अरण्यकाण्डम्Araṇya Kāṇḍa

rāmaḥ prekṣya tu tam gṛdhram bhuvi raudreṇa pātitam ।
saumitrim mitra saṁpannam idam vacanam abravīt ॥

mama ayam nūnam artheṣu yatamāno vihaṁgamaḥ ।
rākṣasena hataḥ saṁkhye prāṇān tyajati mat kṛte ॥

ati khinnaḥ śarīre asmin prāṇo lakṣmaṇa vidyate ।
tathā svara vihīno ayam viklavam samudīkṣate ॥

jaṭāyo yadi śaknoṣi vākyam vyāharitum punaḥ ।
sītām ākhyāhi bhadram te vadham ākhyāhi ca ātmanaḥ ॥

kim nimitto jahāra āryām rāvaṇaḥ tasya kim mayā ।
aparādham tu yam dṛṣṭvā rāvaṇena hṛtā priyā ॥

katham tat candra saṁkāśam mukham āsīt manoharam ।
sītayā kāni ca uktāni tasmin kāle dvijottama ॥

katham vīryaḥ katham rūpaḥ kim karmā sa ca rākṣasaḥ ।
kva ca asya bhavanam tāta brūhi me paripṛcchataḥ ॥

tam udvīkṣya saḥ dharmātmā vilapantam anāthavat ।
vācā viklavayā rāmam idam vacanam abravīt ॥

sā hṛtā rākṣasendreṇa rāvaṇena durātmanā ।
māyām āsthāya vipulām vāta durdina saṁkulām ॥

pariklāṁtasya me tāta pakṣau cittvā niśācaraḥ ।
sītām ādāya vaidehīm prayāto dakṣiṇā mukhaḥ ॥

uparudhyanti me prāṇā dṛṣṭir bhramati rāghava ।
paśyāmi vṛkṣān sauvarṇān uśīra kṛta mūrdhajān ॥

yena yāti muhūrtena sītām ādāya rāvaṇaḥ ।
vipranaṣṭam dhanam kṣipram tat svāmi pratipadyate ॥

vindo nāma muhūrto asau sa ca kākutstha na abudhat ।
tvat priyām jānakīm hṛtvā rāvaṇo rākṣaseśvara ।
jhaṣavat baḍiśam gṛhya kṣipram eva vinaśyati ॥

na ca tvayā vyathā kāryā janakasya sutām prati ।
vaidehyā raṁsyase kṣipram hatvā tam raṇamūrdhani ॥

asaṁmūḍhasya gṛdhrasya rāmam prati anubhāṣataḥ ।
āsyāt susrāva rudhiram mriyamāṇasya sa amiṣam ॥

putro viśravasaḥ sākṣāt bhrātā vaiśravaṇasya ca ।
iti uktvā durlabhān prāṇān mumoca patageśvaraḥ ॥

brūhi brūhi iti rāmasya bruvāṇasya kṛtāṁjaleḥ ।
tyaktvā śarīram gṛdhrasya jagmuḥ prāṇā vihāyasam ॥

sa nikṣipya śiro bhūmau prasārya caraṇau tadā ।
vikṣipya ca śarīram svam papāta dharaṇī tale ॥

tam gṛdhram prekṣya tāmra akṣam gata asum acalopamam ।
rāmaḥ su bahubhiḥ duhkhaiḥ dīnaḥ saumitrim abravīt ॥

bahūni rakṣasām vāse varṣāṇi vasatā sukham ।
anena daṇḍakāraṇye viśīrṇam iha pakṣiṇā ॥

aneka vārṣiko yaḥ tu cira kāla samutthitaḥ ।
so ayam adya hataḥ śete kālo hi duratikramaḥ ॥

paśya lakṣmaṇa gṛdhro ayam upakārī hataḥ ca me ।
sītām abhyavapanno hi rāvaṇena balīyasā ॥

gṛdhra rājyam parityajya pitṛ paitāmaham mahat ।
mama hetoḥ ayam prāṇān mumoca patageśvaraḥ ॥

sarvatra khalu dṛśyante sādhavo dharma cāriṇaḥ ।
śūrāḥ śaraṇyāḥ saumitre tiryak yoni gateṣu api ॥

sītā haraṇajaṁ duḥkham na me saumya tathā gatam ।
yathā vināśo gṛdhrasya mat kṛte ca paraṁtapa ॥

rājā daśarathaḥ śrīmān yathā mama mayā yaśāḥ ।
pūjanīyaḥ ca mānyaḥ ca tathā ayam patageśvaraḥ ॥

saumitre hara kāṣṭhāni nirmathiṣyāmi pāvakam ।
gṛdhra rājam didhakṣāmi mat kṛte nidhanam gatam ॥

nātham pataga lokasya citām āropayāmi aham ।
imam dhakṣyāmi saumitre hatam raudreṇa rakṣasā ॥

yā gatiḥ yajña śīlānām āhita agneḥ ca yā gatiḥ ।
a para āvartinām yā ca yā ca bhūmi pradāyinām ॥

mayā tvam samanujñāto gaccha lokān anuttamān ।
gṛdhra rāja mahā sattva saṁskṛtaḥ ca mayā vraja ॥

evam uktvā citām dīptām āropya patageśvaram ।
dadāha rāmo dharmātmā sva bandhum iva duḥkhitaḥ ॥

rāmo atha saha saumitriḥ vanam yātvā sa vīryavān ।
sthūlān hatvā mahā rohīn anu tastāra tam dvijam ॥

rohi māṁsāni ca uddhṛtya peśī kṛtvā mahāyaśāḥ ।
śakunāya dadau rāmo ramye harita śādvale ॥

yat tat pretasya martyasya kathayanti dvijātayaḥ ।
tat svarga gamanam pitryam kṣipram rāmo jajāpa ha ॥

tato godāvarīm gatvā nadīm nara vara ātmajau ।
udakam cakratuḥ tasmai gṛdhra rājāya tau ubhau ॥

śāstra dṛṣṭena vidhinā jale gṛdhāya rāghavau ।
snātvā tau gṛdhra rājāya udakam cakruḥ tadā ॥

sa gṛdhra rājaḥ kṛtavān yaśaskaramsu duṣkaram karma raṇe nipātitaḥ ।
maharṣi kalpena ca saṁskṛtaḥ tadājagāma puṇyām gatim ātmanaḥ śubhām ॥

kṛtodakau tau api pakṣi sattamesthirām ca buddhim praṇidhāya jagmutuḥ ।
praveśya sītā adhigamane tato manovanam surendrau iva viṣṇu vāsavau ॥