॥ ॥

pāpasya hi phalaṁ duḥkhaṁ tadbhoktavyamihātmanā ।
tasmādātmāpaghātārthaṁ mūḍhaḥ pāpaṁ kariṣyati ।
7.15.24 ॥ ॥

kasya cinna hi durbuddheśchandato jāyate matiḥ ।
devaṁ ceṣṭayate sarvaṁ hato daivena hanyate ।
yādṛśaṁ kurute karma tādṛśaṁ phalamaśnute ।
7.15.25 ॥ ॥

buddhirūpaṁ phalaṁ putrāñchauryaṁ dhīratvameva ca ।
prāpnuvanti narā loke nirjitaṁ puṇyakarmabhiḥ ।
7.15.26 ॥ ॥

evaṁ nirayagāmī tvaṁ yasya te matirīdṛśī ।
na tvāṁ samabhibhāṣiṣye 'sadvṛtteṣveva nirṇayaḥ ।
7.15.27 ॥ ॥

evamuktāstatastena tasyāmātyāḥ samāhatāḥ ।
mārīcapramukhāḥ sarve vimukhā vipradudruvuḥ ।
7.15.28 ॥ ॥

tatastena daśagrīvo yakṣendreṇa mahātmanā ।
gadayābhihato mūrdhni na ca sthānātprakampitaḥ ।
7.15.29 ॥ ॥

tatastau rāma nighnantau tadānyonyaṁ mahāmṛdhe ।
na vihvalau na ca śrāntau babhūvaturamarṣaṇau ।
7.15.30 ॥ ॥

āgneyamastraṁ tasmai sa mumoca dhanadastadā ।
rākṣasendro vāruṇena tadastraṁ pratyavārayat ।
7.15.31 ॥ ॥

tato māyāṁ praviṣṭo 'sau rākṣasīṁ rākṣaseśvaraḥ ।
rūpāṇāṁ śatasāhasraṁ vināśāya cakāra ca ।
7.15.32 ॥ ॥

vyāghro varāho jīmūtaḥ parvataḥ sāgaro drumaḥ ।
yakṣo daityasvarūpī ca so 'dṛśyata daśānanaḥ ।
7.15.33 ॥ ॥

bahūni ca karoti sma dṛśyante na tvasau tataḥ ।
pratigṛhya tato rāma mahadastraṁ daśānanaḥ ।
7.15.34 ॥ ॥

jaghāna mūrdhni dhanadaṁ vyāviddhya mahatīṁ gadām ।
evaṁ sa tenābhihato vihvalaḥ śoṇitokṣitaḥ ।
7.15.35 ॥ ॥

kṛttamūla ivāśoko nipapāta dhanādhipaḥ ।
7.15.36 ॥ ॥

tataḥ padmādibhistatra nidhibhiḥ sa tadā vṛtaḥ ।
dhanadocchvāsitastaistu vanamānīya nandanam ।
7.15.37 ॥ ॥

nirjitya rākṣasendrastaṁ dhanadaṁ hṛṣṭamānasaḥ ।
puṣpakaṁ tasya jagrāha vimānaṁ jayalakṣaṇam ।
7.15.38 ॥ ॥

kāñcanastambhasaṁvītaṁ vaiḍūryamaṇitoraṇam ।
muktājālapraticchannaṁ sarvakāmaphaladrumam ।
7.15.39 ॥ ॥

manojavaṁ kāmagamaṁ kāmarūpaṁ vihaṅgamam ।
maṇikāñcanasopānaṁ taptakāñcanavedikam ।
7.15.40 ॥ ॥

devopavāhyamakṣayyaṁ sadādṛṣṭimanaḥsukham ।
bahvāścaryaṁ bhakticitraṁ brahmaṇā parinirmitam ।
7.15.41 ॥ ॥

nirmitaṁ sarvakāmaistu manoharamanuttamam ।
na tu śītaṁ na coṣṇaṁ ca sarvartusukhadaṁ śubham ।
7.15.42 ॥ ॥

sa taṁ rājā samāruhya kāmagaṁ vīryanirjitam ।
jitaṁ tribhuvanaṁ mene darpotsekātsudurmatiḥ ।
7.15.43 ॥ ॥

jitvā vaiśravaṇaṁ devaṁ kailāsātsamavātarat ।
7.15.44 ॥ ॥

svatejasā vipulamavāpya taṁ jayaṁ pratāpavānvimalakirīṭahāravān ।
rarāja vai paramavimānamāsthito niśācaraḥ sadasi gato yathānalaḥ ।
7.15.45 ॥