उत्तरकाण्डम्Uttara Kāṇḍa

etāvadetadākhyānaṁ sottaraṁ brahmapūjitam ।
rāmāyaṇamiti khyātaṁ mukhyaṁ vālmīkīnā kṛtam ।
7.111.1 ॥ ॥

tataḥ pratiṣṭhito viṣṇuḥ svargaloke yathā puram ।
yena vyāptamidaṁ sarvaṁ trailokyaṁ sacarācaram ।
7.111.2 ॥ ॥

tato devāḥ sagandharvāḥ siddhāśca paramarṣayaḥ ।
nityaṁ śṛṇvanti santuṣṭāḥ divyaṁ rāmāyaṇaṁ divi ।
7.111.3 ॥ ॥

idamākhyānamāyuṣyaṁ saubhāgyaṁ pāpanāśanam ।
rāmāyaṇaṁ vedasamaṁ śrāddheṣu śrāvayedbudhaḥ ।
7.111.4 ॥ ॥

aputro labhate putramadhano labhate dhanam ।
sarvapāpaiḥ pramucyeta padamapyasya yaḥ paṭhet ।
7.111.5 ॥ ॥

pāpānyapi ca yaḥ kuryādahanyahani mānavaḥ ।
paṭhatyekamapi ślokaṁ pāpātsa parimucyate ।
7.111.6 ॥ ॥

vācakāya ca dātavyaṁ vastraṁ dhenuṁ hiraṇyakam ।
vācake parituṣṭe tu tuṣṭāḥ syuḥ sarvadevatāḥ ।
7.111.7 ॥ ॥

etadākhyānamāyuṣyaṁ paṭhanrāmāyaṇaṁ naraḥ ।
saputrapautro loke 'sminpretya ceha mahīyate ।
7.111.8 ॥ ॥

ayodhyā 'pi purī ramyā śūnyā varṣagaṇānbahūn ।
ṛṣabhaṁ prāpya rājānaṁ nivāsamupayāsyati ।
7.111.9 ॥ ॥

etadākhyānamāyuṣyaṁ sabhaviṣyaṁ sahottaram ।
kṛtavānpracetasaḥ putrastadbrahmāpyanvamanyata ।
7.111.10 ॥ ॥

aśvamedhasahasrasya vājapeyāyutasya ca ।
labhate śrāvaṇādeva sargasyaikasya mānavaḥ ।
7.111.11 ॥ ॥

prayāgādīni tīrthāni gaṅgādyāḥ saritastathā ।
naimiśādīnyaraṇyāni kurukṣetrādikānyapi ।
gatāni tena loke 'sminyena rāmāyaṇaṁ śrutam ।
7.111.12 ॥ ॥

hemabhāraṁ kurukṣetre graste bhānau prayacchati ।
yaśca rāmāyaṇaṁ loke śṛṇoti sadṛśāvubhau ।
7.111.13 ॥ ॥

samyakchraddhāsamāyuktaḥ śṛṇute rāghavīṁ kathām ।
sarvapāpātpramucyeta viṣṇulokaṁ sa gacchati ।
7.111.14 ॥ ॥

ādikāvyamidaṁ tvārṣaṁ purā vālmīkinā kṛtam ।
yaḥ śṛṇoti sadā bhaktyā sa gacchedvaiṣṇavīṁ tanum ।
7.111.15 ॥ ॥

putradārāśca vardhante sampadaḥ santatistathā ।
satyametadviditvā tu śrotavyaṁ niyatātmabhiḥ ।
7.111.16 ॥ ॥

gāyatryāśca svarūpaṁ tadrāmāyaṇamanuttamam ।
7.111.17 ॥ ॥

aputro labhate putramadhano labhate dhanam ।
sarvapāpaiḥ pramucyeta padamapyasya yaḥ paṭhet ।
7.111.18 ॥ ॥

yaḥ paṭhecchṛṇuyānnityaṁ caritaṁ rāghavasya ha ।
bhaktyā niṣkalmaṣo bhūtvā dīrghamāyuravāpnuyāt ।
7.111.19 ॥ ॥

cintayedrāghavaṁ nityaṁ śreyaḥ prāptuṁ ya icchati ।
śrāvayedidamākhyānaṁ brāhmaṇebhyo dine dine ।
7.111.20 ॥ ॥

yastvidaṁ raghunāthasya caritaṁ sakalaṁ paṭhet ।
so 'sukṣaye viṣṇulokaṁ gacchatyeva na saṁśayaḥ ।
7.111.21 ॥ ॥

pitā pitāmahastasya tathaiva prapitāmahaḥ ।
tatpitā tatpitā caiva viṣṇuṁ yānti na saṁśayaḥ ।
7.111.22 ॥ ॥

caturvargapradaṁ nityaṁ caritaṁ rāghavasya tu ।
tasmādyatnavatā nityaṁ śrotavyaṁ paramaṁ sadā ।
7.111.23 ॥ ॥

śṛṇvanrāmāyaṇaṁ bhaktyā yaḥ pādaṁ padameva vā ।
sa yāti brahmaṇaḥ sthānaṁ brahmaṇā pūjyate sadā ।
7.111.24 ॥ ॥

evametatpurāvṛttamākhyānaṁ bhadramastu vaḥ ।
pravyāharata visrabdhaṁ balaṁ viṣṇoḥ pravardhatām ।
7.111.25 ॥