उत्तरकाण्डम्Uttara Kāṇḍa

prabhātāyāṁ tu śarvaryāṁ pṛthuvakṣā mahāyaśāḥ ।
rāmaḥ kamalapatrākṣaḥ purodhasamathābravīt ।
7.109.1 ॥ ॥

agnihotraṁ vrajatvagre dīpyamānaṁ saha dvijaiḥ ।
vājapeyātapatraṁ ca śobhamānaṁ mahāpathe ।
7.109.2 ॥ ॥

tato vasiṣṭhastejasvī sarvaṁ niravaśeṣataḥ ।
cakāra vidhivaddharmaṁ mahāprāsthānikaṁ vidhim ।
7.109.3 ॥ ॥

tataḥ sūkṣmāmbaradharo brahmamāvartayanparam ।
kuśāngṛhītvā pāṇibhyāṁ prasajya prayayāvatha ।
7.109.4 ॥ ॥

avyāharankvacitkiñcinniśceṣṭo niḥsukhaḥ pathi ।
nirjagāma gṛhāttasmāddīpyamāna ivāṁśumān ।
7.109.5 ॥ ॥

rāmasya dakṣiṇe pārśve sapadmā śrīrapāśritā ।
savye tu hrīrmahādevī vyavasāyastathāgrataḥ ।
7.109.6 ॥ ॥

śarā nānāvidhāścāpi dhanurāyatamuttamam ।
tathā ' 'yudhāni te sarve yayuḥ puruṣavigrahāḥ ।
7.109.7 ॥ ॥

vedā brāhmaṇarūpeṇa gāyatrī sarvarakṣiṇī ।
oṅkāro 'tha vaṣaṭkāraḥ sarve rāmamanuvratāḥ ।
7.109.8 ॥ ॥

ṛṣayaśca mahātmānaḥ sarva eva mahīsurāḥ ।
anvagacchanmahātmānaṁ svargadvāramapāvṛtam ।
7.109.9 ॥ ॥

taṁ yāntamanugacchanti hyantaḥpuracarāḥ striyaḥ ।
savṛddhabāladāsīkāḥ savarṣavarakiṅkarāḥ ।
7.109.10 ॥ ॥

sāntaḥpuraśca bharataḥ śatrughnasahito yayau ।
rāmaṁ gatimupāgamya sāgnihotramanuvrataḥ ।
7.109.11 ॥ ॥

te ca sarve mahātmānaḥ sāgnihotrāḥ samāgatāḥ ।
saputradārāḥ kākutsthamanujagmurmahāmatim ।
7.109.12 ॥ ॥

mantriṇo bhṛtyavargāśca saputrapaśubāndhavāḥ ।
sarve sahānugā rāmamanvagacchanprahṛṣṭavat ।
7.109.13 ॥ ॥

tataḥ sarvāḥ prakṛtayo hṛṣṭapuṣṭajanāvṛtāḥ ।
gacchantamanvagachaṁstaṁ rāghavaṁ guṇarañjitāḥ ।
7.109.14 ॥ ॥

tataḥ sastrīpumāṁsaste sapakṣipaśuvāhanāḥ ।
rāghavasyānugāḥ sarve hṛṣṭā vigatakalmaṣāḥ ।
7.109.15 ॥ ॥

snātāḥ pramuditāḥ sarve hṛṣṭāḥ puṣṭāśca vānarāḥ ।
dṛḍhaṁ kilakilāśabdaiḥ sarvaṁ rāmamanuvratam ।
7.109.16 ॥ ॥

na tatra kaściddīno vā vrīḍito vā 'pi duḥkhitaḥ ।
hṛṣṭaṁ samuditaṁ sarvaṁ babhūva paramādbhutam ।
7.109.17 ॥ ॥

draṣṭukāmo 'tha niryāntaṁ rāmaṁ jānapado janaḥ ।
yaḥ prāptaḥ so 'pi dṛṣṭvaiva svargāyānugato mudā ।
7.109.18 ॥ ॥

ṛkṣavānararakṣāṁsi janāśca puravāsinaḥ ।
āgacchanparayā bhaktyā pṛṣṭhataḥ susamāhitāḥ ।
7.109.19 ॥ ॥

yāni bhūtāni nagare 'pyantardhānagatāni ca ।
rāghavaṁ tānyanuyayuḥ svargāya samupasthitam ।
7.109.20 ॥ ॥

yāni paśyanti kākutsthaṁ sthāvarāṇi carāṇi ca ।
sarvāṇi rāmagamane hyanujagmurhi tānyapi ।
7.109.21 ॥ ॥

nocchvasattadayodhyāyāṁ susūkṣmamapi dṛśyate ।
tiryagyonigatāścāpi sarve rāmamanuvratāḥ ।
7.109.22 ॥ ॥