उत्तरकाण्डम्Uttara Kāṇḍa

kasyacittvatha kālasya yudhājitkekayo nṛpaḥ ।
svaguruṁ preṣayāmāsa rāghavāya mahātmane ।
gārgyamaṅgirasaḥ putraṁ brahmarṣimamitaprabham ।
7.100.1 ॥ ॥

daśa cāśvasahasrāṇi prītidānamanuttamam ।
7.100.2 ॥ ॥

kambalāni ca ratnāni citravastramathottamam ।
rāmāya pradadau rājā śubhānyābharaṇāni ca ।
7.100.3 ॥ ॥

śrutvā tu rāghavo dhīmānmaharṣiṁ gārgyamāgatam ।
mātulasyāśvapatinaḥ prahitaṁ tanmahādhanam ।
7.100.4 ॥ ॥

pratyudgamya ca kākutsthaḥ krośamātraṁ sahānujaḥ ।
gārgyaṁ sampūjayāmāsa yathā śakro bṛhaspatim ।
7.100.5 ॥ ॥

tathā sampūjya tamṛṣiṁ taddhanaṁ pratigṛhya ca ।
pṛṣṭvā pratipadaṁ sarvaṁ kuśalaṁ mātulasya ca ।
upaviṣṭaṁ mahābhāgaṁ rāmaḥ praṣṭuṁ pracakrame ।
7.100.6 ॥ ॥

kimāha mātulo vākyaṁ yadarthaṁ bhagavāniha ।
prāpto vākyavidāṁ śreṣṭhaḥ sākṣādiva bṛhaspatiḥ ।
7.100.7 ॥ ॥

rāmasya bhāṣitaṁ śrutvā maharṣiḥ kāryavistaram ।
vaktumadbhutasaṅkāśaṁ rāghavāyopacakrame ।
7.100.8 ॥ ॥

mātulaste mahābāho vākyamāha nararṣabhaḥ ।
yudhājitprītisaṁyuktaṁ śrūyatāṁ yadi rocate ।
7.100.9 ॥ ॥

ayaṁ gandharvaviṣayaḥ phalamūlopaśobhitaḥ ।
sindhorubhayataḥ pārśve deśaḥ paramaśobhanaḥ ।
7.100.10 ॥ ॥

taṁ ca rakṣanti gandharvāḥ sāyudhā yuddhakovidāḥ ।
śailūṣasya sutā vīra trikoṭyo vai mahābalāḥ ।
7.100.11 ॥ ॥

tānvinirjitya kākutstha gandharvanagaraṁ śubham ।
niveśaya mahāboho sve pure susamāhite ।
7.100.12 ॥ ॥

anyasya na gatistatra deśaḥ paramaśobhanaḥ ।
rocatāṁ te mahābāho nāhaṁ tvāmahitaṁ vade ।
7.100.13 ॥ ॥

tacchrutvā rāghavaḥ prīto maharṣermātulasya ca ।
uvāca bāḍhamityeva bharataṁ cānvavaikṣata ।
7.100.14 ॥ ॥

so 'bravīdrāghavaḥ prītaḥ sāñjalipragraho dvijam ।
imau kumārau taṁ deśaṁ brahmarṣe vicariṣyataḥ ।
7.100.15 ॥ ॥

bharatasyātmajau vīrau takṣaḥ puṣkala eva ca ।
mātulena suguptau tu dharmeṇa susamāhitau ।
7.100.16 ॥ ॥

bharataṁ cāgrataḥ kṛtvā kumārau sabalānugau ।
nihatya gandharvasutāndve pure vibhajiṣyataḥ ।
7.100.17 ॥ ॥

niveśya te puravare ātmajau sanniveśya ca ।
āgamiṣyati me bhūyaḥ sakāśamatidhārmikaḥ ।
7.100.18 ॥ ॥

brahmarṣimevamuktvā tu bharataṁ sabalānugam ।
ājñāpayāmāsa tadā kumārau cābhyaṣecayat ।
7.100.19 ॥ ॥

nakṣatreṇa ca saumyena puraskṛtyāṅgirassutam ।
bharataḥ saha sainyena kumārābhyāṁ viniryayau ।
7.100.20 ॥ ॥

sā senā śakrayukteva nagarānniryayāvatha ।
rāghavānugatā dūraṁ durādharṣā surairapi ।
7.100.21 ॥ ॥

māṁsādāni ca sattvāni rakṣāṁsi sumahānti ca ।
anujagmurhi bharataṁ rudhirasya pipāsayā ।
7.100.22 ॥ ॥

bhūtagrāmāśca bahavo māṁsabhakṣāḥ sudāruṇāḥ ।
gandharvaputramāṁsāni bhoktukāmāḥ sahasraśaḥ ।
7.100.23 ॥ ॥

siṁhavyāghravarāhāṇāṁ khecarāṇāṁ ca pakṣiṇām ।
bahūni vai sahasrāṇi senāyā yayuragrataḥ ।
7.100.24 ॥ ॥

adhyardhamāsamuṣitā pathi senā nirāmayā ।
hṛṣṭapuṣṭajanākīrṇā kekayaṁ samupāgamat ।
7.100.25 ॥