उत्तरकाण्डम्Uttara Kāṇḍa

tathā tayoḥ saṁvadatordurvāsā bhagavānṛṣiḥ ।
rāmasya darśanākāṅkṣī rājadvāramupāgamat ।
7.105.1 ॥ ॥

so 'bhigamya tu saumitrimuvāca ṛṣisattamaḥ ।
rāmaṁ darśaya me śīghraṁ purā me 'rtho 'tivartate ।
7.105.2 ॥ ॥

munestu bhāṣitaṁ śrutvā lakṣmaṇaḥ paravīrahā ।
abhivādya mahātmānaṁ vākyametaduvāca ha ।
7.105.3 ॥ ॥

kiṁ kāryaṁ brūhi bhagavanko vā 'rthaḥ kiṁ karomyaham ।
vyagro hi rāghavo brahmanmuhūrtaṁ pratipālyatām ।
7.105.4 ॥ ॥

tacchrutvā ṛṣiśārdūlaḥ krodhena kaluṣīkṛtaḥ ।
uvāca lakṣmaṇaṁ vākyaṁ nirdahanniva cakṣuṣā ।
7.105.5 ॥ ॥

asminkṣaṇe māṁ saumitre rāmāya prativedaya ।
asminkṣaṇe māṁ saumitre na nivedayase yadi ।
7.105.6 ॥ ॥

viṣayaṁ tvāṁ puraṁ caiva śapiṣye rāghavaṁ tathā ।
bharataṁ caiva saumitre yuṣmākaṁ yā ca santatiḥ ।
7.105.7 ॥ ॥

na hi śakṣyāmyahaṁ bhūyo manyuṁ dhārayituṁ hṛdi ।
tacchrutvā ghorasaṅkāśaṁ vākyaṁ tasya mahātmanaḥ ।
cintayāmāsa manasā tasya vākyasya niścayam ।
7.105.8 ॥ ॥

ekasya maraṇaṁ me 'stu mā bhūtsarvavināśanam ।
iti buddhyā viniścitya rāghavāya nyavedayat ।
7.105.9 ॥ ॥

lakṣmaṇasya vacaḥ śrutvā rāmaḥ kālaṁ visṛjya ca ।
nissṛtya tvaritaṁ rājā atreḥ putraṁ dadarśa ha ।
7.105.10 ॥ ॥

so 'bhivādya mahātmānaṁ jvalantamiva tejasā ।
kiṁ kāryamiti kākutsthaḥ kṛtāñjalirabhāṣata ।
7.105.11 ॥ ॥

tadvākyaṁ rāghaveṇoktaṁ śrutvā munivaraḥ prabhum ।
pratyāha rāmaṁ durvāsāḥ śrūyatāṁ dharmavatsala ।
7.105.12 ॥ ॥

adya varṣasahasrasya samāptistapaso mama ।
so 'haṁ bhojanamicchāmi yathāsiddhaṁ tavānagha ।
7.105.13 ॥ ॥

tacchrutvā vacanaṁ rājā rāghavaḥ prītamānasaḥ ।
bhojanaṁ munimukhyāya yathāsiddhamupāharat ।
7.105.14 ॥ ॥

sa tu bhuktvā muniśreṣṭhastadannamamṛtopamam ।
sādhu rāmeti sambhāṣya svamāśramamupāgamat ।
7.105.15 ॥ ॥

tasmin gate munivare svāśramaṁ lakṣmaṇāgrajaḥ ।
saṁsmṛtya kālavākyāni tato duḥkhamupāgamat ।
7.105.16 ॥ ॥

duḥkhena ca susantaptaḥ smṛtvā tadghoradarśanam ।
avāṅmukho dīnamanā vyāhartuṁ na śaśāka ha ।
7.105.17 ॥ ॥

tato buddhyā viniścitya kālavākyāni rāghavaḥ ।
naitadastīti niścitya tūṣṇīmāsīnmahāyaśāḥ ।
7.105.18 ॥