उत्तरकाण्डम्Uttara Kāṇḍa

te dūtā rāmavākyena coditā laghuvikramāḥ ।
prajagmurmadhurāṁ śīghraṁ cakrurvāsaṁ na cādhvani ।
7.108.1 ॥ ॥

te tu tribhirahorātraiḥ samprāpya madhurāmatha ।
śatrughnāya yathātattvamācakhyuḥ sarvameva tat ।
7.108.2 ॥ ॥

lakṣmaṇasya parityāgaṁ pratijñāṁ rāghavasya ca ।
putrayorabhiṣekaṁ ca paurānugamanaṁ tathā ।
7.108.3 ॥ ॥

kuśasya nagarī ramyā vindhyaparvatarodhasi ।
kuśāvatīti nāmnā sā kṛtā rāmeṇa dhīmatā ।
śrāvastīti purī ramyā śrāvitā ca lavasya ha ।
7.108.4 ॥ ॥

ayodhyāṁ vijanāṁ kṛtvā rāghavo bharatastathā ।
svargasya gamanodyogaṁ kṛtavantau mahārathau ।
7.108.5 ॥ ॥

evaṁ sarvaṁ nivedyāśu śatrughnāya mahātmane ।
viremuste tato dūtāstvara rājeti cābruvan ।
7.108.6 ॥ ॥

tacchrutvā ghorasaṅkāśaṁ kulakṣayamupasthitam ।
prakṛtīstu samānīya kāñcanaṁ ca purodhasam ।
7.108.7 ॥ ॥

teṣāṁ sarvaṁ yathāvṛttamabravīdraghanandanaḥ ।
ātmanaśca viparyāsaṁ bhaviṣyaṁ bhrātṛbhiḥ saha ।
7.108.8 ॥ ॥

tataḥ putradvayaṁ vīraḥ so 'bhyaṣiñcannarādhipaḥ ।
subāhurmadhurāṁ lebhe śatrughātī ca vaidiśam ।
7.108.9 ॥ ॥

dvidhā kṛtvā tu tāṁ senāṁ mādhurīṁ putrayordvayoḥ ।
dhanaṁ ca yuktaṁ kṛtvā vai sthāpayāmāsa pārthivaḥ ।
7.108.10 ॥ ॥

subāhuṁ madhurāyāṁ ca vaideśe śatrughātinam ।
yayau sthāpya tadā 'yodhyāṁ rathenaikena rāghavaḥ ।
7.108.11 ॥ ॥

sa dadarśa mahātmānaṁ jvalantamiva pāvakam ।
sūkṣmakṣaumāmbaradharaṁ munibhiḥ sārdhamakṣayaiḥ ।
7.108.12 ॥ ॥

so 'bhivādya tato rāmaṁ prāñjaliḥ prayatendriyaḥ ।
uvāca vākyaṁ dharmajñaṁ dharmamevānucintayan ।
7.108.13 ॥ ॥

kṛtvābhiṣekaṁ sutayordvayo rāghavanandana ।
tavānugamane rājanviddhi māṁ kṛtaniścayam ।
7.108.14 ॥ ॥

na cānyadapi vaktavyamato vīra na śāsanam ।
vilokyamānamicchāmi madvidhena viśeṣataḥ ।
7.108.15 ॥ ॥

tasya tāṁ buddhimaklībāṁ vijñāya raghunandanaḥ ।
bāḍhamityeva śatrughnaṁ rāmo vākyamuvāca ha ।
7.108.16 ॥ ॥

tasya vākyasya vākyānte vānarāḥ kāmarūpiṇaḥ ।
ṛkṣarākṣasasaṅghāśca samāpeturanekaśaḥ ।
7.108.17 ॥ ॥

sugrīvaṁ te puraskṛtya sarva eva samāgatāḥ ।
taṁ rāmaṁ draṣṭumanasaḥ svargāyābhimukhaṁ sthitam ।
7.108.18 ॥ ॥

devaputrā ṛṣisutā gandharvāṇāṁ sutāstathā ।
rāmakṣayaṁ viditvā te sarva eva samāgatāḥ ।
7.108.19 ॥ ॥

te rāmamabhivādyocuḥ sarve vānararākṣasāḥ ।
tavānugamane rājansamprāptāḥ kṛtaniścayāḥ ।
7.108.20 ॥ ॥

yadi rāma vināsmābhirgacchestvaṁ puruṣottama ।
yamadaṇḍamivodyamya tvayā sma vinipātitāḥ ।
7.108.21 ॥ ॥

tairevamuktaḥ kākutstho bāḍhamityabravīt smayan ।
7.108.22 ॥ ॥

etasminnantare rāmaṁ sugrīvo 'pi mahābalaḥ ।
praṇamya vidhivadvīraṁ vijñāpayitumudyataḥ ।
7.108.23 ॥ ॥

abhiṣicyāṅgadaṁ vīramāgato 'smi nareśvara ।
tavānugamane rājanviddhi māṁ kṛtaniścayam ।
7.108.24 ॥ ॥

tasya tadvacanaṁ śrutvā rāmo ramayatāṁ varaḥ ।
vānarendramathovācaṁ maitraṁ tasyānucintayan ।
7.108.25 ॥ ॥

sakhe śṛṇuṣva sugrīva na tvayā 'haṁ vinākṛtaḥ ।
gaccheyaṁ devalokaṁ vā paramaṁ vā padaṁ mahat ।
7.108.26 ॥ ॥

bibhīṣaṇamathovāca rākṣasendraṁ mahāyaśāḥ ।
yāvatprajā dhariṣyanti tāvattvaṁ vai bibhīṣaṇa ।
rākṣasendra mahāvīrya laṅkāsthastvaṁ dhariṣyasi ।
7.108.27 ॥ ॥

yāvaccandraśca sūryaśca yāvattiṣṭhati medinī ।
yāvacca matkathā loke tāvadrājyaṁ tavāstviha ।
7.108.28 ॥ ॥

śāsitastvaṁ sakhitvena kāryaṁ te mama śāsanam ।
prajāḥ saṁrakṣa dharmeṇa nottaraṁ vaktumarhasi ।
7.108.29 ॥ ॥

kiñcānyadvaktumicchāmi rākṣasendra mahāmate ।
7.108.30 ॥ ॥

ārādhaya jagannāthamikṣvākukuladaivatam ।
ārādhanīyamaniśaṁ sarvairdaivaiḥ savāsavaiḥ ।
7.108.31 ॥ ॥

tatheti pratijagrāha rāmavākyaṁ vibhīṣaṇaḥ ।
rājā rākṣasamukhyānāṁ rāghavājñāmanusmaran ।
7.108.32 ॥ ॥

tamevamuktvā kākutstho hanūmantamathābravīt ।
jīvite kṛtabuddhistvaṁ mā pratijñāṁ vilopaya ।
7.108.33 ॥ ॥

matkathāḥ pracariṣyanti yāvalloke harīśvara ।
tāvadramasva suprīto madvākyamanupālayan ।
7.108.34 ॥ ॥

evamuktastu hanumānrāghaveṇa mahātmanā ।
vākyaṁ vijñāpayāmāsa paraṁ harṣamavāpya ca ।
7.108.35 ॥ ॥

yāvattava kathā loke vicariṣyati pāvanī ।
tāvatsthāsyāmi medinyāṁ tavājñāmanupālayan ।
7.108.36 ॥ ॥

jāmbavantaṁ tathoktvā tu vṛddhaṁ brahmasutaṁ tathā ।
maindaṁ ca dvividaṁ caiva pañca jāmbavatā saha ।
yāvatkaliśca samprāptastāvajjīvata sarvadā ।
7.108.37 ॥ ॥

tānevamuktvā kākutsthaḥ sarvāṁstānṛkṣavānarān ।
uvāca bāḍhaṁ gacchadhvaṁ mayā sārdhaṁ yathepsitam ।
7.108.38 ॥